Flaks eller uflaks?

Er du av dei som har halvtomt glas, eller er det halvfullt?
Du må gjerne hjelpe meg med å definere om eg hadde flaks eller uflaks i går.
Ein liten gut på skulen var saman med meg, i leikeaktivitet. Ikea-siteunderlag kan vere gode som frisbee, sidan dei er så runde og flate... Kva skjer? Har eg uflaks eller flaks når guten bommar på målet og treff meg istaden? Plata treff meg på auget, med stor kraft. Det gjekk så fort at eg ikkje rakk å reagere, det var berre eit par meter mellom oss. Likevel var auga igjen, refleksane slo kanskje inn?

Det var faktisk veldig vondt.... Og det var sårt mange timar etterpå også, eg trur auga rett og slett fekk ein ganske kraftig trøkk. Men i dag er det ikkje vondt:)

Så er spørsmålet: Er det flaks at eg ikkje fekk skader på auget, eller er det uflaks at eg vart treft? Heldig eller uheldig??

Elles er eg i sommarferiemodus. Fire arbeidsdagar etter juleferien... Men eg har veldig lyst til å bestille fly til Tyrkia i sommarferien, vi likar oss godt der! Minstemor er ikkje så ivrig, så eg må nok legge inn nokre etapper med positiv omtale som gjer badegleden større enn flyskrekken.

Og i sommar skal eg plukke med meg ein pose småsteinar frå stranda, for eg treng noko å legge i botnen av den nye lysvasen min:) Steinane på stranda var små, runde og glatte. Perfekt til eit slikt prosjekt.

Lys imot mørketida

No har eg kosa meg:) Og rota bittelitt...

Gjennom året vert det ganske mange restar av stearinlys, særleg når eg tek med dei som står litt for varmt i vinduskarmen og smeltar ut av fasong. I fjor hadde eg for fyrste gong eit forsøk på å støype lys. Det kan du lese om her.

I år var eg lur, og lånte ei stor panne som blir brukt til lysdypping på skulen. Eg lånte også med det karet stearinen er i, for då kunne eg smelte store mengder på ein gong. I fjor var det meir puslete, med hermetikkbokser som smeltekar.

I år har eg også besøkt Panduro og fått med meg fargestoff til lys. Så no har eg juleraude, mørkblå og lilla lys.
Det vart eit par Pringlesbokser i år også, men eg likte svært godt å støype i mjølkekartongar. Ypperleg!

Ei lita utfordring er det jo å vere tolmodig nok.... Når ein støyper lys i store former, vil stearinen ramle litt saman i midten under avkjøling. Då bør ein fylle på i mange omgangar, eller i det minste vere klar til å etterfylle krateret etter avkjøling. Det krev at du har litt ekstra stearin i rett farge, og tek deg bryderiet med å smelte dette igjen. Eg hadde ikkje tid til å gjere det med dei raude lysa, og dei er derfor litt pussige i fasongen. Men kva gjer vel det? Når eg tenner lysa, vil dei jo uansett lage god stemning i heimen:)

2.søndag i advent

Det lir og lakkar mot jul. I dag har vi tent to lys i adventsstaken, men eg brenn mange fleire rundt i stova elles.

Minstemor har vore sjuk i mange dagar, og no trudde vi at ho var frisk. Det vart kanskje ikkje heilt rett. I alle fall har ho vore i dårlegare form i dag, og vi droppa derfor ein adventsmarsj som skulle vere avslutning for turngruppa. Det vart sikkert ei fin stund for dei som gjekk. Dei skulle møtast kl 15.15, og då er det alt litt skumring. Borna og foreldra vart oppmoda om å ta med faklar eller lykter, og det var sikkert mørkt før dei kom heim.

Eg har laga litt meir julekaker i dag. Det vart kokostoppar og kransekakestenger. Det er gode greier:) Og begge deler er glutenfritt...

Eg har støypt lys i dag!

I dag vart vi heime, alle tre damene i huset. Gullungen hadde veldig vondt i magen i går kveld, og då begge sa dei hadde vondt i magen i dag tidleg, vart vi heime. Gullungen var tydeleg ikkje heilt i fasong i magen, men vi har hatt ein flott dag heime. Jentene har sett video, spelt dataspel, leika og slappa av. Mor har rydda litt, og støypt lys!

I snart eit år har eg hatt ei kasse på boda med lysestumpar i. I tillegg har eg hatt nokre passande beger til å støype lysa i.

Eg kunne nok ha laga ei bruksanvisning her, men eg trur eg heller legg ved link til den sida eg støtta meg til i prosessen. Denne oversikta er ryddig og grei. Dersom du søker litt på nettet finn du sikkert mange liknande sider:)


Eg hadde ikkje kjøpt fargestoff, så eg sorterte lysestumpane i ca like fargar, og smelta dei i kvar sine bokser. Best effekt syns eg at eg fekk med store hermetikkbokser i vannbadet, men eg brukte også store sylteglas. Eg lærte kjapt å sette formene i kaldt vatn før eg fylte på med varm lysmasse.... Det fyrste kom litt utover bordet:(
Formene er ei salig blanding, nokre Pringlespakkar, nokre plast ølglas, nokre litt for harde plast-kjeksbokser. Melkekartong fungerer sikkert perfekt.

Gjett om eg er fornøgd med lysa mine? Eg likar at dei har ulike fargar, og syns det er sjarmerande. Men neste gong skal eg sjå om eg klarer å leite opp ein butikk som sel fargestoff. Då er det enklare å putte alle restar i denn same gryta!




Den gode husmor har også laga grove knekkebrød. Oppskrifta har eg lagt ut før, du kan finne den her. Desse knekkebrøda er nydelige med smør og kvit ost!