Quintus
Equidem ista agnosco, frater, et
meritas dis gratias ago. Sed nimis saepe secus aliquanto
uidemus euadere.
Marcus
Non enim, Quinte, recte existimamus
quae poena diuina sit, sed opinionibus uulgi rapimur
in errorem, nec uera cernimus. Morte aut dolore corporis aut luctu animi aut offensione iudicii hominum
miserias ponderamus, quae fateor humana esse et
multis bonis uiris accidisse. Sceleris est poena tristis
et, praeter eos euentus qui sequuntur, per se ipsa
maxima est. Vidimus eos, qui, nisi odissent patriam,
numquam inimici nobis fuissent, ardentes tum cupiditate, tum metu, tum conscientia, quicquid agerent,
modo timentes, uicissim contemnentes religiones: iudicia perrupta ab isdem, corruptela hominum, non
deorum. . . .