14.
Click on a word to bring up parses, dictionary entries, and frequency statistics
[39]
Sibi autem
indulgentes et corpori deseruientes atque omnia quae
sequantur in uita quaeque fugiant uoluptatibus et
doloribus ponderantes, etiam si uera dicant—nihil
enim opus est hoc loco litibus—, in hortulis suis
iubeamus dicere, atque etiam ab omni societate rei
publicae, cuius partem nec norunt ullam neque umquam nosse uoluerunt, paulisper facessant rogemus.
Perturbatricem autem harum omnium rerum Academiam, hanc ab Arcesila et Carneade recentem, exoremus ut sileat. Nam si inuaserit in haec, quae satis
scite nobis instructa et composita uidentur, nimias
edet ruinas. Quam quidem ego placare cupio, submouere non audeo. . . .
. . .
M. Tullius Cicero. De Legibus. Georges de Plinval. Paris. Belles Lettres. 1959. Scanned printed text.
The National Endowment for the Humanities provided support for entering this text.
