政府真係派錢

睇我個標題，先要澄清一點，就係政府唔係堅入錢入你個戶口或財政預算案會派錢，廢事D報警撚做野。我話政府真係派錢，其實係同上星期五出招有關。


其中一點係我上星篇文章無題及的，就係九成mortgage計劃的改動，呢次改動由600萬樓下的九成mortgage改到400萬樓下先有，而400-450萬的就只能有最多360萬mortgage，而壓力測試就會由+2%變成+3% (呢一下我都中伏，因為我仲未上晒會….shit)，但好明顯，政府又再一次將購買力推向細價樓。


當然，牌面上壓測會將一D邊緣的購買力推走，呢個係堅的。但市場上面充滿大大小小的投資者，呢家DSD又會係細價樓著數D的時間，我已經講過大魚會好有動力食魚毛的魚糧，亦即買大價樓的投資者會黎玩細價樓。原因無他的，好明顯政府將上車的門檻迫至200-400萬，但唔好忘記我地呢Ｄ醒字派的投資者，點會買入380-400萬的樓，因為呢堆野食左就會推上400萬後，就會少左下一批傻豬仔黎接貨（因為要80%上會了），所以，醒目的投資者一定會追逐300萬樓下的樓，因為呢Ｄ樓上望400萬有成百萬的水位，買左可以有50%的水位升幅，最值摶。


綜觀而家個市，我一直強調金獅同荃中仲有300萬樓下的野，我認為你呢家合埋眼求其買個270萬左右的野，6月前應該可突破300萬。即係話，呢家政府等同講明300萬樓下的野會遲早比人掃。你買到就即賺20-30萬，唔係派錢係咩？問題只係你識唔識執ga ja！


回顧番我個blog，由八月份開始我一直強調話要買細價樓，我自己就買左三個，我朋友就買左一個，普遍由8月份到呢家大約半年，有25%升幅，大幅跑嬴大市。可能你會話，嘩呢家真係升得好高好急，係應該回一下！但係傻豬的政府出招後將個市扭曲到不得了，呢家就好似慢法烹調咁慢慢煲熟個市，本來今年我覺得個樓價升幅好細，可能都係10%左右，但係政府一出招，我呢家夠膽誇下海口，今年細價樓會升20-30%，中價樓會升10-20%，而大價樓會升5-10%左近，原因又係由下而上咁煲熟。


試諗下如果連金獅荃中都要350萬入場，咁沙中沙一得寶呢Ｄ可能都要去到400-450萬，如果係咁的話，再向上就係淘大果Ｄ都要去到500-550萬才合理。呢家個市唔需要好多個成交去推佢上升，因為盤源極少，可能一個屋苑四五個成交已經可以推10%樓價上去，個個盤都要破頂，你唔買就唔駛買。


因此，我建議未上車的朋友真係等大家仲消化緊個消息時盡快入市，細價樓300萬已經最後倒數，市場上面可能真係做多五十個盤左右就令大屋苑300萬樓下絕跡，你能唔能夠執錢，主要就係取決於你的心態了。


請去like我的facebook: http://www.facebook.com/pages/80%E5%90%8E%E6%B1%82%E7%94%9F%E9%9A%8A%E9%95%B7/344567395626431