M. Tullius Cicero, Orator
A. S. Wilkins, Ed.

33. [116] et quoniam in omnibus quae ratione docentur et via primum constituendum est quid quidque sit—nisi enim inter eos qui disceptant¹ convenit quid sit illud quod² ambigitur, nec recte disseri umquam nec ad exitum perveniri potest³—, explicanda est saepe verbis mens nostra de quaque re atque involuta⁴ rei notitia⁵ definiendo aperienda est, si quidem est definitio oratio, quae quid sit id de quo [p. 2036] agitur ostendit quam brevissime; tum, ut scis, explicato genere cuiusque rei videndum est quae sint eius generis sive formae sive partes, ut in eas tribuatur omnis oratio. [117] erit igitur haec facultas in eo quem volumus esse eloquentem, ut definire rem possit nec id faciat tam presse et anguste quam in illis eruditissimis disputationibus fieri solet, sed cum explanatius tum etiam uberius et ad commune iudicium popularemque intellegentiam accommodatius; idemque etiam, cum res postulabit, genus universum in species certas, ut nulla neque praetermittatur neque redundet, partietur ac dividet. Quando autem id faciat⁶ aut quo modo, nihil ad hoc tempus, quoniam, ut supra dixi, iudicem esse me, non doctorem volo. [118] nec vero a⁷ dialecticis modo sit instructus et habeat omnis philosophiae notos ac tractatos locos. Nihil enim de religione, nihil de morte⁸, nihil de pietate, nihil de caritate patriae, nihil de bonis rebus⁹ aut malis, nihil de virtutibus aut vitiis, nihil de officio¹⁰, nihil de dolore, nihil de voluptate, nihil de perturbationibus animi et erroribus, quae saepe cadunt in causas et¹¹ ieiunius aguntur¹², nihil, inquam, sine ea scientia quam dixi graviter ample copiose dici et explicari potest.