Masai: U duttore Dolores di Panza

Parlavamu di e malatie di civiltà, incù a mia amica Dolores. Dolores di Panza, ghjè medica.

Chjachjarendu, Dolores dicia chì segondu ella, mai ùn s’hè vistu tantu scartu trà i paesi ricchi è i paesi poveri. A palesa un datu di l’OMS, l’Organisazione Mundiale di a Salute. Ogni annu, si morenu ondeci milioni di criature di menu di cinque anni. Ondeci milioni. Novantanove per centu si morenu in i paesi di u Terzu è Quartu Mondu.  Si morenu di malatie tradiziunali, infeziose, ligate à u sottu-sviluppu. E malatie classiche è millenari ch’omu cunnosce. Sterpanu centu volti di più chè Ebola. Da l’altra banda, in i paesi ricchi -i paesi Occidentali-, si sparghjenu malatie nate da u nostru modu di campà : ubesità, diabettu, malatie cardio-vasculari, fatiche, melanculie, stress, caffè, pousse-caffè, l’addiction. Sò e malatie dette « di civiltà ». Occidentali. U Terzu è u Quartu Mondu ùn le cunnosce, civiltà cum’è a nostra ùn ne anu. Anu solu a miseria in u quale i mantenimu, fenduli travaglià per noi à strappa mercartu è in cundizioni disumane. Ch’elli si cuntentinu di a frebba gialla, a morte di fame è l’infezione generalizata.

Pè u duttore Dolores di Panza, in l’Umanu Occidentale, u cervellu hè u primu chì merzisce.

Mi cuntava chì, una volta, l’hè ghjuntu un giovanu, imbalsamatu. Si posa è li cappia :

- O duttò, quand’eo mi discetu a mane, sò persuasu d’esse un canistrellu…

• Chjucu è seccu ?
• Iè, propiu cusì.
• Ma…aspettate...umbule è salitu ?
• Eccu, umbule è salitu, eccu !
• Allora guardate, ùn site micca un canistrellu. Vuleriate esse un canistrellu, ma ùn site. Site un crakers belin.

Pene di civiltà, iè, chì nascenu da l’immateriale è finiscenu in u nunda, dice u duttore Dolores di Panza.

Ci hè da dumandassi s’ellu ci vole chì a nostra civiltà sia prupiamente u mudellu di u Terzu è di u Quartu Mondu.