1. Matod sa Tigsibya
Naghikog ang usa ka tiguwang-ulitawo,
47 anyos, human ang mga prutas ug pungpong
sa rosas nga iyang gidalit sa iyang gipanguyaban,
18 anyos, gibalibag ngadto
sa gikadenahang iro.
Napalgan ang biktima, nga nailhan lang sa ngalang
Cyrano, nga nagkwentas sa kadena sa iro human
iya kining gibuno ug nagbitay sa sanga
sa punoang mangga atbang sa bintana
sa lawak sa dalagita.
2. Matod sa Tsismosa
Pinaakan kuno’g lamok
kanang nagpuwa, mora’g bun-og,
sa liog ni Rosa
Tuo ka?
Tuk-on gyud tika kon
Magsaba ka sa atong silingan nga mubo
og lupad si Rosa.
3. Matod sa Magbabalak
sa pagtisok ko’g tsikinini
sa imong liog, namuwak
ang imong tingog
ang imong tabuntabon mga pako
sa kabakaba nga mitugdon
sa walog sa akong kahilom
hangtod ang imong gininhawa
gasanga-sanga gikan sa gamot
sa atong kalimot.
No comments:
Post a Comment