Click on a word to bring up parses, dictionary entries, and frequency statistics
[236]
Nam, si ita diceres, qui iuris consultus esset, esse eum
oratorem, itemque qui esset orator, iuris eundem esse consultum,
praeclaras duas artis constitueres atque inter se paris
et eiusdem socias dignitatis. Nunc vero iuris consultum
sine hac eloquentia, de qua quaerimus, fateris esse posse,
fuisseque plurimos; oratorem negas, nisi illam scientiam
adsumpserit, esse posse. Ita est tibi iuris consultus ipse per
se nihil nisi leguleius quidam cautus et acutus, praeco
actionum, cantor formularum, auceps syllabarum; sed quia
saepe utitur orator subsidio iuris in causis, idcirco istam
iuris scientiam eloquentiae tamquam ancillulam pedisequamque
adiunxisti.
M. Tulli Ciceronis Rhetorica. M. Tullius Cicero. A. S. Wilkins. 1902.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.