Click on a word to bring up parses, dictionary entries, and frequency statistics
[
41]
Tum autem qui non ipso honesto mouemur
ut boni uiri simus,
sed utilitate aliqua atque fructu,
callidi sumus,
non boni.
Nam quid faciet is homo in
tenebris qui nihil timet nisi testem et iudicem?
Quid
in deserto quo loco nactus,
quem multo auro spoliare
possit,
imbecillum atque solum?
Noster quidem hic
natura iustus uir ac bonus etiam conloquetur,
iuuabit,
in uiam deducet.
Is uero qui nihil alterius causa faciet
et metietur suis commodis omnia,
uidetis,
credo,
quid sit acturus!
Quodsi negabit se illi uitam erepturum et aurum ablaturum,
numquam ob eam causam negabit quod id natura turpe iudicet,
sed quod
metuat ne emanet,
id est ne malum habeat.
O rem
dignam,
in qua non modo docti,
sed etiam agrestes
erubescant!
15.