Artemona
Áin tu meum virum híc potare, óbsecro, cum fílio
et ad amicam detulisse argenti viginti minas
meoque filio sciente id facere flagitium patrem?
Parasitvs
Neque divini neque mi humani posthac quicquam accreduas,
5Artemona, si huius rei mé mendacem inveneris.
Art.
At scelesta ego praeter alios meum virum † frugi rata,
siccum, frugi, continentem, amantem uxoris maxume.
Par.
At nunc dehinc scito illum ante omnes minimi mortalem preti,
madidum, nihili, incontinentem atque osorem uxoris suae.
Art.
10Pol ni istaec vera essent, numquam faceret ea quae nunc facit.
Par.
Ego quoque hercle illum antehac hominem semper sum frugi ratus,
verum hoc facto sese ostendit, qui quidem cum filio
potet una atque una amicam ductet, decrepitus senex.
Art.
Hoc ecastor est quod ille it ad cenam cottidie.
15ait sese ire ad Archidemum, Chaeream, Chaerestratum,
Cliniam, Chremem, Cratinum, Diniam, Demosthenem:
is apud scortum corruptelae est liberis, lustris studet.
Par.
Quin tu illum iubes ancillas rapere sublimen domum?
Art.
Tace modo. ne ego illum ecastor miserum habebo.
P.
Ego istúc scio,
20ita fore illi dum quidem cum íllo nupta eris.
Art.
Ego censeo.
†eum etiam hominem in senatu dare operam aut clientibus,
ibi labore delassatum noctem totam stertere:
ille operé foris faciendo lassus noctu ad me advenit;
fundum alienum arat, incultum familiarem deserit.
25is etiam corruptus porro suom corrumpit filium.
Par.
Sequere hac me modó, iam faxo ipsum hominem manifesto opprimas.
Art.
Nihil ecastor est quod facere mavelim.
Par.
Possis, si forte accubantem tuom virum conspexeris
cum corona amplexum amicam, si videas, cognoscere?
P.
Paulisper mane.
aucupemus ex insidiis clanculum quam rem gerant.
Arg.
Quid modi, pater, amplexando facies?
Dem.
Me ex amore húius corruptum oppido.
Dem.
Egon ut non domo uxori meae
35subripiam in deliciis pallam quam hábet, atque ad te deferam,
non edepol conduci possum vita uxoris annua.
Par.
Censen tu illum hodié primum ire ádsuetum esse in ganeum?
Art.
Ille ecastor suppilabat me, quod ancillas meas
suspicabar atque insontis miseras cruciabam.
Arg.
Pater,
40iube dari vinum; iam dudum factum est cum primum bibi.
Dem.
Da, puere, ab summo. áge tu interibi ab infimo da savium.
Art.
Perii misera, ut osculatur carnufex, capuli decus.
Dem.
Edepol animam suaviorem aliquanto quam uxoris meae.
Phil.
Dic amabo, an fetet anima úxoris tuae?
Dem.
Nauteam
45bibere malim, si necessum sit, quam illam oscularier.
Art.
Ain tandem? edepol ne tu istuc cum malo magno tuo
Dixisti in me. sine, revenias modo domum, faxo ut scias
quid pericli sit dotatae uxori vitium dicere.
Arg.
Quid ais, pater?
50ecquid matrem amas?
Dem.
Egone illam? nunc amo, quia non adest.
P.
Amat homo hic te, ut praedicat.
Art.
Ne illa ecastor faenerato funditat: nam si domum
redierit hodie, osculando ego ulciscar potissimum.
Arg.
Iace, pater, talos, ut porro nos iaciamus.
Dem.
Maxime.
55te, Philaenium, mihi atque uxoris mortem. hoc Venerium est.
pueri, plaudite et mi ob iactum cantharo mulsum date.
Par.
Si non didicisti fulloniam,
non mirandum est. ... in oculos invadi optumum est.
Art.
Ego pol vivam et tu istaec hodie cum tuo magno malo
60invocavisti.
Par.
Ecquis currit pollictorem accersere?
Par.
Mortuost Demaenetus.
tempus est subducere hinc me; pulchre hoc gliscit proelium.
ibo ad Diabolum, mandata dicam facta ut voluerit,
atque interea ut decumbamus suadebo, hi dum litigant.
65poste demum huc cras adducam ad lenam, ut viginti minas
ei det, in partem hac amanti ut liceat ei potirier.
Argyrippus exorari spero poterit, ut sinat
sese alternas cum illo noctes hac frui. nam ni impetro,
regem perdidi: ex amore tantum est homini incendium.—
Art.
70Quid tibi hunc receptio ad te est meum virum?
Phil.
Pol me quidem
miseram odio énicavit.
Art.
Immo es, ne nega, omnium unus pol nequissimus.
at etiam cubat cuculus. surge, amator, i domum.
Art.
Vera hariolare. surge, amator, i domum.
Dem.
75Abscede ergo paululum istuc.
Art.
Nunc uxorem me esse meministi tuam?
modo, cum dicta in me ingerebas, odium, non uxor eram.
Art.
Quid tandem? anima fetetne uxoris tuae?
Art.
Iam subrupuisti pallam, quam scorto dares?
Phil.
80Ecastor qui subrupturum pallam promisit tibi.
Arg.
Ego dissuadebam, mater.
Art.
Bellum filium.
istoscine patrem aequom est mores liberis largirier?
nilne te pudet?
Dem.
Pol, si aliud nil sit, tui me, uxor, pudet.
Art.
Cano capite te cuculum uxor ex lustris rapit.
Dem.
85Non licet manere (cena coquitur) dum cenem modo?
Art.
Ecastor cenabis hodie, ut dignus es, magnum malum.
Dem.
Male cubandum est: iudicatum me uxor abducit domum.
Arg.
Dicebam, pater, tibi, ne matri consuleres male.
Phil.
De palla memento, amabo.
Dem.
Iuben hanc hinc abscedere?
Phil.
Da savium etiam prius quam abis.
Phil.
Immo intro potius. sequere hac me, mí anime.
Grex
Hic senex si quid clam uxorem suo animo fecit volup,
neque novom neque mirum fecit nec secus quam alii solent;
nec quisquam est tam ingenio duro nec tam firmo pectore,
95quin ubi quicque occasionis sit sibi faciat bene.
nunc si voltis deprecari huic seni ne vapulet,
remur impetrari posse, plausum si clarum datis.
