政局與樓市

最近香港的政局以及樓市政策真係多新聞，先有政府出辣招一律15% DSD，然後有房署踼公屋富戶，然後最新鮮滖熱辣就係梁振英宣佈唔會競選連任下一屆特首，變幻莫測的政治環境對香港的樓市實在有重大的影響。


其實心水清的朋友都明白，梁振英連任的籌碼，樓市的升跌一定係佢的重中之重，所以佢不停吹噓今屆政府搞到幾多供應，而係之前佢不停出牌，包括要司法覆核咁多議員同埋打樓市，為的一定係為連任鋪路，以其無所不用其極的性格，連打公屋富戶呢招都出埋（但我欣賞呢招的），好明顯佢係一張一張牌咁出，志在連任。不過事與願違，紅燈係咪比左雙曾就唔知，但佢係一星期內突然比人KO，似乎北京都出招，陰謀論咁講應該捉到佢痛腳之類要佢自動投降，但莫論原因係乜，佢唔再玩連任的話，大家可以理解為佢應該失勢，而失勢的話呢家要做的就係唔好再得罪人，特別係唔好再搞事撩慶北京，否則佢下台後應該唔會好過。


如果你認同以上觀點的話，咁你可以諗呢段時間香港應該會比較風平浪靜，因為梁振英唔再搞事，咁樓市方面應該會繼續執行番現有的安排就算，即係話佢應該再無動機去加辣，但又唔會減辣，而公屋富戶呢下，佢洗濕左果頭應該會繼續，尤其是其實都唔洗佢做，執行上都係靠房署班人，又唔駛過立法會，但呢件事要去到出年十月先會實施，所以由呢一刻到出年，樓市應該都唔會見到再見重大的政策去再改變。


以目前的情況睇，呢家出完招樓市反而仲亢奮，因為好明顯個辣招的影響對於需求就無乜太大的影響，上車的繼續上車，投資的又可以親友去頂，BSD買家就更加唔怕你，打擊的需求好有限，但係係供應方面就大穫，所有有樓的人，尤其是有兩層或以上的全部都會企晒係度，因為你就算換貨都要15%，條數點計都唔通，所以基本上唔好話只睇樓市升，呢家係講緊只要樓市唔跌，自已財政狀況又唔太差的話，基本上就唔會想賣樓，二手供應其實接近乾涸，一手發展商見到所有客源都走去接貨，任mark價下，咁样的市唔升都難。


另一方面，政府打富戶政策其實又係另一個助燃劑，當然你可以諗話一出一入，即係唧一個富戶出黎，就入一個租戶，但首先個富戶本身其實如果有樓的話，佢好大機會放緊租，亦即係佢要收番層樓番黎唔續租，咁條街就點都多左一個租客，而租得私樓的租客理應比起輪侯冊的實力好好多，被唧出黎的優質租戶重反市場，去replace番可能住緊劏房的基層，明顯呢個動作對樓市的租金有正面影響。而如果富戶被踼出的條件係人工超標5倍但無樓的話，講真佢走入市場，唔係買樓都會租樓，咁高人工的家庭又係對租金有支持。


當然，有部份富戶係可能會選擇甩名或賣樓咁，甩名可能都係一個方法，但甩名唔代唔甩左名就無事，如果房署真係捉，咁你甩名又繼續住公屋就好大穫，所以有錢的仔女可能又係要到市場租樓買樓，但呢個Case仲仆街的係因為間公屋又無空番出黎比人住，樓市仲更加谷升。而如果富戶係選擇賣樓的話，當然我係房署一定會問你賣完樓舊錢去左邊，老實講你夠唔夠膽係政府打富戶的情況下，賣完樓將舊錢收埋咁明目張膽去剃眼眉？搏唔搏得過就睇你，但虛報資料係刑事，明明有樓乖乖地出去住就得但走去賣樓收埋舊錢搏拉，個值搏率咁低都做我就好懷疑有幾多人敢搏。


所以，以而家公屋富戶有2.6萬戶計，係咁易唧20-30%出黎都又係一大堆剛性需求，更大穫的係究竟呢家有幾多公屋戶其實係漏報同虛報緊呢，政府只要用公屋名冊去查冊一次就會一清二楚，實際的富戶數字會更多，而且會唔會有某D富戶可能因為谷住要搬走反而決定一家大細又買過層夠大的一家人住更加係未知之數 ，所以打公屋富戶呢件事真係對樓市有好正面的幫助。


呢家梁振英唔連任，好多人都認為唔會再打樓市所以加快入市，係各方面的推拉下，個人認為真係有樓的實在只需要坐係度等食就好了，2017年應該都係升，但呢一浪升幾多真係唔知，不過收住租等，休養生息，就係目前最好的樓市策略。