Gluten- og melkefrie muffins med løyndomar i

Imorgon er det siste dag for Malin i barnehagen. Til hausten er det skulestart for storejenta vår og i høve avslutning i barnehagen ville ho ta med seg noko. Dei andre borna har tatt med seg is den dagen dei slutta, men sidan det var siste dag før ferie fekk vi lov å ta med kake. Det er mange det skal takast omsyn til. Eg har baka ei sjokoladekake utan melk og eg har laga ordinære muffins med heimelaga eplesylte i. Til slutt laga eg gluten- og melkefrie muffin. Då får alle smake kake imorgon og alle er glade og nøgde (håpar eg).

Eg laga ein liten porsjon muffins då det er berre ein som skal ha desse. Oppskrifta rekk til seks stykke.

1 eple i små bitar
35 gram brunt sukker
1 ts sitronsaft
Dryss av vaniljepulver og kanel

Dette lot eg småkoke til det vart mørt. Same sylta laga eg i dei ordinære muffinsane. Då dobla eg oppskrifta.

2 egg
1 dl sukker
0,5 ts vaniljepulver
0,5 ts bakepulver
0,5 dl kokosmjøl
1 dl ferskpressa appelsin

Pisk egg og sukker godt. Tilsett vaniljepulver og bakepulver. Sikt i kokosmjøl før du til slutt heller i appelsinsafta. Fyll muffinsformene med omlag 3 ss røre og 1 toppa ts eplesylte på toppen. Steik midt i ovnen på 175 grader i 18 minutt.

Rabarbra- og jordbærpai

Når ein har rabarbra så er det kjekt å bruke det til noko ein kjenner frå før og noko ein ikkje har laga tidlegare. Først ut var rabarbragrauten, idag laga eg pai. Å du milde skapar for ei kaloribombe! Det du ser i skåla var meir enn nok. Eg kjenner det legg seg rundt magen berre eg ser på bilete. Likevel, det smakar godt og rabarbra har ein ikkje tilgjengeleg heile året så då slo eg til. Det er fredag, det er sommar og eg fortjener det... Mange andre grunnar sjølvsagt, sett inn det som passar for deg.

Oppskrifta er tatt utgangspunkt i ei eg fann i ei kokebok, men eg har endra mål og innhald så då er den vel nesten mi...

Kutt 150 gram rabarbra i små bitar, del 400 gram jordbær i to og bland det med 1 dl sukker og 1 ts vaniljeekstrakt. Hell det i ei paiform som er smurt.

Del 200 gram kaldt smør i terningar, bland inn 1,5 dl rørsukker, 1.5 dl kokosmasse, 2 dl kveitemjøl og 1,5 dl lettkokt havregryn. Bland saman for hand slik at du får ei deig. Fordel deigen over rabarbra- og jordbærblandinga.

Steik paien på 200 grader i 40 minutt eller til toppen av paien er gylden. Server med vaniljeis.

Rabarbradessert

Min vesle rabarbra som eg arva etter mormor ga meg 525 gram med stilkar i år. Det er kanskje ikkje mykje å skryte av, men det vesle som eg fekk måtte eg no bruke til noko. Sjølvsagt vart det rabarbradessert/graut/kompott. 

Eg brukte 3,75 dl vatn og 2 dl sukker som eg kokte opp ilag med rabarbraen, oppkutta i små bitar. Eg lot det småkoke i 10 minutt til det vart mørt. Så blanda eg 2 ss potetmjøl med 1 dl kaldt vatn (unngå klumpar). Rabarbrablandinga tok eg til sides, rørte i potetmjøl/vatn med ein ballongvisp, satt alt tilbake på komfyren og kokte opp. Ferdig! Eg helte blandinga i ei skål og lot det stå kaldt i kjøleskapet. Så er det berre å servere det med melk/fløte og sukker.

Kjempegodt og det gir minner om mormor, barndom og sommar på ein gong. Ungane likar det like godt som meg, det er kjekt. Skåla på bilete har eg forresten fått med mormor. Ho ga dei til meg då eg var 17 år. Eg var ikkje så begeistra den gongen, men 15 år seinare er eg veldig glad i dei og tek godt vare på skålene ho ein gong kjøpte på Samvirkelaget.

Tapas på menyen

Tapas høyres så enkelt ut. Og det er ikkje noko komplisert heller, men det tek tid når ein lagar alt sjølv. Idag inviterte vi to av våre gode naboar til middag. Malin hadde sagt tydeleg ifrå at no var det på tide å invitere og ho hadde sjølv laga "middagskort" til kvar enkelt av dei. Ho hadde teikna kjøttbollar og potetmos og skrive tydeleg og fint "Vil deko koma på middag?" Og dei inviterte takka gladeleg ja og eg måtte finne på noko med kjøttbollar. Det vart tapas og matlaginga har tatt heile dagen mellom mekling, bleieskift, amming og rydding av hus. Litt slitsomt må eg innrømme, men no gløymer vi det. Ungane var kjempesvoltne då maten kom på bordet så eg rakk så vidt å ta eit bilete av kvar rett. Stakkars gjestar som besøker ein bloggar. Alt skal takast bilete av og "dokumenterast" som eg brukar å seie.

Salat med raudlauk, tomat, mozarella og basilikum. Eg droppa dressing denne gongen, men olivenolje og balsamicoeddik passar godt om eg skulle ha nokre edle dropar på.

 Fullkornstortilla med Tine kremost urter. spekeskinke og ruccola.

Eg hadde først laga ein aioli av kvitlauk, eggeplomme, olivenolje, sitronsaft, kajennepepar, salt og pepar. Den vart mislykka av ukjent årsak og Mills redda meg. Kjøpt majones tilsatt kvitlauk og symbolsk kajennepepar (pittelitt).

Marinerte kyllingspyd. Del 5-6 kyllingfiletar i tre på langs. Bland 1 toppa ts karri, 1 ts spiskummen, 1 toppa ts paprikapulver, 3 hakka kvitlauk, 4 ss sitronsaft og 7 ss olivenolje i ein bolle. 
Vend kyllingfiletane i blandinga, og sett bollen i kjøleskapet med plastfolie over i minst 2 timar. Tre kyllingane på spyd, og steik dei i smør i panne på middels varme til dei er gjennomstekte. Eg fekk 18 spyd som rekk til 6-8 personar.

Kjøttbollar i tomatsaus har eg laga mange gongar etter oppskrift frå ei venninne. Denne gongen har eg gjort litt om på oppskrifta og eg synest personleg dei var betre idag enn nokon gong. 800 gr karbonadedeig, 3 pressa fedd kvitlauk, ei lita handfull med persilleduskar som eg finhakka, 2 egg, 1 dl strøkavring, salt, 1 toppa ts paprikapulver, 2 ts kajennepepar, 1 toppa ts spisskummen og 0,5 dl varmt vatn. Bland godt og trill bollane. Steik bollane jamt på alle sidene i ei middels varm panne med olje. Ha bollane i tomatsaus.

Oppskrift på tomatsaus: Surr 1 stor finhakka lauk på svak varm til den vert blank. Tilsett ei boks med hakka tomatar, 1 dl vatn.og 1/5 buljongterning. Tilsett chilipulver/chili/kajennepepar etter ønske. La dette putre i ein halvtime før du heller kjøttbollane i.

Potetene hennar Beate er visst ikkje så populære blant det norske folk har eg lest. Dei skal visst vere stygge å sjå på. For min del handlar ikkje mat om utsjånad, men om smak og kvalitet. Desse potetene er kokefaste og fine til potetbåtar. Eg brukar minst mogleg olje når eg har dei i ovnen (200 grader til dei får litt steike-utsjånad), då vert dei meir sprø. Eg strør litt havsalt på toppen.

Foccacia. Det er faktisk første gong eg har laga det. Og det har nok med at det berre er kveitemjøl og ingenting grovt i. Godt er det likevel, må innrømme det, og det er veldig enkelt å lage. Ha 3 dl lunka vatn i ein bolle. Tilsett 25 gram fersk gjær, 1 ts sukker, 1 ts salt og 450-500 gram kveitemjøl. Bland til ei deig som ikkje er for fast. La det heve i ein halvtime. Sett steikeovnen på 200 grader. Bak ut deigen til ein tjukk firkant. Ha litt olje på fingrane dersom det er vanskeleg å elte ut deigen. Prikk med fingrane hol fordelt utvoer brødet. Pensle med olivenolje, dryss havsalt og nykverna pepar. La heve i 15 minutt. Steik brødet i 20-25 minutt. Nyt!

Fordi borna var svoltne og gjestane hadde sett seg til bords, rakk eg ikkje steikte dadlar med bacon før etterpå. Det er ein obligatorisk tapasrett. Betre seint enn aldri. Eg hadde heller ingen rettar med sjømat, men om eg skulle ha valgt det så ville eg ha hatt chilimarinerte scampi og tortillalefser med røkt laks inni. Varmrøykt peparørret som dei lagar her i bygda smakar også veldig godt. Maten idag vart servert med øl, vin, brus, saft, melk og vatn. Så alt går an. Alle koste seg og no er vi mette i magen. Det tok lang tid å lage, men kva gjer vel det når alle er nøgde.

Suksessterte

Gode oppskrifter på favorittar frå bestemor er noko av det kjekkaste å arve. Eg har mange gode matminner frå mormor og farmor, men diverre ingen oppskrifter. Eg skulle så gjerne hatt oppskrift på mormor sine kjøttkaker, gelekake og lapskaus. Eller farmor sine sveler for å nevne noko. Derimot har eg fått oppskrift på suksessterta til Espen si farmor. Den fekk eg for snart ti år sidan og den var ho veldig stolt av. Fleire i familien hadde den som favoritt og ho kunne stolt fortelje kor mange stykker enkelte kunne klare å svelge.

Suksessterte er verkeleg ein suksess. Den står aldri urørt etter selskapet. Igår laga eg to stykker då vi skal i bryllaup ikveld. Det er det tredje bryllaupet på 1,5 månad så vi lid inga naud rundt magen for å seie det slik.

Eg har ikkje hatt tid til å pynte den så den vart ei naudløysing denne gongen. Dersom eg har god tid brukar eg å ha sjokoladeglasur oppå og pynte den med gule kremtoppar. Kaka er glutenfri og dersom du ønskjer oppskrifta er det berre til å seie ifrå. For øvrig finnes det mange gode oppskrifter på nettet, men denne er det litt stas å lage sidan den har gått i arv.

Drikk grønnsakene dine!

Har du born som ikkje vil ete grønnsaker? Kanskje juicepresse er noko for deg? Sjølv har eg fått heilt dilla etter at eg fekk juicepresse av mamma for tre månader sidan. Utgangspunktet for dette innkjøpet var eit innslag på God Morgen Norge for vel eit år sidan kor ei dame introduserte dette vidunderet. Samme dama har eg fulgt på blogg og på facebook og i januar kom ho ut med boka "Juicy!". Dama eg snakkar om heiter Carina Hultin Dahlmann. Meir om henne kan du lese på nettsida hennar Juicydrops. 

Mine born har aldri rynka på nasa når dei har fått grønnsaker. Dei står gjerne ved kjøkkenbenken og tiggar etter bitar som eg kuttar før middag. Likevel er det eit problem å få i seg tilstrekkeleg. Det er anbefalt 5 om dagen som tilsvarer 750 gram kor 450 gram er grønnsaker. Helst i alle moglege fargar. Klart dette vert tidkrevande og komplisert!  Så istaden for å kutte opp ein haug med grønnsaker og ikkje minst tygge det, så pressar eg alt saman og drikk det lett som ingenting. Det går raskt, det er enkelt og det er kjempegodt.

Det tek litt plass på kjøkkenbenken, men det er det verdt. Sjølv har eg valt juicepresse som kan festast på kjøkkenmaskina, men der fins mange juicepresser på markedet. På nettsida eg viste til over finn du fleire anbefalingar. Har du tenkt over kor mykje grønnsaker og frukt 5 om dagen eigentleg er? Eg rekna på det at det tilsvarer 20 kg i veka for vår familie! I tillegg til juicepresse har eg blender tilgjengeleg då eg lagar smoothie basert på frukt- og grønnsaksjuice. Smoothie har ungane fått sidan dei var eit år gamle og det er framleis populært.

Ser ikkje denne god ut? Den er laga av eple, ingefær, sitron, gulrot og melon. Eg har alltid sitron og ingefær i juicen. Det går mykje epler og. Andre ting eg puttar i er squash, selleri, agurk, ananas, kiwi, bladspinat.... ja det er berre fantasien som set grenser.

Sjekke nettsida Juicydrops og vert inspirert. Ha ein fin dag!

Kake til fest

Vi er invitert i bryllaupsfest ikveld og eg har laga kake for høvet. Eg veit ikkje om det er så vanleg i min generasjon å tilby seg å bake kake når det er storselskap, men eg held på tradisjonane og lagar kake meir enn gjerne. Denne gongen har eg laga kake som vart kåra til den beste i God Morgen Norge og Norsk Ukeblad no nettopp. Oppskrifta er laga av ei dame som heiter Alice Hald Clarke og ho har vunne konkurranse i same tema før. Då med ei anna kake. Tenk å vere så flink! Oppskrifta finn du her.

Syndig og god! Gledar meg til å smake!

Treng du sunne, gode middagstips?

Alle som kjenner meg veit at eg er hekta på mat. Eg sitt ikkje å et heile dagen, men eg er veldig mykje på kjøkkenet og lagar maten. Eg likar å prøve noko nytt heile tida og sitt derfor mykje på internett og leitar etter oppskrifter, planlegg, lagar vekemenyar og let familien vere prøvekaniner. Maten skal vere variert, sunn og næringsrik og sjølvsagt smake godt. Matlaging slik eg gjer det tek veldig lang tid, men eg håpar etterkvart at eg har ein variert og god meny som eg kan bruke fleire gongar. 

Eg er ingen matfotograf, men eg prøvar i det minste å ta bileta sjølv. Dei vert tatt i hurten og sturten mellom komfyren og magen. Dersom du er ein av dei som sitt på søndagskvelden og planlegg vekemenyen, kan kanskje nokon av desse oppskriftene vere noko for deg. Eg har sjølvsagt ikkje funne på desse sjølv, så eg linkar alle oppskriftene. Litt personlege justeringar har det vore, men det må ein nesten finne ut av sjølv utifrå kva ein sjølv likar og har i kjøleskapet.

Wenche Andersen frå God Morgen Norge har utruleg mange gode og enkle oppskrifter som er lette å forstå. Råvarene finn du i dei fleste butikkane noko som er avgjerande for meg som bur på ein liten stad. Dette er risotto med laks. Eg har brukt risottoris, men det går fint an å bytte ut risen med byggryn dersom du huskar å legge gryna i bløyt (sjeldan eg huskar slike ting). Byggryn gjer retten vesentleg sunnare enn polert ris. Og laks er ei super kjelde til Omega 3.

Denne salaten laga eg til lunsj, men den kan fint etast til middag og. Dette er ein pastasalat med skinke og soltørka tomat. Eg har brukt fullkornspasta og bayonneskinke. Eg må alltid ha noko grønt når eg et salat så eg har supplert med salat og cherrytomatar.

Visste du at potet også er ein grønnsak? Velg små poteter og ikkje skrell av skalet, då har du ein om dagen (100 gr). Og brokkoli er ein supergrønnsak som inneheld dei fleste vitaminar du treng. Kylling med poteter i tomatsaus er mettande, smakfull og lett å lage.

Eg har aldri likt tomatsuppe frå pose, men etter at eg byrja å lage suppa sjølv har eg oppdaga at tomatsuppe faktisk er godt og like enkelt å lage. For meg som ikkje er så stor er tomatsuppe mettande nok når eg ein klatt med rømme, men det bør nok supplerast med noko meir dersom ein er litt større. Den kan til dømes vere kjøttbollar, pasta, bacon, scampi osv. Ein også ha tomatsuppe til lunsj. Bilete ser heilt forferdeleg ut, men pytt pytt.

Denne laga eg idag. Sjølv om eg ikkje hadde nøyaktig dei same ingrediensane som Wenche Andersen, smakte den veldig godt. Og eg huska å bløyte byggryna! Kyllingsuppe som er tvers gjennom sunn gjer ein mett og glad i magen. Eg anbefalar å droppe chili om du har små born. Mine reagerer iallefall raskt på det som er antydning til å vere sterkt.

Elles så vil eg anbefale følgande middagar som eg har laga og servert fleire gongar:

Krema fiskesuppe
Hot Pot fiskegryte
Chili con carne

Ha ei fin veke!

Italiensk ribbe

Eg er ingen blodfan av norsk juleribbe. Eg synest det er smaklaust og feitt. Espen derimot er veldig glad i svineribbe slik som veldig mange er. Sidan det ikkje er jul, men vi har litt høgtid ilag med svigermor denne helga, tenkte eg at eg skulle lage ei litt annleis ribbe. På Gilde si nettside fant eg oppskrifta på Italiensk ribbe. Og det måtte eg prøve, berre litt på min egen måte. 

Først må eg seie at det tek 3,5 time å førebu og steike denne retten. Om du synest det er verdt det med tanke på at vi sitt berre 15 minutt ved bordet får vere opp til deg. Eg er ikkje så opptatt av sjølve måltidet, men det som skjer undervegs i matlaginga. Her er ingredienslista først:

2,6 kg tynnribbe (du kan både ha meir og mindre)

4 hakka kvitlauksfedd

2 ss grovmalt pepar

10 knuste einebær

1 neve fersk salvie

2 ss tørka timian

1/3 potte frisk rosmarin

3-4 ss salt

Som tilbehør har eg ovnssteikte poteter og grønnsaker i form. Av grønnsaker nytta eg gulrot, squash, gul løk, purre og paprika. Eg la mange, heile fedd med kvitlauk i forma ilag med nokre kvastar rosmarin, båtar av ein sitron, litt salt og olje. 

Det første eg gjorde var å ta ut beina av ribba. Det var litt vanskeleg synest eg. Ribba var romtemperert slik som det sto i oppskrifta, men det var litt styrete å ta dei ut.

Så ruta eg ribba med ein skarp kniv.

Deretter blanda eg øvrige ingrediensar med stavmiksar, fordelte det utover ribba, før vi rulla ribba saman. Det er greit å vere to for den eine rullar medan den andre snurrar hyssing rundt. Eg kan ikkje binde steik og liknande så det vart ganske mykje tråd.

Ribba vart lagt på ei rist med aluminiumsfolie godt pakka over.Under rista la eg ei langpanne med vatn. Ribba steikast på 220 grader i 1.5 time.

Etter 1,5 time tek du av aluminiumsfolien, legg inn grønnsakene og steiker vidare i 1,5 time til. Undervegs snur du ribba slik at svoren vert sprø på alle kantar. Dersom ribba er sprø og klar utanpå før tida har gått ut, legg du på aluminiumsfolie igjen.

Etter tre timar tek du ut ribba og let den kvile. Medan du ventar kan du dekke på bordet og ta ein sang. Klipp opp hyssingen og del opp ribba i skiver. Server ilag med det tilbehøret du ønskjer.

Du kan heilt sikkert variere fyllet inni alt etter kva du ønskjer å servere det ilag med. Eg synest dette var ein fin variant av den klassiske juleribba, men eg trur ikkje du skal forsøke å erstatte den. Å tulle med tradisjonar har iallefall ikkje eg tenkt å gjere.

Bakedugnad

Tre damer med mann og ungar på slep samt tre sortar kakedeig på ein laurdagettermiddag. Slik var det her hjå oss igår då eg, Kjersti og Åshild vart samde om å samle familiane, vere sosial og effektivisere julebaksten på same tid. Vi drakk gløgg, bakte, passa unga og styrte på. Veldig kjekt.

Ikkje tid til så mange bileter, men dette illustrerer at ungane var med å bake julemannar. Det tok tid, det krever tolmod, men det er fascinerande å sjå kor viktig val av kakeformer er kvar gong dei skal stikke ut i deigen. Kake med omtanke, det er sikkert.

Åshild var leiar av ungeflokken og styrte gløggen. Ho hadde laga kakemann/julemanndeig. Sidan Åshild ikkje er på facebook kjenner eg det store ansvaret på å ta ho inn i varmen i den sosiale media-verda, hehe.

Mitt bidrag var brune pinnar. Eg har aldri laga det før bortsett frå for nokre dagar sidan då eg fant ut at eg skulle lage ein sunnare versjon av desse. Eg hadde mindre smør, brukte sukrin istaden for sukker og nytta kesam i røra. Det vart ikkje det same og eg skal ikkje gjere det igjen. Noko får vere som det alltid har vore; mykje smør og mykje sukker. Oppskrifta skal dokke få for desse brune pinnane var kjempegode.

200 gr smør
200 gr sukker
1 eggeplomme
1 ss lys sirup
½ ts malt kanel
1 ts vaniljesukker
1 ts natron
300 gr kveitemjøl (ca)

1 eggekvite, sammenvispa
Perlesukker
Finhakka mandlar

Sett steikomnen på 175°C. Ta fram steikebrett med bakepapir.
Rør smør og sukker godt. Bland i resten av ingrediensene. Kna deigen og del den i 6 emner. Trill tynne pølser og trykk dei litt flate på stekeplata med fingeren.
Pensle med egg, dryss på mandlar og sukker. Steik kakene i ca 10 minutter midt i ovnen. Når du har tatt ut kakene, skal du skjære dei på skrå, smale pinner medan dei framleis er varme.

Julemannar. Kvar gong eg opna ovnsdøra slo dampen med hjortesalt imot meg. Alt i systemet vart godt gjennomrensa den dagen...

Serinakaker, deig frå Kjersti. Denne har mykje smør i seg. Det både lukta og glinsa smør, men smør er no så godt at det kan vi ikkje seie noko på.

Ungane malte/dynka julemannar i konditorfarge. Det ser heilt forferdeleg ut og det fristar ikkje for mitt vedkommande å ete dette. Ungane ville heller ikkje ha det då dei sa at dei ikkje ville ete maling. Tippar dei endar i bosset.

Dette håpar eg vi gjentar neste år. Kjempekoseleg! Eg hadde for to veker sidan ingen planar om å bake i år, no har eg fem sortar allereie. Skal vel klare å verte julefeit i år og...

Julebaksten har starta

På tysdag hadde eg Emil heime og planen var at vi skulle bake julekaker. Emil synest det er kjekt å hjelpe til på kjøkkenet, men eg merka meg at det er baking med kjevle og kakeformer som er kjekt, ikkje alt anna som eigentleg berre eg kan bake ut. 

Eg baka to sortar; pleskner og regiastenger. Pleskner er noko mamma er oppvaksen med, men som ho ikkje har laga sjølv. Mamma fortalte alltid om desse julekakene som smelta på tunga og det høyrtes fristande ut for meg. Det er ei enkel oppskrift som eg sjølvsagt deler med dokke.

2 egg
120 gr sukker
150 gr kveitemjøl
1/2 teskei vaniljesukker

Visp egga godt med sukkeret.
Tilsett vaniljesukkeret og sikta kveitemjøl.
Bruk ei teskei og sett deigen på ei bakepapirkledd bakeplate.
Steik på midterste rille i steikeovnen ved 175 grader , til kakene er lys gylne. (ca. 11 min)
Avkjøl på rist.

Den andre kakesorten vi bakte var regiastenger. Det er ei slags kakaomørdeig som steikast og vert brownies liknande kjeks. Mamma har alltid laga dei og det er definitivt min favoritt blant mamma sine julekaker. Og oppskrifta skal dokke få med håp om at dokke lagar dei sjølve og.

160 gr smør
2 dl sukker
1 egg
5 dl kveitemjøl
3 ss kakao
2 ts vaniljesukker
2 ts bakepulver

Rør smør og sukker kvitt. Tilsett egg og dei tørre ingrediensane. La stå kaldt ei lita stund før du rullar dei ut til 3 pølser. Trykk pølsene flate og steik dei på 200 grader i 15 min. Del dei opp i snittar og la dei avkjøle på rist. Desse er fine å ete ilag med kald melk.

Kva slags julekaker må du bake kvart år?

Rask og enkel bringebæris

Denne isen vil eg dele med alle! Fantastisk god rett og slett. Det er mykje bringebær i omløp no og då må ein lage noko av denne gode og gratis bæra. Sidan vi verken et sylte eller drikk saft her i huset så har eg frose dei fleste bæra i 200 gram-porsjonar slik at eg kan bruke det i smoothiar. Nokre av bæra fekk likevel æra av å blande seg med fløte og sukker.

Oppskrifta har eg funner her. Eg har bytta ut ripsa med bringebær, men elles er den akkurat lik. Eg var litt sein med å røre inn bringebærsirupen i isen, men eg tenker at ein kan likegodt ha i sirupen med ein gong. Dette får ein gjere som ein likar best.

No har eg laga mykje feitt og sukkerhaldig i det siste. Det er vel på tide å stoppe opp og plukke fram nøttene og grovmjølet igjen etter ein usunn, men koseleg sommar. Om du har tenkt å gjere det same så må du gjerne gjere det, men prøv å lag denne isen først som eit siste punktum.

Høgkarbo og kaloririke Dots-muffins

Slankar du deg eller unngår det eine og det andre fordi du skal passe formene? Ja då har du kome til feil stad. Desse muffinsane er full i kaloriar og karbohydratar, feitt og sukker, men er virkeleg verdt å smake på. Bak, smak og nyt!

Ingrediensliste til 20 muffinsar (ca):

115 gram smør

3 eggekviter, romtemperert

2,5 dl mjølk

250 gram mjøl
1 ts bakepulver

2 ts vaniljeekstrakt

1/2 ts salt

190 gram sukker

2 pakkar Dots, mørkebrune

200 gram kremost naturell

320 gram melis

100 gram smør, romtemperert

Del kjeksen og legg eine sida med krem opp i muffinsformer. Det er mi sterkaste anbefaling å ha muffinsbrett for å stabilisere muffinsane.

Pisk smøret til ein luftig krem. Tilsett mjølk og vaniljeekstrakt. Bland mjøl, bakepulver og salt og hell i røra medan du rører vidare. Tilsett sukker, pisk eit par minutt før du hell i eggekvitene. Pisk i to minutt til. Den delen av kjeksen som ikkje er i muffinsforma (omlag 12) knuste eg med mortar og rørte i muffinsrøra tilslutt. Steik på 180 grader i 20-25 minutt.

Toppingen er laga av kremost, melis og smør som er rørt saman med miksar. Så tilsette eg knuste kjeks i tilslutt. Det er heilt valgfritt kor mykje ein vil ha oppi. Eg hadde åtte halve kjeks oppi sidan den andre halvdelen var brukt til å ha i muffinsformene.

Muffinsane kan frysast, men dei vert nok ikkje der så lenge for desse er alt for gode til å vente på. Ungane elska dei og. På bilete over er det for mykje topping etter min smak, men det vel du heilt sjølv.

Og etterpå kan du gå deg ein tur ;-)

Glimt frå morsdagen

Det var morsdag her i huset også og Malin gleda seg slik til denne dagen. Ho hadde laga ein løyndom i barnehagen og eg fekk beskjed om at eg måtte halde meg unna sekken hennar til søndag. Ho bestilte kake og laurdagen bakte vi to kaker.

Den store overraskelsen var eit hjartekort som ho hadde laga. Kjempestolt og kry over produktet. Ho har skrive sjølv og limt på paljettar.

Inni kortet var det ei teikning av meg og henne, samt hjarter og blomar som ho likar så godt å teikne.  Ei flott gåve synest eg.

Emil hadde og utfolda seg og hadde limt nokre bitar med papp på eit rosa hjarte. Malin stussa på kvifor ikkje hjarte var dobbelt, men mor i huset var nøgd med gåva.

Leila Lindholm har ei flott bakebok som heiter "A piece of cake" og eg har brukt boka fleire gongar. New York Blueberry Cheesecake skulle ifølge ho vere ein av dei beste, men personleg synest eg den var alt for mektig og tørr. Stussa litt på korleis den kan vere tørr når det er ostekake, men eg skal iallefall ikkje lage den igjen.

Eit snitt av kaka viser at denne har ingen grunn til å vere tørr. No er eg ganske forkjøla så det kan no vere noko med mine smakslaukar og...

Vakre matbileter er ikkje så lett å få til når ungane har augene på kaka. Denne rullekaka kjem frå same bakebok og oppskrifta kan eg anbefale på det sterkaste. Det er brukt riven appelsinskal i sukkerbrødet og fyllet er krem og jordbærsylte. Veldig god og Emil åt heile tre stykker. Det må vere eit bra teikn.

4 års dagen vel gjennomført

Det er utruleg kor mykje tid ein brukar på å førebu ein bursdag som varer i to timar. Malin hadde fireårsbursdag idag kor ho hadde fem jenter frå barnehagen på besøk. Bringebærmuffins, prinsessekake og smoothie vart trylla fram, men det var så vidt ungane åt eller drakk. Var det verdt det?

JA! Eg elskar å bake og stå på kjøkkenet. Å prøve nye ting er det kjekkaste. Eg laga denne prinsessekaka for første gong. Det meste var nytt for meg med denne kaka. Trekket er laga av marshmellowfondant. Ganske enkelt å lage. Marshmellow, delfiafett, vatn, konditorfarge og melis. Vidare laga eg ei rund sjokoladekake i ei lita form og ei kake i ei puddingform med hol i midten. Kake i puddingform var ikkje enkelt og eg har aldri gjort det før, men med sjokoladekrem kan alt lappast saman. Malin og jentene synest sjølvsagt kaka var kjempefin. Og til første gong å vere så var eg og nøgd.

Sidan det ikkje vart ei kake med tradisjonell form, fekk eg ikkje satt lys i sjokoladekaka. Derfor vart det lys i bringebærmuffinsen istaden. Malin synest det var like greit. Så lenge ho fekk lys og bursdagssang så var det godt nok. Alle oppskrifter er frå Leila Lindholm, og Malin var kjempefornøgd med selskapet sitt.

Ivrig på matlaging

Det har vore ein produktiv dag på kjøkkenet. Svigermor er på besøk og har vaska og rydda nesten heile huset slik at eg har fått tid å gjere det eg likar mest; lage mat. Eg hadde ikkje planar om å lage noko som helst, men timane gjekk og plutselig vart det ein del likevel.

Knekkebrød er kjempelett å lage og krev ikkje lang tid. Dei er ikkje tilsatt kveitemjøl og er full i grovt mjøl, nøtter og frø. Dei smakar og mettar veldig godt. Oppskrifta finn du her. Bilete viser kun litt av det som vart laga, du får ganske mange når du brukar denne oppskrifta.
Vi venta besøk og eg tenkte at sveler er fin kaffimat. Eg som er sunnmøring sett veldig pris på sveler og no når eg har fått meg steiketakke så er det ei god anledning til å lage litt. Ungane elskar det, ja vi voksne og, og røra heldt til kaffimat i to dagar. Liknande oppskrift på sveler finn du her.

Så fekk eg laga brød. Eg følg inga oppskrift, men eg brukar ein kartong kefir, litt vatn og olje som tilsammen utgjer 1 liter. Eg blandar i ferskgjær når væska er temperert, hell i 1 liter grovmjøl, kli, gryn og frø (tek det eg har), og 1 liter kveitemjøl tilslutt. Deiga treng gjerne litt meir kveitemjøl etterkvart som den vert elta. Brøda steikast på vanleg måte. Kjempegodt og det luktar fantastisk i huset.
Heimelaga lasagne et ungane av masse og Espen er også veldig glad i det. Ein stor porsjon vart laga slik at vi har litt til i morgon og. Eg er veldig nøgd med dagens produksjon og ikkje minst at huset er reint og ryddig. Ungane har ikkje heile tida vore like nøgd med at eg står ved kjøkkenbenken time etter time så imorgon har kjøkkenet begrensa opningstid.

Ha ein fin laurdagskveld og vidare god helg.