Pato sinado en Ourense.

Sinado é o nome co que nalgúns puntos da Limia coñecen ao pato asubión (Anas penelope), a bisbarra da Limia foi, e segue sendo, o principal cuartel de invernada para a especie na provincia de Ourense, sen embargo lonxe están xa os centos de aves, nunca censadas, que habitaban a desaparecida Lagoa de Antela, o pasado día 27 de decembro de 2009 foron contados 10 exemplares nunha das areeiras da Limia en Sandiás.

Hoxe mesmo, día 29 de decembro de 2009, foi localizado no río Miño ao seu paso por Ourense este exemplar de pato sinado, curioso, sí pero as citas da especie na Depresión Ourensá, anque sempre abranguen a poucos exemplares, son xa regulares nos últimos tempos.

O curioso deste caso é o lugar exacto da observación, o céspede da zona termal ourensá coñecida como a Chavasqueira!, ahí dende a beira do río, que hoxe baixa moi medrado, daba boa conta do céspede parcialmente inundado que no vran será invadido por centos de bañistas.

Cegoñas brancas na Limia.

Parece que as cegoñas xa están presentes en boa parte da provincia, así estas imaxes amosan os dous exemplares desta especie atopados nos concellos limiaos de Sandiás e Vilar de Santos entre os días 26 e 27 de decembro de 2009.

Becacinas nas areeiras da Limia.

O pasado día 27 de decembro de 2009 foron localizadas 12 becacinas (Gallinago gallinago) nas areeiras da Limia en Sandiás, estas son algunhas das imaxes obtidas.

Picatorneiros nas areeiras da Limia.

Xa vos teño comentado que picatorneiros é o nome xenérico co que nalgúns puntos da Limia coñecen aos petos, neste caso temos nas imaxes un Dendrocopos major, unha especie frecuente en case toda a provincia.

Estas imaxes foron obtidas o pasado día 27 de decembro de 2009 nas areeiras da Limia en Sandiás.

Lontra nas areeiras da Limia.

Dende logo sempre é unha ledicia atoparse cunha lontra (Lutra lutra) canto máis nun espazo natural como as areeiras da Limia de Sandiás, que sabemos que nos últimos tempos está invadido polos visóns americanos (Neovison vison).

Este exemplar foi visto o pasado día 27 de decembro de 2009, aparentemente entrando na toqueira, da que saiu apenas uns minutos máis tarde.

Curuxa das xunqueiras en Vilar de Santos.

A curuxa das xunqueiras (Asio flammeus) é unha especie de ave rapaz nocturna invernante en escaso número na provincia de ourense, confésovos que é unha especie á que lle tiña moitas ganas.

Este exemplar, que se observa a moita distancia, foi localizado a noitiña do día 26 de decembro de 2009, na chaira agrícola de Vilar de Santos, non moi lonxe do pobo das Casas da Veiga, o particular do caso é que a curuxa en cuestión está pousada nun cable eléctrico no que tamén estaba pousado un pequeno bando de estorniños.

Aparentemente a curuxa parecía estar agardando os posibles roedores que puideran sair da granxa que está xusto diante do tecido eléctrico e que nese momento tiña a porta aberta.

Sei que a imaxe non é nada boa, meramente testimonial, agardo nos próximos meses poder ofrecervos algún material mellor.

Escribideira amarela en Sandiás.

Como xa se comentou nun post anterior, nos últimos tempos aumentaron considerablemente as densidades das especies integrantes do xénero Emberiza na Limia.

Unha das especies detectadas foi a escribideira amarela (Emberiza citrinella), especie da que foi detectado un pequeno bando na canle de Antela, ao seu paso polas areeiras da Limia o día 27 de decembro de 2009.

Chorolitos doudados en Vilar de Santos.

Existe unha zona do concello de Vilar de Santos, situada entre a capital municipal e a Canle de Antela, composta por parcelas asulagadizas, que supón unha importante área de repouso e alimentación para os chorolitos dourados (Pluvialis apricaria), nesa área contáronse o pasado día 26 de decembro de 2009 un total de 164 exemplares.

Chorolitos é o nome co que nalgúns puntos da Bisbarra da Limia coñecen a esta especie, que noutros puntos denominan píldoras.

Os chorolitos dourados son unha especie limícola frecuente como invernante nas chairas de labradío da bisbarra da Limia.

Picaxuncos en Vilar de Santos.

No mesmo cerre da casa de Vilar de Santos frecuentada polas cotovías cristadas, foi localizado o día 25 de decembro de 2009 este exemplar de picaxuncos (Cisticola juncidis), sen dúbida un lugar curioso para esta especie.

Cotovía cristada en Vilar de Santos.

A cotovía cristada (Galerida cristata) é un parente das lavercas (Alauda arvensis), relativamente frecuente nas áreas agrícolas da provincia.

Dun tempo a esta parte veño observando como dous exemplares desta especie frecuentan as cunetas dunha estrada de Vilar de Santos, a estrada está rodeada de terras de cultivo e praderías, a carón deste mosaico hai unha casa co seu correspondente muro de pedra, que as cotovías usan como pousadoiro habitual, por exemplo cando algo as asusta, como o tráfico.

Escribideira riscada en Vilar de Santos.

Nestes días de Nadal, apreciouse un considerable aumento na chaira Limiá, das diferentes especies integrantes do xénero Emberiza, coñecidas localmente co nome de escribideiras.

Nestas imaxes, obtidas no concello de Vilar de Santos o día 25 de decembro de 2009, podedes apreciar parte dos integrantes dun bando de escribideira riscada (Emberiza cia), localizado nos límites dunha carballeira, unha estrada e diversas terras de cultivo.