不要讓500呎綁住你條春

曹SIR的一篇訪問，提出香港地產霸權令租金成本高，而年青人又好似以拥有一層樓為目標咁，係高成本下將會吸晒青春同收入，到供甩層樓時有經濟能力才創業已經四五十歲，所以要趁后生創業芸芸，理論上隊長係認同曹Sir的觀點的，不過實際上隊長如果有小朋友的話，就未必會叫佢咁大想頭了，做人有時都係要腳踏實地同面對現實好點。


其實隊長認為買樓為目標同創業未必係同一條線上，當然資金有限，係財務上就要取捨。之但係如果係邏輯上，買唔買樓為目標，以及創唔創業其實係無衝突，換句角度黎講有Ｄ人係可以唔買樓但亦唔創業，又或者又買樓又創業，所以個命題有多少mislead左話買樓就唔創業，呢一點係要修正番。


講到創業，作為一個中青我都曾經有個一團火同理想，不過呢Ｄ咁昂貴的野早就已經怕怕了。生活係一個現實世界，有Ｄ野就係咁現實，唔係下下都可以靠一人去改變。舉個例，你踼波好勁的諗住做職業球員，你入青訓然后入球會跟操，到最后可以踼十年職業，之后又點呢？只靠踼波係香港係唔可能發達，就係唔可能發達，你係場上幾Ｌ勁都無用。如果有條阿叔食住雪茄飲住紅酒同你講話叫你有理想，退休搞隊波搞個球會試下發展你的事業，你真係陪佢癲的話，我只能話你痴Ｌ左線而已。


創業的野第一样就係要有個Eco System係度，曹Sir都指出左呢家香港係無乜Angel Funds，咁無錢你又想創業已經係好鬼難，真係畢左業唔食唔養家咩，係香港呢D人點會得到尊重更加難搵女友(如果係男人)。講到錢，係香港比你申請學校果Ｄ咩創業基金，都係講緊十萬廿萬咁批比你，仲要已經好Ｌ叻。講真係香港十萬廿萬你估好多咩，如果有創過業的人都知，呢筆錢真係可以話同無無乜關係，只要你一講請人基本上就已經好快幫你燒乾晒。係香港就算有一球創業都唔係咩錢，所以無錢就即係無人，無人就無人材，下下靠年青人果團火自已慳住荷包行條創業路，仲要創業的第一年失敗率係高於90%，你同我講要有團火，但身邊Ｄ同學穏袋人工一年又一年，條路係極難行，甚至行唔到，到最后如果失敗左，咪又係嘥時間打番份工由頭黎過。


好多人又會將地產霸權同創業扯上關係，呢一下我係認同的，但同時係又不認同的。退后一步諗，其實所謂的租金唔一定係同地產商或業主有關喎，我假設呢家周生生同你一間車仔面都爭租我間鋪，周生生出100萬一個月，你出10萬一個月，咁我無理由租比你喎。當然你可以話周生生都係大財團地產商所支配，不過同時大地產商都係養住一班人，呢班人又唔一定係平人工喎，佢地仲可能係你的親友，可能係你老豆，一環扣一環，你Ｄ錢又有可能係靠大財團賺錢而出糧比你老豆養大你，好難說得清喎。但係所謂的地產霸權對我黎講，可能只係一個無實力同有實力的租客的競爭，爭輸左果個就以道德高地去批判有實力的財團大蝦細等等。但如果香港真係無大財團的話，反而我真係諗香港係咪已經變成一個三四線城市，到時仲慘。


香港開埠過百年，係香港創業，你無可避免要同所謂的既得利益者直接或間接競爭，而既得利益者的實力係咁多年已經係富甲一方，但同時佢地的存在亦肩負起個社會責任去制造就業，而就業就會變成消費力，有消費力你創業先有客去sell。如果你要求係無既得利益者的地方去創業，咁你可以試下去沙漠賣水，我保證果度無既得利益者，但你生唔生存到就睇你自已有無計吸到客去沙漠同你買水。


講左咁多廢話最重要帶出一個重點就係，你除非去一個無人的社會生存，否則就一定會面對左既得利益者的問題，包括你老豆老母，佢地出世做過你，理論上時機上佢地都比你多多，儲錢都比你多，問題只係你有無能力憑住你自已的能力去發展，然后超越前人。不過就係因為呢個不公平的競爭環境，你要讓一個大企業50年的時間去硬拼，老實講輸左都係理所當然。如果你要求社會優待創業，傾斜到可以每次都擊敗巨人的話，我都一样唔會叫你創業，因為比你遲創業的人都可以要求社會更傾斜的去擊敗你，變相呢個社會唔會有人做生意，咁社會又點會成功？


回到現實，唔好諗咁多天馬行空的可能性黎講，人工係高，租金係貴，對手係強，香港亦無Ecosystem，呢個局面係無得改變，所以理論上我都好想可以好似曹Sir咁叫你去創業，要自由要海濶天空，有無限可能，當然如果你係成功的幸運兒可能會多謝我鼓勵，不過其他眾多失敗而捐手爛腳重新出發的創業者，可能就唔係一件好事。所以隊長會話，如果我有小朋友，我一定唔會叫佢創業，因為做人有時都係面對現實D好，就正如果你日日都希望樓價大冧先買到樓，又或者等公屋，咁倒不如努力工作同儲錢，諗方法真真正正上車好過啦。



http://www.master-insight.com/content/article/4055