Atticus
Quin igitur ista ipsa explicas nobis
his subsiciuis, ut ais, temporibus, et conscribis de iure
ciuili subtilius quam ceteri? Nam a primo tempore
aetatis iuri studere te memini, quom ipse etiam ad
Scaeuolam uentitarem, neque umquam mihi uisus es
ita te ad dicendum dedisse, ut ius ciuile contemneres.
Marcus
In longum sermonem me uocas, Attice,
quem tamen, nisi Quintus aliud quid nos agere
mauult, suscipiam, et, quoniam uacui sumus, dicam.
Quintus
Ego uero libenter audierim. Quid enim
agam potius, aut in quo melius hunc consumam diem?