Matay pa, ibalibag nako,
iitsa sa bintana namo
ang korona ni Inday. Da, gapabug-at lang na.
Mora’g bukol makahasol sa iyang ulo
kon ganahan siya magsirko-sirko.
Ay, sus, kanang kapa.
Ambot la’g mapuslan ba
sa akong palangga? Tingali’g sidsid ana,
simbako, makapandol kon siya ganahan
maglaroy-laroy inig takdol sa buwan.
Ambi, kinsa’y way kangho
magpatanggong sa trono?
Unsaon na lang pagsuhid sa mga lawak
sa iyang laraw ug sa damba sa iyang damgo
nga labing habog itandi sa akong palasyo?
Hinuon, kanang baston
maayo pod iyang hiposon.
Dila ra gyod way labod, simbako, kon naa’y
magtinunto. Ay, mag-aninipot gyod akong mata
kon mokidhat ko sa lain, matay pa!
No comments:
Post a Comment