Atticus
Excipis credo illa, quibus ipsi initiati sumus.
Marcus
Ego uero excipiam. Nam mihi cum
multa eximia diuinaque uideantur Athenae tuae peperisse atque in uitam hominum attulisse, tum nihil
melius illis mysteriis, quibus ex agresti immanique
uita exculti ad humanitatem et mitigati sumus, initiaque, ut appellantur, ita re uera principia uitae
cognouimus, neque solum cum laetitia uiuendi rationem accepimus, sed etiam cum spe meliore moriendi.
Quid autem mihi displiceat in nocturnis, poetae indicant comici. Qua licentia Romae data quidnam egisset ille qui in sacrificium cogitatam libidinem intulit,
quo ne inprudentiam quidem oculorum adici fas fuit?
Atticus
Tu uero istam Romae legem rogato,
nobis nostras ne ademeris.
15.