Svigermors drøm;)

Eg må vise fram det nyaste tilskotet i familien! Medan eg var i Trondheim forrige helg, kom Musikanten heim ein tur, og for fyrste gong hadde han med seg Julia. Heldigvis var dei her eit par dagar etter at eg kom heim også! Eg har ikkje heilt tenkt å titulere meg som svigermor, men det nærmar seg vel definisjonen?? Hmm, eg syns det høyrest gammalt ut.... Men samtidig er det heilt ok å vere svigermor til ei så søt jente! Perfekt:) Her er nokre bilete frå Lundeura på Runde, der gjengen fekk sjå store mengder lundefugl på veg inn for natta.

Eg har ikkje vist bilete frå helga før heller, det har ikkje vore tid til å styre så mykje med blogging. Men her kjem eit utsnitt av ei fin helg på Skei, inkludert besøk i Fjærland. Kan absolutt anbefalast! Det var koseleg å vandre i bokbyen Fjærland, der det er antikvariat i annakvart hus:)

Idyll på badestranda:)

Vi treng heldigvis ikkje å bade for å nyte badestranda...

Når 1.mai stiller med strålande sol, er det lett å glede seg. Gubben tok med seg randonne-skia og gjekk på Kolåstinden, det vil seie skikkeleg fjelltur!

Vi andre fekk jordbærplantene på plass i den nye jordbæråkeren vår, og kosa oss med lyden av over 100 tunge motorsyklar som passerte på veg mot AmCar-treff i Herøy. Det er fast tradisjon, og vi har god utsikt mot vegen der dei fleste tilreisande kjem køyrande. Morsomt å følge med når ferjekøa passerer, for då kan vi nyte ei lang rekke gamle, sære, rare, dyre eller stygge bilar, og så kan jentene telle motorsyklar:)

Etter oppsummeringa av motorsyklar tok vi ein tur innom kiosken, kjøpte softis og dro til Overåsanden. Nydeleg!! Flaks at vi traff eit par barnehageveninner av minstemor, så dei leika lenge!

Skogstur med grilling!

Stormen Dagmar tok ansvar for ein del "skogrydding" i jula. Det vart ein god del arbeid til gubben og svogeren vår, i skogen som høyrer til garden. Dei har vore der mange laurdagar, og i dag tok vi ein heil storfamiliepiknikk der:) Det har jo kome ein heil del snø dei siste par dagane, og det var tildels fint ver i dag. Nokre snøbyger har det jo vore, men det var kjempekoseleg i skogkanten!

Vi hadde med oss appelsiner og Kvikk Lunsj, grillpølser og marsmallows, vi kokte kaffe på bålet, og minstejenta som var med, eit tantebarn på 2, sov ei økt under granene. Ho hadde det ganske fint, på liggeunderlag og med teppe over seg:) Nesten så ein skulle ha prøvd sjølv!

I dag var vi: mormora og morfaren, tre store døtre, to ektemenn, og 5 born i alderen 2 til 21... Rett nok hadde vi lånt ei jente, men ho passa fint inn i flokken.
Jammen er det fint å vere heime i påskeferien!

Rask visitt i Oslo

Eg har vore ein rask tur til Oslo sist veke. Flaks å bli beden om å reise på konferanse i Tigerstaden, så eg kan kombinere med besøk:)

Eg overnatta hos ei venninne frå gamle dagar, det var skikkelig stas å få tyte nokre timar! Og så besøkte eg Musikanten i kollektivet hans før eg reiste heim om kvelden. Det var imponerende å sjå og smake kva den eine karen i kollektivet laga til middag. Nydelig godt, rett og slett! Store mengder grønsaker, scampi, svinekjøt, saus og krydder, til saman ein fantastisk wok-rett. Eg kunne gjerne hatt denne herren buande her i ei veke eller to:)
Det er ikkje kvar dag det er fint ver her på Sunnmøre, så eg må syte for å dokumentere at det skjer av og til...

Hagegjest

Denne vesle karen flytta inn i hagen vår i romjula. Han gjorde nok ei rask vurdering av fordelar og ulemper: Kaninbur gir tilgang til litt mat som kaninene ikkje gjer kål på. Katt i huset er ein viss risiko. Men her vart fordelane vurdert som større enn ulempene.

Tabbe.

Katten var godt fornøgd då eg såg han med fuglemiddag... Fuglen var ikkje så livlig lenger, for å seie det slik;)

Ommøblert leikeområde. Takk, Dagmar:(

Dagmar rota både her og der. På skulen har vi ein liten skog, som er flott å leike i for borna. No var den kraftig ommøblert...

Ingen av trea hadde ramla inn over leikeapparata, men det var ganske nær. Og nokre tre hadde velta, men ikkje ramla heilt i bakken. Typisk utrygt. Heldigvis var det folk på plass i dag og rydda opp. Då er det ok å sende borna ut og leike igjen:)

Advent alt no?

Det er visst nokre dagar sidan sist eg hadde tid til å blogge noko... Ikkje bra! Men eg er jo her, det er berre den daglege drifta som tek litt meir oppmerksomheit. I går var det fyrste søndag i advent, og vi tende sjølvsagt eit lys i staken. Det har vore godt innever denne helga, så vi har kosa oss maksimalt inne;) Stormen Berit var på besøk fredag, og ruska litt opp rundt oss, men vi slapp vel greitt unna her.
Det einaste fanteriet ho ordna, var ei diger bjørk som knakk i vindkasta. Det høyrest imponerende ut, men bjørka var gammal og rotna, så Berit måtte ikkje jobbe altfor hardt for å få den ned.... Men eg må innrømme at det er greitt å sleppe damene til med trefelling av og til. Denne bjørka stod nemlig slik plassert at det var litt skepsis til å felle den utan profesjonell hjelp. Den la seg i retning straumledningane, og det er litt kjedeleg å la treet røske med seg ledningar i fallet. Heldigvis var Berit ei oppegående dame, så ho la treet ned den vegen det var fri bane. Gubben min kommenterte at det der hadde ikkje han klart, om han så hadde to traktorar!

Sidan vi bur på ei øy, er vi avhengige av ferje eller hurtigbåt om vi skal til Ålesund og den retninga. Ferja går nesten uansett, men av og til må båten legge til kai og vente på at vinden skal roe seg. Fredag ettermiddag vurderte nok mannskapet ombord at det skulle gå bra enda ein tur. Men det var Berit uenig i!
Dette biletet har eg henta frå VG, for eg var ikkje ombord i båten.... Det var sikkert litt spennande då ei bølge slo inn døra i fronten av båten. Vatnet kom visst inn i ganske store mengder, men ingen vart skada. Så då er det sikkert ok;)

Nydeleg haust!

Det er nesten ikkje til å tru, men det er fantastisk ver for tida! No er det slik vi drøymer om, litt kaldt, men klart og fint. Det er nydelege fargar å sjå både om morgonen og om kvelden, og vi hugsar godt korleis det kan vere... I fjor var det kjempekaldt i november, og snøen kom tidleg. Eg håper det ikkje vert ein like lang og kald vinter som vi har hatt dei siste to åra.

Vi har kanskje fortent å få ein mildare vinter i år? Men eg kan jo alltids strikke meir varme klede....

Skogens gull:)

Eg er så heldig at eg har ein svoger som har fått dilla på soppturar:) I dag vart vi med, og gjett om det vart storfangst! Vi var jo mange hender som plukka, men minstemor var vel ikkje heilt å stole på. Eg plukka ut att eit par som heilt garantert hadde gitt oss mageproblem, og kanskje meir på kjøpet....
På førehand sa eg at korga mi var altfor stor.... Men det vart nesten fullt! Svoger T og systra mi hadde like mykje med seg heim:) Eg har aldri før plukka sopp på skikkeleg, men dette kjem eg til å prøve igjen! Men det tek ganske mykje tid å rense og forvelle så store mengder kantarell.... Veret var fint då vi gjekk, men det regna skikkeleg på slutten. Neste gong skal det vere godt ver heile tida, og vi skal rense meir undervegs. Trur eg.Det eg har på bordet, er berre vel halvparten! Korga er framleis ikkje tom på dette biletet.

Kveldsmaten i dag vart brød med smør og steikt kantarell. Nydeleg!!

Runde

Vi har hatt ein fin tur til fugleøya Runde for nokre dagar sidan, eg har berre ikkje kome på å fortelle om det. Det er ei lita perle, flott natur å sjå på, og ikkje så krevende terreng for små bein. Sjølvsagt er det fullt mogleg å gjere turen både lenger og brattare enn det vi valde. Men vi hadde med stormkjøkenet og laga middagen vår i ei skråning der vi kom i ly for vinden.

For å sjå mest mogleg fugl, er det smart å vere på plass om kvelden når fuglane kjem inn att frå havet. Då er det masse liv og røre, og på fine sommarkveldar er det visst mange som sit stille og ventar på fuglane.

Det vart meir og meir vind i løpet av dagen, og på nedturen fann eg ikkje att buffen (lua) til minstemor. Eg hadde ikkje med fleire luer, men ein ekstra genser til storesystra. Den fekk eg knyte på minstemor omtrent som eit skaut. Fungerte kjempebra:) Men minstemor var ikkje heilt begeistra. Ho sette trutmunn og forkynte: Det ser tåpelig ut!

Likevel: Varmen gjorde at gensarskautet fekk vere på.

Nokon har gode kontakter:)

I år har vi hatt ein mildt sagt elendig sommar så langt. Det har jo for så vidt vore mykje væte i austlege strøk av landet også, så vi skal ikkje klage. Men eg kan jo nemne skodda utan å klage altfor mykje;) Det er berre noko litt tungt over hovudet, som tek vekk alt av sol og det meste av omverda...

Men i dag har vi hatt perfekt sommar! Ein heil dag, faktisk:) Og den brukte vi til å ha avslutningssamling for 2.klassene ved Nesset-elva. Der finn vi ei lita strand, ei opning i skogen og ein flott bålplass. Litt over 30 2.klassingar tok med seg foreldre, sysken og litt besteforeldre og hadde eit par herlege timar ilag. Vi droppa middagen heime og grilla istaden. Mange av borna bada, mine fekk berre lov til å vasse. Fæl mamma, eg veit det... Men det er ikkje akkurat nokon stor varme i vatnet, eg tippar at snittet har vore 12 grader her den siste månaden!

Enda godt at vi kan vere heldige og treffe så godt på den eine dagen med skikkeleg varme og fint ver. I morgon er det visst slutt. Og neste veke truar dei med fare for snøbyger! Passe til jonsok, det.

Vakre Ålesund

Ålesund er Byen. Ikkje fordi det ikkje fins andre byar omkring oss, men fordi Ålesund alltid har vore Byen vi har forhalde oss til. Om vi skal på skikkeleg shopping, er det Ålesund som er hyggelegast. Og dersom vi tek turen til kjøpesenteret Moa, er det ein eigen liten by, om ikkje såååå hyggeleg. Der er det meir praktisk;)

Men sjå kor vakker byen er!

Dersom du har lyst til å sjå meir om bakgrunnen for at Ålesund vart ein vakker Jugendstil-by, kan du stikke innom Jugendstilsenteret.
Jugendstilsenteret er plassert i det gamle apoteket, ei staseleg bygning!

Har du ikkje besøkt Ålesund før? Kanskje du må prøve:)

Gjett om det er fortent!

Endeleg kom sola til oss også:) I går og i dag har vi hatt nokså nær sommar på Sunnmøre. Litt fascinerende at det gjekk nesten over natta frå ullundertøy til korte skjørt. Men det er ikkje oss imot!

I går var gubben på Kolåstinden, ein fantastisk tur på nye ski. Og vi andre kosa oss i lavlandet, mellom anna på rulleskøyter. Mamma inviterte alle dei fire døtrene sine med familier til middag, og vi kosa oss stort i sola både før og etter.

 

I dag har vi besøkt Ålesund. Vi gjekk opp til Fjellstua og kjøpte is:) Det fortener vi vel etter 418 trappetrinn opp? Og like mange ned igjen.... Ein nydeleg dag å surre rundt og leike turist på.

I ettermiddag kom utemøblane ned frå garasjeloftet, og vi er nesten solbrende. Nydeleg følelse;)

Perfekt!

Dette var ei perfekt helg:) Vi kosa oss på hotell med leiligheit, og hadde ein god kombinasjon av sjølvstyre og hotell-liv. Innebaka i weekendpakken var det frukost på hotellet, og minstemor fekk springe i korridorane med stor iver. Ho skrudde på sjarmen, klatra opp på ein barkrakk og spurde høfleg om å få isbitar. Det fekk ho sjølvsagt, ingen kan vel seie nei til så søte ynskje... Og så strena ho til romet og fekk fylt opp glaset med cola. God økonomi;)
Laurdagen baud på strålande sol, og Prinsessa fekk herje i bakken ilag med pappaen. Eg og minstemor gjekk ein bitteliten tur på langrennski, og la inn pause i Vetlegrenda. Laurdag ettermiddag var vi på omvisning inne i Bjorli snøhotell. Der er det mogleg å overnatte, for den som ynskjer det, og roma er opplyste med led-lys i ulike fargar. Ok, ein kald fornøyelse er det sikkert, innetemperaturen ligg jamnt på minus 4. Men dei stiller med tjukke madrasser og ekstremsoveposar til gjestane.

I tillegg til soverom er det kapell og bar i snøhotellet, og denne sesongen har dei fleire barnedåpar og bryllup. Kanskje er det ikkje plass til 150 gjestar i kapellet, men tenk så stilig å ha ei slik ramme rundt den store dagen! Eg reknar med at middagen vert servert i varmare strøk;)

Bjorli er snøsikkert, og snø er vakkert!

Det er vakkert med sol:)

 

I forrige innlegg ville eg skru ned solstyrken, men no kan eg vise fram kor vakkert det er her når det er sol og snø. Desse bileta tok eg søndag ettermiddag, men det var minst like fint i dag!

 

Ingen stad er som heime! Og no har sola kome så høgt på himmelen at ho klarer å rulle seg over kanten på Melshornet, så vi har sol i og på huset stort sett heile dagen. Då vert det i alle fall godt oppvarma på dagtid. Det kjem godt med, for om natta er det frykteleg kaldt. Men vi har god ved enno;)

Takk for ei flott helg:)

Sidan det er morsdag, kan eg sende ei takk til mamma:) Og for så vidt til pappa også, sidan dei tok ansvaret for våre to prinsesser så vi foreldra fekk stikke av og få med oss konserten til Musikanten. Han er med i TenSing Norway i år, og Florø var den næraste konserten dei skulle ha på sine turnear i innland og utland.

Vintertreff er ei årviss storhending i Møre og Romsdal, eg var med på mange i mine glansdagar. Alle TenSing-arar har sikkert vore med på eit eller fleire vintertreff. Sogn og Fjordane og Møre og Romsdal slo seg saman i år, og det trur eg var ein suksess. Litt langt å køyre for oss, men det skadar ikkje når ein har gode besteforeldre som stiller som barnevakt:)

Konserten var gnistrande flott, med mykje bra musikk. Musikanten min spelte slagverk og trompet, han song solo og i koret, og så var alle med på danseinnslag. Alle deltakarane på Ten Sing Norway er dyktige, og alle ser ut til å ha sjølvtillit nok til å stå på ei scene og vise seg fram. Det er jammen ingen dårleg eigenskap å ta med seg i livet.

Dei unge som reiser på vintertreff, må bu på flatseng på skule. Heldigvis er vi gamle nok til å kunne velge annleis;) Og vi hadde sjølvsagt ikkje noko ansvar for deltakarane som var med. Dermed kunne vi overnatte på hotell, det likar eg!


Det vart eit strålande ver laurdag, og vi fekk spasert ei runde i byen. Eg har aldri vore i Florø før, men eg kjem gjerne tilbake. Det ser ut til å vere ein sjarmerande by!
Det er store skilnadar i landet vårt. Heime på sunnmøre har vi nokre cm snø, i Florø var det ikkje ei snøfille å sjå nokon stad. Men på vegen til Florø passerte vi meterhøge brøytekantar både her og der. Vi vart sitande i stor fascinasjon og sjå på målaran i bilen då vi køyrde heimover. Ved Jølstervatnet var det 20 minusgrader, og det er ikkje ofte eg ser slike tal! Vakkert var det også! Sjølvsagt måtte eg innom nokre få butikkar i Florø. Det var ikkje mogleg å gå frå desse to. Eg har ikkje sett dette garnet før, og det ropte på meg;)
I dag var gubben på dugnad i huset til systra mi. Så eg tok med meg jentene til Leikeland i Ålesund. Med strikkepinnane på plass, te og cookie. Det er lett å kose seg når borna hyler av fryd.

På kalde dagar treng ein varme!

Det har vore ein nydeleg dag i dag! Strålande sol, 4-5 minusgrader, snøen dekker akkurat bakken. Eg såg born og vaksne leike på isen på Grimstadvatnet i dag, kanskje må vi gå ein tur dit i morgon?
Minstemor har fått seg ny lue, strikka i Frøyagarn til Frøya. Oppskrift er oppskrytt. Eg strikka etter innfallsmetoden;)

Men på dette prosjektet brukte eg oppskrift:
Du kan finne oppskrifta her, hos Strikkespinn. Eg hadde ikkje Sulka, og brukte dobbel Alfa. Det vart nok ikkje på langt nær så mjukt som det kunne ha blitt. Men eg strikka den to gongar, og det hjelpte.... Fyrste gong brukte eg pinne 9, men det vart for fast. Så då rekte eg opp att og brukte pinne 12. Det er nokså nær kosteskaft!