16. Quodsi populorum iussis, si principum decretis, si sententiis iudicum iura constituerentur, ius esset latrocinari, ius adulterare, ius testamenta falsa supponere, si haec suffragiis aut scitis multitudinis probarentur.
Click on a word to bring up parses, dictionary entries, and frequency statistics
[43]
Atqui si natura confirmatura ius non erit, uirtutes omnes tollantur. Vbi enim liberalitas, ubi
patriae caritas, ubi pietas, ubi aut bene merendi de
altero aut referendae gratiae uoluntas poterit existere? Nam haec nascuntur ex eo quod natura propensi sumus ad diligendos homines, quod
fundamentum iuris est. Neque solum in homines obsequia, sed
etiam in deos caerimoniae religionesque tollentur,
quas non metu, sed ea coniunctione quae est homini
cum deo conseruandas puto.
M. Tullius Cicero. De Legibus. Georges de Plinval. Paris. Belles Lettres. 1959. Scanned printed text.
The National Endowment for the Humanities provided support for entering this text.
