再見400萬

一早預言四百萬樓下的樓好快無晒，但急速的情況其實都有小小覺得恐怖，尤其是最近買入的一間樓，在兩個月之間其實叫價己經跳高10%，如果以呢種速度黎計，睇黎今年完結時可能就會出現屋苑再無400萬樓下的樓的情況 。

有唔同朋友問我關於將來的部署，特別係好幾位都諗緊將來有幾多幾多層樓等等，對於這些想法其實我實在無太大把握可以幫佢地計算都預期將來係點，主因係響現成的政策底下，買一層上車其實都叫做有數得計，但如果你要諗兩層甚至三四層，呢件事實在難過登天。試諗下就算一層樓首期50萬 ，一個後生仔可能都要儲五年先叫有機會儲到，到第二層比你要儲多樓價的四成，就算400萬都要160萬首期，即係可能要儲多十年或以上。十年後的樓價，如果唔跌的話，我好肯L定你160萬都唔夠比，咁你何來講第二層樓？收得皮啦。

不過睇番大環境其實真係無辦法，國內你話股市冧左，但有錢的人真係多到你唔信。我公司就比我發現有兩位大陸同事因為炒股執左500幻或以上，呢個係已經計埋冧市後的反應，所以最高峰的時間應該有執超過800甚至1000幻，但佢地人工可能只係我的一半。最慘係佢地每人仲要兩層樓，由於年紀大過我，樓亦早買過我，我都好可以估計佢地樓市都執超過4球走人(當每間執2球)。呢兩位同事只係大陸13億人入面的其中兩個中產，仲未計我又有另外兩位同事做私幫野又執左2000幻計，其實大陸的財富效應好明顯係令港樓唔跌的原因。

400幻可能對你係一個唔少的數目，甚至可能係成世人最大的單一數目，不過可以講的係而家400幻對於受惠於QE的人真係唔係好大。你可能會唔認同甚至覺得唔公平，點解做生做死都係搵果三兩幻左右，不過正正就係呢個問題，有人捉魚用魚網，有人捉魚用魚船，但你就用同样時間用魚絲吊魚，收穫唔同在所難免，而呢家個海仲多左好多魚，因此收穫的縣殊就更明顯，慢慢其實你有收入都會變成窮人，呢個就係QE下所造成的貧富縣殊現象。

不過就算隊長講到咁口響，我都好明白呢家買樓上車又的確係幾難過自已果關。睇住我自已以前二百幻買落的樓，呢家再買要接近四百幻，你問我我都買唔落，但無計，呢個世界就係咁，你唔買但都有人會買的話，就變成市價。下一步其實更京的係如果租金因為暑假再谷上去，咁樓價就更有支持。

400萬樓下的樓再見了。