曾志豪
| 曾志豪 | |
|---|---|
 曾志豪（2021年） | |
| 節目主持 | |
| 羅馬拼音 | Tsang Chi-ho |
| 花名 | 小豪子 |
| 國籍 |  中國（香港） |
| 民族 | 汉族 |
| 籍貫 | 廣東省惠州市 |
| 出世 | 1978年11月22號 英屬香港 |
| 屋企 |  臺灣[1][2] |
| 職業 | 節目主持、DJ |
| 教育程度 | 香港浸會大學傳理學院中文新聞系 |
| 母校 | 德信學校 東華三院張明添中學 |
| 配偶 | Winnie（2010年結婚） |
| 仔女 | 2子 |
| 出名角色 | 小豪子、徐副官《頭條新聞》 |
| 活躍年代 | 2000年至今 |
| 經紀公司 | 香港電台 |
| YouTube 资料 | |||||||
|---|---|---|---|---|---|---|---|
| 頻道 | |||||||
| 活躍年代 | 2019 - | ||||||
| 類型 | 時事 | ||||||
| 訂閱量 | 23.1萬 （截至2022年11月） | ||||||
| 總 | 4千8百萬 （截至2022年11月） | ||||||
| |||||||
曾志豪 （前英文名Gary，1978年11月22號—）係香港嘅傳媒人，曾經做過香港電台嘅節目主持人，喺港台電視部嘅節目《頭條新聞》嗰度飾演徐副官、小豪子等角色，同吳志森飾演嘅大帥、太后等一齊諷刺時弊[3]。佢亦都係有線新聞已經停播嘅節目《周日不講理》（2016年2月7號起，改名做《Sunday有理講》）主持人。依家，曾志豪係德國之聲嘅中文客座評論員[4]。
簡介
[編輯]曾志豪小學讀過德信學校（小五及小六），中學讀東華三院張明添中學，大學讀香港浸會大學傳理學院中文系。
2002年佢因為《自由風‧自由Phone》︰暴力抗爭的悲劇-六七暴動的啟示The tragedy of violent protest（編導及採訪：陳燕萍、曾志豪．監製：陳耀華）獲得第七屆人權新聞獎（Human Rights Press Awards）中文電台組嘅冠軍 。
2017年《頭條新聞》改咗「太后與小豪子」嘅環節，曾經改咗做「大帥來了」。「大帥來了」由吳志森扮演大帥，曾志豪扮演徐副官。
曾志豪曾經係香港電台節目《時事沙龍》（接替胡世傑）、《無火主席》、《公民社會》（一台時期，2003年9月17號-2008年9月12號）、《瘋show快活人》同埋《中女宅男殺很大》嘅節目主持人之一。
2011年梁思浩因為遲到、曠工問題，離開咗《瘋show快活人》節目，之後曾經幾次話佢受到曾志豪同埋拍檔貴花田出賣，鄭經翰亦都話過佢係「反骨仔」，原因係曾志豪曾經喺報紙撰文話鄭經翰間屋有僭建問題，鄭經翰於是喺報紙回應，二人開始咗筆戰，互相開火。
佢亦都定期喺明報、蘋果日報、信報、爽報、AM730、都市日報等報紙寫專欄，係香港產量好高嘅專欄作家。
曾志豪出版過好幾本書，包括《大國勃起》、《抽乾香港》、《中女挑宅男》。佢亦都曾經做過陳淑莊棟篤笑嘅嘉賓。
曾志豪同陳嘉銘合演過棟篤笑《國民跣底教育》。
曾志豪有紋身，紋身圖案係佢已經死咗嘅一隻狗。
2019年，曾志豪進軍YouTube，同吳志森合辦時事評論頻道「志森與志豪」[5]，雖然名義上呢個係佢哋兩個人嘅合辦頻道，但係曾志豪係頻道最主要嘅營運人，經常上傳一啲只有他一個人主持節目嘅短片。之後呢個頻道改名做「志豪LiveShow」。
2021年7月11號，曾志豪喺Facebook宣布自己已離開咗香港，會定居臺灣。
曾志豪喺2023年3月3號開始，為台灣中央廣播電臺做首個港台傳媒人合作嘅華粵雙語跨媒體實境影音節目《歹勢 打攪晒》，呢個節目共有5集[6]。
有傳曾志豪已經喺2023年中嘅時候移咗民去英國，不過佢聲稱，只係去英國探朋友，因為依家實在有太多朋友喺英國[7]。
被解僱事件
[編輯]2021年6月18號，佢主持完電台節目《瘋Show快活人》之後，俾上司約見，然後突然俾香港電台炒咗魷魚[8][9]。香港電台向外界指出，佢哋希望藉住第二台成立40周年嘅時候「復刻」啲節目，所以要撤換主持人[10]。
曾志豪指出，他主持的風格是不會迴避社會議題，會將社會事件以輕鬆形式告訴觀眾，並認為是因此而被解僱。同時，佢亦都批評港台解釋嘅理由可笑，因為如果係為咗「復刻」以前嘅節目，咁主持咗節目26年咁耐嘅貴花田，無理由會同時俾解僱[11]。香港浸會大學新聞系前助理教授杜耀明指出，曾志豪俾港台解僱呢單嘢反映「港台會失去批評、嘲笑政府及社會現象的功能，有損公共電台的可信性」[12]。 不過親中派傳媒人，現任顧問嘅原姿晴就認為，曾志豪既有喺節目講粗俗說話嘅不良紀錄，佢主持嘅節目《頭條新聞》又俾通訊事務管理局裁定違反「節目標準」，有關節目「污衊和侮辱警方、資料不準確」等，未確實遵循《香港電台約章》嘅「提供準確而持平的新聞報道、資訊、觀點及分析」、「增加市民對『一國兩制』其在香港實施情況的認識」同埋「提供讓市民了解社會和國家的節目，培養市民對公民及國民身分的認同感」，所以被解僱無問題[13]。
之後，貴花田、曾志豪同王耀祖喺 YouTube 開咗「田豪祖3寶 channel 」繼續喺網上直播節目[14]。
2022年12月，香港政府兩次發表聲明，指曾志豪喺明報寫嘅評論文章混淆視聽，並深表遺憾。12月30號，曾志豪喺明報發表以「我的最後一篇《明報》稿」做標題嘅文章，表明將唔會再喺明報寫專欄[15]。
個人生活
[編輯]曾志豪已經結咗婚，有兩個仔。
爭議言論
[編輯]天鴿啟示錄
[編輯]- 2017年8月25號，颱風天鴿導致澳門有十幾人死咗。曾志豪喺蘋果日報嘅副刊嗰度寫咗（天鴿啟示錄）[16]，佢話「天鴿飛到澳門，意外地讓香港人不再羡慕澳門人了。我們曾經為了澳門可以年年派錢眼紅妒忌，但一場風暴，叫人看到澳門官員應變緩慢的官僚作風，簡直可以和青嶼幹線雙向收費第一天搞到一鑊粥，互相輝映。停電斷水的落後淒涼，又令我們醒覺，澳門派的幾千元，其實是要你節哀順變不要傷心的帛金」。
- 有網民認同曾志豪嘅講法，指責澳門政府每年派錢，但係就唔花錢嚟完善城市規劃同埋基礎建設，甚至形容每年9000元喺「掩口費」同「肉金」[17]。
之後，曾志豪喺報紙嗰度寫咗專欄「和諧不能救災」，批評澳門政府拒絕部分香港記者入境，嘲諷當局「迷信和諧便能救災」[18]。
直播節目講粗口
[編輯]2018年7月11號，曾志豪喺直播節目《瘋show快活人》嘅時候，爆粗講咗「屌你老味」。港台機構傳訊及節目標準組總監伍曼儀證實咗呢件事，指經過佢嘅了解之後，當時曾志豪要播出另一條宣傳聲帶，但係就㩒錯掣，令佢「發忟憎」鬧自己嘅說話出咗街。直至6點左右，港台收到大約約三十幾個有關嘅電話，當中有投訴、不滿嘅，亦有慰問、支持曾志豪嘅，仲有俾意見嘅。港台跟進呢件事之後，曾志豪由2018年7月12號開始放假到23號先至復工，總共停工11日。佢嘅《瘋show快活人》、《中女宅男殺很大》同《頭條新聞》嘅工作都會暫停[19][20]。
參考
[編輯]- ↑ 〈前香港《头条新闻》主持人曾志豪离港赴台〉。德國之聲。原著喺2021-10-02歸檔。喺2021-07-11搵到。
- ↑ 〈各位，我來了台灣。很抱歉，也是沒能好好和各位說一聲道別。甚至是，睜開眼才醒覺，原來這已不是香港。許多記掛我安好的朋友，讓你們操心了。許多人和事，千言萬語，在心中。以後的路，就是要一直走下去了〉。Facebook。喺2021-07-11搵到。
- ↑ 〈香港電臺：簡介〉。原著喺2016-08-16歸檔。喺2012-11-18搵到。
- ↑ 〈曾志豪 – DW〉。dw.com (中文)。喺2024-09-05搵到。
- ↑ 〈志森與志豪 - YouTube〉。原著喺2021-03-12歸檔。喺2020-02-04搵到。
- ↑ 《追新聞》記者 (2023-02-17)。〈追直擊｜任台灣央廣新節目主持 曾志豪：此處不留人 自有留人處〉。《追新聞》 (臺灣中文)。喺2024-09-05搵到。
- ↑ 〈兩岸關係火藥味濃 在臺港人何去何從？ - M.Y. - 如水〉。flowhongkong.net (臺灣中文)。2023-04-25。喺2024-09-05搵到。
- ↑ 〈名嘴曾志豪突遭香港電台解僱 開完咪收通知 「無機會正式和聽眾說再見」〉。立場新聞。2021-06-18。原著喺2021-06-24歸檔。喺2021-06-18搵到。
- ↑ 〈《頭條新聞》主持人曾志豪被港台炒魷〉。文匯報。2021-06-18。原著喺2021-06-24歸檔。喺2021-06-18搵到。
- ↑ 〈曾志豪突被通知停做主持 港台工會質疑安排對人不對事〉。香港電台。2021-06-18。原著喺2021-06-24歸檔。喺2021-06-19搵到。
- ↑ 〈名嘴曾志豪突遭香港電台解僱 開完咪收通知 「無機會正式和聽眾說再見」〉。立場新聞。2021-06-18。原著喺2021-06-24歸檔。喺2021-06-19搵到。
- ↑ 〈曾志豪被港台即時解僱 復刻節目為由革兩主持 曾：遺憾連累貴花田〉。明報。2021-06-19。原著喺2021-06-24歸檔。喺2021-06-19搵到。
- ↑ 〈【來論】回歸．初心．洗心革面〉。2021-07-01。原著喺2021-11-03歸檔。喺2021-10-13搵到。
- ↑ 〈曾志豪貴花田王耀祖再度合體 化身「田豪祖3寶」開咪〉。《明報》。2021-06-22。原著喺2021-06-24歸檔。喺2021-06-23搵到。
- ↑ 〈政府兩度批評 曾志豪被結束《明報》專欄：不用猜與鄧炳強有無關〉。原著喺2023-03-24歸檔。喺2022-12-30搵到。
- ↑ 〈存档副本〉。原著喺2017-08-30歸檔。喺2017-08-25搵到。
- ↑ 〈存档副本〉。原著喺2019-08-22歸檔。喺2017-08-27搵到。
- ↑ 曾志豪 (2017-08-28)。〈和諧不能救災〉。《大國有話兒》 (香港中文)。am730。喺2019-09-18搵到。[失咗效嘅鏈]
- ↑ 〈港台主持曾志豪直播爆粗被「封咪」11日〉。《東方日報》。2018年7月11號。原著喺2019年1月9號歸檔。喺2018年7月13號搵到。
- ↑ 〈港台曾志豪直播爆粗「X你老味」 明起休假至本月23日〉。《頭條日報》。2018年7月11號。原著喺2018年10月22號歸檔。喺2018年7月12號搵到。