Titus Livius (Livy), The History of Rome, Book 38
Evan T. Sage, Ph.D., Ed.

14. tertio inde die ad Casum amnem perventum; inde profecti Erizam urbem primo impetu ceperunt. [2] ad Thabusion castellum imminens flumini Indo ventum est, cui fecerat nomen Indus ab elephanto delectus. [3] haud procul a Cibyra aberant, nec legatio ulla a Moagete, tyranno civitatis eius, homine ad omnia infido atque importuno, veniebat. [4] ad temptandum eius animum C. Helvium¹ cum quattuor milibus peditum et quingentis² equitibus consul praemittit. huic agmini iam fines ingredienti legati occurrerunt nuntiantes paratum esse tyrannum³ imperata facere; [5] orabant ut pacatus fines iniret cohiberetque a populatione agri militem, et in corona aurea quindecim talenta adferebant. [6] Helvius integros⁴ a populatione agros servaturum pollicitus ire ad consulem legatos iussit. [7] quibus eadem referentibus consul “neque Romani” inquit “bonae voluntatis ullum signum erga nos tyranni habemus, et ipsum talem esse inter omnes constat ut de poena eius magis quam de amicitia nobis⁵ cogitandum sit.” [8] perturbati hac voce legati nihil aliud⁶ petere quam ut coronam acciperet veniendique ad eum tyranno potestatem et copiam loquendi ac purgandi se faceret. [9] permissu consulis postero die in castra [p. 46] tyrannus venit, vestitus comitatusque vix ad privati⁷ modice locupletis habitum, et oratio fuit summissa et infracta, extenuantis opes suas urbiumque suae dicionis egestatem querentis. [10] erant autem sub eo⁸ praeter Cibyram Sylleum et ad Limnen quae appellatur. ex his, ut se suosque spoliaret, quinque et viginti talenta se confecturum, prope ut diffidens pollicebatur. [11] “enimvero” inquit consul “ferri iam ludificatio ista non potest. parum est non erubuisse absentem, cum per legatos frustrareris nos; praesens quoque in eadem perstas impudentia. [12] quinque et viginti talenta tyrannidem tuam exhaurient? quingenta ergo talenta nisi triduo numeras, populationem in agris, obsidionem in urbe expecta.” [13] hac denuntiatione conterritus perstare⁹ tamen in pertinaci simulatione inopiae. [14] et paulatim illiberali adiectione nunc per cavillationem, nunc precibus et simulatis lacrimis ad centum talenta est perductus. adiecta decem milia medimnum frumenti. haec omnia intra sex dies exacta.