...for nå er det endelig jul

No er det snart leggetid i heimen, for elles klarer eg ikkje å stå opp i morgon;) Men det er så deilig at eg er klar til jul! Huset er reint, karamellpuddingen er nettopp ferdig, mat i store mengder er på plass, både i frysar, kjøleskap og kjøkenskap elles. Og i dag har vi pynta huset og treet, så no kan jula berre kome.

I dag har vi feira farmor/oldemor som fyller 97 år, og det er heilt standard tradisjon at det skal feirast sjølv om det er mykje anna som skal ordnast i desse dagar. Eg dristar meg til å legge ut bilete av henne, ho er verdas beste farmor:) Og så bur ho heime saman med farfar (94 år) enno!

No går det fort mot slutten av den fantastiske adventskalenderen frå Brit. Og så har eg ikkje vist fram dei siste pakkane etterkvart. Rart det der, det skjer litt anna også av og til...

Her er papirstjerner og nostalgisk fyrstikkøske frå 21.desember

Og 22.desember fekk eg bok til å notere lure tips til meg sjølv for neste jul, og eit griseflax-lodd. Dessverre ikkje gevinst på loddet;) Innerst i pakken var det også peppermyntestenger!

23.desember: Ein nydeleg engel til å henge på treet, og ein sjarmerande nisse, som også fekk plass i juletreet. Det er så fint med juletre, det er rom for alle der! Alle skal få bli med i mitt tre:)

Sidan det no er over midnatt, og truleg lite tid til å blogge om kalendergåver i morgon, viser eg fram kva eg fann i den aller siste kalenderpakken min. Og Brit held fram med å imponere!
Ein glas-engel til å henge på juletreet, den er rett og slett vakker.

Og sjå her: To nøster Noro Kueryon, som eg diggar! Eg har tidlegare strikka og tova ei hue, og strikka ein gensar til prinsessa i dette garnet. Men eg trur kanskje eg skal følge Brit sitt forslag om tova vottar av desse to. Det må bli bra! Fargane er herlege:)
Kva står att då?

Jau, å ynskje alle som kjem innom ei god og fredfull jul!

Eg kjem nok tilbake med meir etterkvart, men sidan vi skal ha gjestar i morgon, reknar eg med at eg ikkje kan sette meg ned med pc-en og vere usosial...

Kos deg der du er!!

Ei lue til;)

No er nr 10 på 10 veker ferdig:)

Eg ser at det blir fleire, for eg har ei på pinnane no, samtidig som ein kollega la inn ei bestilling på ei i dag... Denne sukkersøte rosa er faktisk ikkje til ei av jentene mine, men til ei vaksen dame som likar fargar. Eg sende denne og den grøne frå tidlegare i desember heim med barnehagejenta hennar i dag, og etter litt prøving enda ho med å kjøpe denne rosa. Og så kom det tikkande ei melding til: "Eg tek den grøne også." Den skulle vere ei gåve:)

Også i dag fekk eg pakke i adventskalendaren, og i dag fekk eg pynt som kan brukast på pakkar, og tre småsjokoladar. Pynten enda på kjøleskapsdøra, for det syns Gullungen var ein fin plass. Passar veldig godt der, eg må innrømme det!


Elles er det no ein dag igjen på jobb før eg kan ta juleferie. Eg kryssar fingrar og tær i eit håp om at vi ikkje skal bli sjuke. Høyr på dette: I dag var eg vikar for 2b. Der er det vanlegvis 18 elevar. I dag hadde vi 7 (sju, ja) elevar. 2a hadde 10 av 17. Det var i desse klassene det var verst, men eg trur at det må ha vore godt over 50 elevar borte frå skulen i dag, noko som inneber minst 25% fråvere. På ein naboskule var det ca 50% fråvere i dag.
Eg høyrer snakk om oppkast og feber, og VIL IKKJE ha denslags i hus. Prinsessa mi var ei av 10 elevar som var på plass i 2a. Hjelp meg med å krysse fingrane!!

No vart eg imponert!

Eg blir så imponert over gåvene eg får frå Brit! I dag fekk eg ein cd som ho sjølv har vore med på å spele inn. Sidan ho kjem frå Frøya, og vi har ei jente som heiter Frøya, vart det ei jente som var ekstra oppmerksom då vi opna pakken:) CD-en er ein del av eit prosjekt for å bevare Sauøya i Froan som eit levande samfunn, og bevaring av Froan kapell. Eg ser at Brit er ein av eldsjelene bak Kulturstiftelsen Sauøya. Eg er rett og slett storleg imponert, og skal høyre meir på cd-en i ro og fred. Nydeleg!

Og som om det ikkje var nok å sende meg ein CD, så fylgde det jammen med ein nydeleg liten julepynt-engel også. Dette er fantastisk:) Tusen takk, Brit! Eg skal ta med meg familien og besøke Frøya ein gong, og då skal eg sjekke opp Sauøya også:)

Driving home for Christmas

Det er ikkje eg som er på veg heim, men Musikanten:) Han sit no på nattbussen, og i morgon formiddag (dvs om nokre få timar...) er han heime på juleferie!

Vi har to dagar att på skulen, så har vi ferie der også. Nokre fordelar skal ein ha, når ein har 80% stilling på ein skule;) Litt avspasering, nokre feriedagar, og vips: Ein herleg lang ferie.
På skulen har vi også hatt adventskalender, og eg var så heldig å få denne pakken du ser under her.

Hekla stjerner og hjerte, godt stiva og faktisk limte saman. Om du vil ha slike utan å hekle, går det an å finne dei på Kid:) Eg syns dei er nydelege!

I adventskalenderen frå Brit finn eg også mange flotte gåver. Her er pakke nr. 16, to nøste pt2 og oppskrift på strikka julekuler:)
Pakke nr 17 inneheldt ei kjempesøt nålepute, og ei oppskrift på korleis eg kan lage slike. I tillegg fekk eg også ein pakke synåler, det matchar jo bra til nåleputa!
Og her er pakke nr 18. Oppskrift på ei fristande adventskringle, og ein pakke serviettar. Kjekt å ha:) I dag har eg handla litt blomster, to julestjerner og ein amaryllis. Det høyrer sjølvsagt med! Eg må ha raude blomster til jul, elles er det noko vesentleg som manglar.

15.desember

Det er kort tid att til jul! I dag hadde vi juleavslutning for 2.klassene ved skulen, og Prinsessa mi var ein av mange søte og sjarmerande englar/Lucia-er. Klassene samarbeidde flott og hadde eit fint program, og etter songen fekk vi gløgg og peparkaker, og laga rekordlang julelenke. Du kan sjå litt av den i hendene til Prinsessa og venninna hennar, og på veggen bak er litt til hengt opp. Det vart fleire runder på veggane;)

Elles er det framleis nokre dagar att til det er tomt i korga med adventskalenderpakkar frå Briti. Eg gler meg kvar dag:) I dag fann eg ein snømann-klut:) Og garn, oppskrift og ei oppfordring om at strikke ein klut sjølv også! Jammen fekk eg ei søt lita såpe også. Det er ikkje ende på godsakene!

I dag har eg forresten blitt omvendt. Eg fekk passe tantebarnet på 1 år ( i dag, hurra for deg!) nokre timar, og då ho skulle sove, var det greitt å ta ein ørliten tur med vogna. Reint bortsett frå at det er glasert ute i dag, vegane er stort sett dekte av is, med regnvatn på toppen. Det fins ikkje noko glattare her i verda! Mormora sine broddar låg ved sida av vogna, og eg kom til at det var verdt eit forsøk. Ok, eg er ikkje 40 enno, og det er litt gamledamefaktor over broddar på glatt føre... Men hjelpe meg, eg er overbevist!
Det var ei fantastisk oppleving å gå trygt og relativt kjapt, sjølv om vegen var godt egna til beinbrot. Så no er det nye på ønskelista mi BRODDAR! Desse var ikkje så store at det var dumt å gå med dei, berre som piggar i piggdekka. Det er jo det vi treng;)

Eg måtte jo le litt då eg las at systra mi reknar med å ikkje få bilen opp på vegen igjen, etter å ha sklidd heile vegen ned vegen til huset. Det seier litt om kor glatt det har vore i dag!

Men no snør det, og det skal bli kaldt i løpet av kort tid:)

Dagens adventspakke

Sjå kor flott! Gryteklut til julebaksten, oppskrift på doble gryteklutar og garn til å strikke sjølv. Kan ikkje bli betre!

Det tetnar visst til her

Programmet er tett, og eg strikkar sokkar når eg har eit ledig 5-minutt... Skal strikke til ei svigerinne og ein svoger, og vi skal på besøk til dei i helga og bytte gåver. Då bør alle gåvene vere ferdige!


Eg er mållaus over gåvene eg får i adventskalendaren min. I går fekk eg ei skikkeleg søt Tilda kakeboks, som gjerne kan innehalde julekaker;)

I dag fekk eg ei Tilda metalløskje, som kan vere eit pennal, eit mini-syskrin, eller noko heilt anna. Alle mor sine hemmelege saker...

Helg igjen:)

Jepp. Det er snart 3.søndag i advent, og vi har hatt ein fin laurdag. I går vart kvelden brukt til julebord for gubben, og eg laga småkaker og denslags. I dag vart det "fredagsvask" på ein laurdag, og så feira vi yngste tantebarnet som straks fyller 1 år. Ho er sååå sjarmerande, og ho veit det;) I dag hadde ho fleire glansnummer som vakte latter og begeistring i tante/besteforeldreflokken. Mellom anna når ho ynskjer oppmerksomheit, og tek til å krype i sirkel på golvet, omtrent som ein hund som jaktar på halen sin.... Eller blikket når ho får på seg dokka si lue, og veit at dette var morsomt for nokre minutt sidan. Ho strålar og gliser, og gjer eit lite kast med hovudet. Suksess;)
Ho har ei stor svakheit for hår, særleg mora sitt, sjølvsagt. Men også Gullungen min har hår som er kjekt å kose med.
Adventskalendaren min er framleis spennande kvar dag:) I går fekk eg eit oppskriftshefte med juleoppskrifter. Mykje fint der!


Og i dag fekk eg ei familieoppskrift på kvite kakemenn, vi kallar det julemanna her. Eg ser at oppskrifta er litt annleis enn den eg har brukt, kanskje verdt eit forsøk:) I pakken fekk eg også ei hjarteform, ei boks hjortetakksalt og tre smånissar av sjokolade. Nam!

Gåvedryss:)

Eg likar pakkar! No får eg pakke kvar dag, frå Brit sin fantastiske adventskalender, og i dag fekk eg enda ein pakke! Totalt utan hint, så det blir vanskeleg å sende takk i rett retning enno. Men eg går ut frå at dette er frå min hemmelege venn i julerunda på Hobbyboden. Eg forstår logikken i at denne pakken ikkje kunne pakkast inn som ei julegåve, for den inneheldt ein adventskalendar;) Dei fungerer best før jul! I tilegg fekk eg deilig garn, som to jenter nesten var klar til å adoptere straks. To nøste Kid-Silk og to nøste alpakka, i ein ganske sterk rosafarge. Ei oppskrift på ei lue fulgte også med. Så no har eg alle sjansar til å strikke lue nr 10!

I adventskalenderpakken merka med nr 8, fann eg deilig julete, med spennende kryddersmak.

I pakke nr 9 fekk eg meir garn:) Me like! Fire nøste Østlandsgarn i to ulike lillafargar, med forslag om at dette kunne bli vottar i adventsfargar. Det er eit godt forslag!

Ånei.... Knust gåve!

Så kjedeleg! Eg har fått ein flott, stor kopp, med oppfordring om å ta nokre pausar i adventstida. Og eg ser at koppen er fin til gode pausar. Men eg trur ikkje den klarer å halde på noko som helst lenger. Ein eller annan gong i løpet av prosessen og vegen frå Briti til meg, har koppen blitt knust. Og det er godt gjort, for Briti var flink med innpakkinga!

No kan det sjølvsagt hende at nokon av dei eg bur saman med har vore litt for nysgjerrige, slik at pakken kan ha ramla i golvet eller noko slikt.

Uansett: Eg skal ta vare på tanken, og ta ein god pause med ein annan kopp;)

Søtgrøtdag:)

Ser du ikkje på Jul på Månetoppen? I så fall går du glipp av litt av det beste med adventstida... Ikkje fordi akkurat denne serien er den beste som nokon gong er produsert, men fordi det er noko med konseptet adventskalender som høyrer med i tida før jul;)I dag er det altså søtgrøtdagen.

Det er like morsomt kvar dag, å leite etter rett pakke, og glede seg til å opne den. I dag fann eg den søtaste refleksen eg har sett! Denne skal eg ha på jakka mi, og så degraderer eg den refleksen eg har der frå før;)

Elles har eg strikka ei lue. Til.

Denne er kanskje til ei dame eg kjenner, mor til ei av minstejenta sine perlevener. Ho skal få lov til å vurdere den, i alle fall;)
Lua er strikka av Finull og Plumet, og er kraftig moderert i forhold til oppskrifta i eit hefte frå Rauma... Meir moderert enn eg hadde tenkt, men eg strikka feil, og så gjekk eg berre vidare med å strikke feil. Det kan bli bra likevel!
Dette er forresten lue nr 9, og alt eg lova var 10 luer på 10 veker... Eg har berre brukt vel 5 veker på dei 9, så eg har goooood tid på den siste:)

2.søndag i advent med den nydelegaste julesongen som fins

Eg er så glad i denne: Deilig er jorden, her med Sissel Kyrkjebø.
Det er kjekt å ha sin eigen adventskalender, og eg vert stadig mållaus over dei flotte pakkane eg får! I går fekk eg ein eplepyjamas;) Eller noko slikt. For berre eit par dagar sidan, prøvde eg å forklare til ein kollega korleis dette skulle fungere. Eg har aldri prøvd å strikke ein slik, men no slepp eg;) Og dessuten fekk eg oppskrifta om eg skulle få lyst på fleire!
I dag fekk eg oppskrifta på ei kake med krydder, og sjølvsagt sender Briti med krydder også;) I tillegg til ei lita sølvbjelle som kanskje kan henge på treet, eller halde på plass eit bordkort.

Eg har strikka ei lue til. Bombe! Denne er strikka i Sterk, eit mjukt og varmt garn. To rett og to vrang. Enkelt og greitt. Kanskje til ein mann??