Vibuli (Ponga) - Seu Vibulines - Tuba - Peña Salón - Nochendi - Toyu - Baxeñu

1 d'Avientu de 2024

Track: Víboli (Ponga) - Seu Vibolines - Tuba - Peña Salón - Nochendi - Toyu - Baxeñu

Última ruta del añu col GM Xuan de la Borrina, enantes d'una inesperada por lo rápida intervención pa operame de la cadera, que llevábame machacando dende la selmana santa del 2023, pudiendo facer nestos tiempos muncha escalada y dalgo de monte pero con dolor abondo. 

Al llunes siguiente d'esta ruta per Ponga, tenía'l preoperatoriu colo que camentaba un mes mínimu de tranquilidá hasta la operación, pero esi mesmu día ufreciérenme operame al día siguiente, asina qu'ensin pensalo demasiáu fuimos p'alantre y nel mes d'Avientu quitáramos d'enriba la operación, tando nel intre, nel procesu de rehabilitación, col envis d'intentar tornar a l'actividá pa la primavera dafechu.

 

Salimos de la redolada de Vibuli nel aparcaderu de les Mesties (715 m)

Nesti primer día d'Avientu, aportábemos cola calma a Vibuli nel conceyu de Ponga, onde ya tuviéremos va dellos años ascendiendo a Sen de los Mulos y la Pica Subes y pasáremos bien cerquina na nuesa primer ascensión a la Peña Salón, dende les cercaníes de la puente Bidosa. Esta vegada la idega yera conocer los seos de Vibulines, que daquella nun yeren tan conocíos y escapáronse a la nuesa circular.

Pa ellos, almorezareos na Huera en Cangues d'Onís, pa siguir l'escobiu los Beyos alantre, que tantes rutes diónos durante estos años que llevamos faciendo monte per Asturies y más en concreto nos conceyos d'Amieva y Ponga. Xubirmeos pela foz de los Andamios en coche, lo que ya ye toa una aventura, ablucando col llugar y les parés que cayen a dambos llaos de la foz del rigu Vibuli.

Covarriella (Morcín)

Seronda del 2024

Continuamos trabayando pela Covarriella, una vegada que tuvimos en setiembre l'apertura de los seutores orientales del Monsacru, zarraos pel añeramientu de zapiquera, que fácil que vuelva a repetise pal 2025 pente'l 1 de Marzu y el 31 d'Agostu.

D'esti xeitu, aprovechamos y namái que pude, subí un día en solitariu con Kíla y demientres Dani ocúpase de trabayar n'Aguya Madalena, yo metíme nel Aviru Campón, col envís de recuperar el pie de vía (pie de Kíla), col sofitu increyible de la perrina, que va faciendo cames y dexando repises embaxo de cada vía.

 

El nuesu llar particular... La fastera oriental de la Covarriella

Aparte del acondicionamientu del pie de vía, que rematamos xunto a Dani y Becky otru día que fuimos con material de desbroce, dexé una cuerda afitada na parte alta, alcontrándome dos paraboles esistentes, poro punxe una reunión que llevaba y rapelé mirando les posibilidaes a la mandrecha de les víes ya esistentes.

Xustu, onde entama la continuidá de roca, ya que na parte alta hai muncho "prau" como p'allargar les víes, alcontréme otres dos chapes a mou de reunión, qu'aproveché pa meter la reunión de lo qu'a lo postreru diba ser el final de dos víes nueves: Escampla la Borrina y Pie de Kíla.

 

Díes al solete na Aguya Madalena onde hai un bon garrapiellu de víes nueves y dures

En xunu, xustu'l día que diba intentar encadenar la última vía que tuviera prebando, apareciera'l guarda a echanos, más menos, amáblemente del seutor. Asina que tocaba volver a tastiala ya intentar l'encadene, sicasí, enantes d'eso un día con Santos, fuéramos a da-y un pegue a la vía a la manzorga'l seutor, faciéndola al segundu pegue, cotándola de 6c, desplomadín y pelín físicu pero mui guapa, anque con un tramu de roca feble.

Col pasu de los compañeros, tiramos bloques y llimpiamos tolo que pudimos, asentando'l grau nel 6c, sicasí, munchu procuru pente la segunda y tercer chapa, onde tenemos pendiente poner un cordín afitáu, pa facer el tramu de roca malo aseguráu, namás que salimos del desplome anicial pa llueu ya poder esguilar cómodamente ya que la roca meyora increyíblemente.

 

Equipando Escampla la Borrina pente'l ñublu y les vaques

Con 4 de les 5 víes encadenaes esistentes, centréme na de más a la mandrecha, cayéndome nel últimu movimientu duru hasta tres vegaes enantes de facelu y encadenala, paeciéndome 7b sele quiciás, pero 7b. Dempués, vendríen varies persones detrás, con métodu ya afitáu per mí y coles preses llimpines que dixeren que pudiera baxar a 7a+, asína que vamos dexala cola barrina y que'l restu d'esguilaores asiente'l grau.

Sacante d'esto la vía, ye 5 estrelles, con 4 chapes apretones enforma y regleteres y llueu munchos metros d'escalada perguapa que rondará'l 6b hasta la cadena. Con esti encadene, ya quedábame ensin trabayu nel Aviru Campón así que tocaba metese a equipar y prebar dempués dalguna nueva vía.

Dani probando la finísima y apretona entrada del 7b del L'Aviru Campón

Un domingu de meteo inestable, con bien de borrina, averámonos Ana y yo hasta l'Aviru y pente'l borrín tuviemos trabayando un pocu metiendo tola línea esi día, pente los dos y dándonos tiempu a da-y un peguín pa probar los pasos, paeciéndonos dura enforma, camentando que sería 7c de xuru y qu'Escampla la Borrina, sería un bon nome.

El siguiente día de prebes, xubiera'l collaciu Santos a macear los pinchinos qu'abrasaben nes preses principales de la vía y púnxose a llimpiar una regleta al llau d'un hombru, rompiendo la regleta, ensin danos cuenta que yera una puente roca, lo qu'a lo postreru, quedó un picu, clave pa poder movese a la entrada del bloque más duru de la vía.

Santos esfrutando d'unos a la segunda vía'l seutor (7a/+)

 

Dempués de pegues y más pegues, alcontrando hasta tres métodos distintos pa facer el bloque Santos, Dani y yo, quedéme a les puertes de facer la primera ascensión, cayéndome dempués del bloque, algamando l'encadene Santos, nun pegue épicu, nel que pudo cayer a cualesquier movimientu.

Magar de la primera, tocaron varios díes con posibilidaes de facela, anque manquéme nel antebrazu, por mor del métodu usáu, tirando d'un monodeu n'estensión, que tengo caltener ya qu'asina tenía pensada la vía y asina saldrá, ya qu'a testerón nun me gana naide, anque ya nun sé si me dará tiempu a facela antes del cierre.

Rubén nes apretaes d'aniciu del 7b del Aviru

Demientres cayeron pegues de preba de varies persones, Dani cuando algamó'l so métodu, tamién fue a facela, demientres yo centréme n'equipar y prebar otra vía a la manzorga d'Escampla la Borrina, que n'honor al trabayu de Kíla nel seutor, nomóse como Pie de Kíla y que pel momentu nun tien tovía primera ascensu.

Cola supervisión milimétrica de mio, Santos volvió a xubir cola so maza a quitar pinchinos abrasantes de les milenta regletes esistentes de la vía, paeciéndo-y que salía guapísima, teniendo la mesma sensación que yo cuando la probara, una ruta 4 chapes escalables, con un reposu mediu malu y ya, a fueu nuna secuencia, de presa mala, llarga hasta cadena.

Santos dando primeros pegues a Escampla La Borrina (7b+)

L'últimu día, que tuviera pel Aviru, diéra-y un pegue a Escampla la Borrina, ensin veme motiváu pal encadene, metiéndome entós en Pie de Kíla, aportando a la secuencia dura, cayendo a la so entrada. Cola calma, probé tolos movimientos y chapaxes, saliendo tolos pasos, apretando, pero saliendo hasta cadena, con sensaciones de rondar la vía, el 7b/+.

 

Quiciábes ye una vía mui de mi estilu, más qu'Escampla la Borrina, qu'aparte del bloque tien una secuencia de pasos llargos, que pa mi estatura faen que seya más duro y que cayera tres vegaes dempués del bloque, asina que nun tengo mui clara la cotación pa esta vía, ya que los collacios tornaron per ellí nos últimos tiempos, conmigo ya fuera de xuegu y viéronla infame por parte de Dani, que nun la probara y durísima, por parte de Santos que ya la tenía tocada.

 

Croquis actualizaos de L'Aviru Campón

Cuando comento que toi fuera xuegu, ye porque enantes de la Puente d'Avientu, tocóme pasar por boxes pa operame de la cadera, asina que tamos en plenu procesu de recuperación, poro nun sé cuando podré tornar al trabayu y dexar al menos equipada, la última vía que quería meter esta temporada.

Ensin más, agradecer a los que pasaron per esti seutor a trabayar antaño, el Pingüi (del que nun sé cuantes víes son suyes, quiciábes tres), ya que paezme qu'escaladores de la Cuenca, metieren camiento, los dos víes de la manzorga. Sicasí, lo importante, ye que recuperemos estos seutores escaecíos nel tiempu, porque sacante la primer vía nesi tramín, el restu, la roca ye ablucante y les víes son toes 5 estrelles.

-------------------------------------------------------------

Caranga Baxu (Proaza) - La Riquiebra - Canal del Cirio - Llampaseca - La Forcá - La Corraína - Senda La Cruz

23 Payares de 2024

Track: Caranga Baxu (Proaza) -La Riquiebra - Cirio - Llampaseca - La Forcá - Corraína - La Cruz

Ruta que tenía prevista dende l'añu pasáu, pero qu'ente la lesión del cadril y que nun mos xuntábemos los interesaos, quedó nel tinteru, hasta que la revisamos en condiciones, viendo los reportaxes de Victor (Pindio), Javi Cienfuegos y Yonatan (Los de las Claras), camentando que pudiera danos tiempu nesta dómina l'añu.

D'esti xeitu y avisaos toos de dir col equipu de bregar, xuntámonos nel pueblu proacín de Caranga Baxum, a les 9 la mañana, preparándonos pa salir a y cuartu, travesando les cais de Caranga, hasta la parte alta, onde atopamos camín, hacia los praos d'enriba'l pueblu, pasando pel depósitu d'agues que ye bon referente de que vamos bien.

 

Partimos de Caranga Baxu (250 m) con rises nervioses

Dende'l depósitu siguiremos camín alantre, hasta onde entama una vallina que paez nun tener salida de frente, teniendo que salir a la manzorga per una viesca, alcontrando senderu penriba d'una muria d'un prau, pa siguir siempre viesca alantre cola vista puesta nos parés del Risquiebru, enriba nuesa, a los qu'aportaremos travesando una llerona pelín inestable, na que topamos rastru de tar pisada y que vamos negociando como meyor podemos. 

Vamos ganando altor, sacando vistes al valle del rigu Teberga tres de nueso, mirando tamién con atención a la muria La Riquiebra onde topamos delles utreres y una cuevona na manzorga ensin accesu dalu. Al final de la llerona, toparemos que'l canalizu superior nun tien posible trepada, poro debemos salir a la mandrecha per una resbariosa viesca, upándonos a la parte alta del canalizu onde atoparemos rastros de senderu.

Teyeo (L.lena) - El Rebel.léu - Monte Tixirúa - La Escrita - La Tesa - La Caviyera - Treslacruz

9 Payares de 2024

Track: Teyeo (L.lena) - Monte Tixirúa - La Escrita - La Tesa - La Caviyera - Treslacruz

Ruta que tenía preparada dende va tiempu, ya que quería que'l grupu conociese la guapa foz de la Caviyera, que yo conociera baxando a fueu na Güeyinos del Diablu y que paecíame que paga la pena facela con calma y esfrutando de cada pasu. Sicasí, prestábame preparar una circular montañera y potente, poro púnxeme a investigar como ascender a la Tesa, de dalguna manera diferente, ya que la normal ficiéramosla cuantayá dende l'Alto'l Palo.

Como non, la poca info qu'algamé vino del blogue del collaciu Victor "Pindio" qu'anduviera a la recoyeta de nomes, na faldera de les canales que quería conocer. Poro, fícieme cola parte del track que servíame de referencia y tiré de "mapa y llapiceru" pa trazar la llínea a siguir peles pindies vallines que queríemos ascender.

 

Partimos de Teyeo (650 m) al pie del rigu Güerna

Sábadu de madrugar, tomando'l cafetín en Mieres, onde dexamos coches pa dir na furgo hasta Teyeo, preparándonos nun día pelín frescu y húmedu nel entamu, saliendo a caleyar pocu más alantre les 9 la mañana, cruciando'l rigu Güerna pa salir hacia les cabañes de Rucao, entamando a calecer músculos y dándonos cuenta de la sudada qu'espéranos güei por mor de l'altísima humedá.

Siempre per pista, diramos ganando desnivel, algamando vistes hacia la fastera contraria del valle'l Güerna, distinguiéndo guapos montes como la Carba Valsecu o el Tapinón y Siegalabá, que ficiéramos en travesía va dellos años, casi nestes feches, daquella con ñeve na parte alta y esti añu escosu dafechu y sin pinta d'entamar l'iviernu nel intre.

Entragu - Pena Gradura (Teberga)

Tolosantos 2024

Puente de Tolosantos, con bon tiempu, asina qu'averámonos hasta Entragu en Teberga, col envís, d'intentar continuar trepando tolo posible siguiendo la inercia que trayiemos d'Olba. El xueves parábemos pel aparcaderu d'Entragu, dando un paseín con Kíla hasta la Esplanada, viendo que taba bastante moyáu, tol tema chorreril, asina que diba tocar plaquear enforma.

Al día siguiente, llueu d'una nueche con conciertín nel Narciso, qu'estendióse un pelín de más, col día nubláu tiraremos hasta la Esplanada, metiédonos a prebar la Nirvana orixinal, una placa infecta de 7a+, al que-y metí un par de peguinos, enantes d'abandonala por temor a desyemar nel primer día.

La Pipeline L1 fuera la ruta más prestosa del puente

A última hora, llueu d'unes hores infames de solana, pudiera probar la Pipeline L1, que montárala Rubén, cayéndome de la cabera cinta a cadena, onde tien el pasu en realidá, dexándola montada pa madrugar al día siguiente, cosa que nun fuimos a facer, pente varios desayunos y pa cuando xubimos probara Anna la vía, sacando tolos pasos y cuando tocó meterme a dar pegue d'encadena, ya entrara'l sol xubiendo dende la tercer cinta sudando como un pollu, cayéndome na placa por nun mirar bien los pies.

Rubén destruyendo tolo que pillaba na Esplanada

 D'esti xeitu, escapamos pa la Esplanada onde taben Ani y Rubén, pasando'l restu'l día, dando unos peguinos pela mió parte a la Lady Di y Anna encadenara Jayefante, que tenía pendiente y probara la Dodi (7a+), costándo-y sacar los pasos d'abaxo. De la que baxé de desmontar la Lady Di, ya que nun me lo daben les yemes, probara los pasos en polea y allorié, con como pude facela a vista poniendo cintes.

 

Mañanes d'Entecampos y Esplanada aprovechando hasta que pegaba la solana

Dempués de cenar nel Sobia y pasar un ratín nel llocal del club, planchamos la oreya bien ceo y vamos llevantanos prontín, tando nel pié de vía d'Entecampos a les 9 y media la mañana. Bien motivaos, esta vegada, tócame entrar primeru y voi caleciendo deos, na fría roca, poniendo les cintes hasta la placa, onde cayera al día anterior, sacando sin problemes los pasos de placa y reposando con calma, antes d'entrar al bloque final, qu'esta vegada nun me costó gran cosa, faciéndola la Pipeline L1 pa calentar.

Anna entrara con brenga dempués, cayendo na placa, pero matizando bien los pasos, ya que-y quedaba pelín llargu un pasu llateral y tira dempués hasta la parte alta, onde resuelve ensin mayores problemes el bloque final, quedándo-y pendiente pa otra vegada, ya que nun hai quien pare ya de calor nel paré d'Entecampos.

Nueche estrellada... xelada mañanera asegurada

Cola mesma, decidimos baxar a la Esplanada, onde tamos un ratín tumbaos esperando por Ani y Rubén, decidiendo dar un par de peguinos a la Lady Di (7a) de nuevu y a la Dodi. Por suerte, paez ser qu'al tercer día d'escalada va too rodáu y fáigola poniendo cintes tamién, pudiendo montar a Anna la Dodi, de la que baxo, metiendo un pegazu y llevándosela tamién, quedándonos ya con cara de y agora que.

Pa rematar la xugada, Rubén fizo al mesmu tiempu Entropía a vista y poniendo cintes y Ani taba reventada de los dos díes enantes, asina que la decisión yera unánime, colar pa Samartín a tomar el vermú y xintar un menú, pa pasar la tarde tiraos tranquilamente per Teberga.

---------------------------------------------------------------------

Cabruñana (Grau) - Picu Sollera

6 Ochobre de 2024

Track: Cabruñana (Grau) - Picu Sollera

Continuamos desesperaos coles previsiones meteorolóxiques, abortando una ruta potente pal sábadu, por mor de les condiciones que nun se cumplieron y preparamos entós, pal domingu una mini ruta por dar un paseín nuna supuesta ventana mañanera, que tampoco cumplióse. Ye dicir, alcontrámonos con un día brutal de sol, cielos espeyaos, pero ensin dar tiempu pa preparar dalgo más potente, pues siguimos adelantre col plan.

Salimos de Cabruñana (355 m) nel conceyu de Grau

Asina pues, quedáramos en Grau p'almorzar cola calma, viendo'l día guapu que teníemos y siguimos en coche hasta Cabruñana, onde díbemos tener el nuesu puntu de partida. Preparámonos y saldremos caleyando pel Sampedru, pasando al llau d'un llavaderu pa continuar per pista, per una viesca bastante guapa que tien de dexanos nel colláu de L'Ascura, baxo la faldera del picu Subarrionda.

Les Texeres (Riosa) - L.lamo - Mines de Texéu - Llazarandín - Picu Santiagu - Fondu la Vega - Cuesta Penallonga - Panderraíces

28 Setiembre de 2024

Track: Les Texeres (Riosa) - L.lamo - Mines de Texéu - Llazarandín - Picu Santiagu - Muena - Panderraíces

Tornábemos una vegada más al cordal del Aramo y facíemoslu col envís, de continuar conociendo dellos requexos, de la fastera oriental. Nun va muncho que tuviéramos de visita poles mines de Texéu,  quiciás ún de los llugares más ablucantes d'Asturies, pero aquella vegada saliéramos hacia la Peña Los Bescones y baxáremos pel camín del Fierru a Espines, pa terminar de nuevu en L.lamo.

Esta vegada queremos pasar de nuevu peles mines pero queremos salir al puertu Aramo, más en concretu hacia Llazarandín pa encumar el Picu Santiagu y descender hacia los pueblos de Panderraíces. Asina qu'averámonos hasta L.lamo, pero alcontrámonos que son les fiestes y tienen la carretera cortada, pa que pueda aparcar los vecinos pa la folixa, asina que damos marcha atrás y aparcamos en les Texeres.

Partimos de les Texeres (585 m) anque la semeya ye en L.lamo

Asina pues, caleyaremos per carretera menos d'un kilómetru y mediu hasta L.lamo, onde charramos un pocu colos vecinos y continuamos camín hacia les mines de Rioseco, alcontrando cambios fonderos de va un añu nes instalaciones, con toles construcciones termináes, un ampliu aparcaderu pal pobláu y tolos cartelos desplicativos anovaos y munchísimos detalles decorativos col llogu de les mines bien guapos.

Porrimán (Morcín)

Branu de 2024

Morcín sigue creciendo en muros y sobretou en muros a la solombra, eso sí, pa ello toca bregar, trabayar y llimpiar parés nortiegos, así qu'imaxinaros el currazo que lleva, equipar, sanear y cepillar les víes en fasteres norte, asina que dende ya, tol agradecimientu a los equipadores, d'esti otru seutorín na escuelina de Porrimán, qu'asítiase, xusto al par de la senda verde que va hacia la cantera de Peñamiel.

Con esti seutor, podríemos dicir que tenemos tres, si contamos Peñarrubia, que ta penriba'l farayón que baxa dende la Peña Garcilleru. Nesti casu, esti seutor al que nomen Porrimán Inferior, en realidá, les víes más altes entamen na Vallina Altu, lo mesmu que Porrimán Superior, ta asitiáu enriba la Vallina Baxu, poro ye un bon enguedeyu de nomes jaja, porque indiquen lo contrariu, pero ye que si miramos la muria norte, dende la carretera, vemos cláramente como divídese por dos vallines, la baxa que sal dende'l rigu Rios y la  alta penriba de les últimes víes de Porrimán Inferior.

Coses de la toponimia, aparte, vamos alcontrános con un murazu increyible, desplomáu, nel que podemos esguilar casi hasta cuando tenemos lluvia, poro fueron unos cuantos díes de meteo terrible, les que tuvimos per ellí probando les víes. Espero volver, muncho más pa sacar semeyes, porque ye una pena nun poder dar referencia del murazu que ye con más semeyes, anque eso, si tamos falando d'un muru práuticamente de sétimos medios-altos y octavos na parte alta, penriba de la sienda y de momentu, de sétimos baxos na parte baxa la sienda.

Alex y Orli caleciendo deos nun 6c (La Cencerra) bien guapu

Nes poques visites que fice, pude llevame La Cencerra un 6c de primer llargu, na parte baxa de la sienda, mui guapín, perfeutu pa "calentar" y tuve la "suerte", de ser de los primeros en llimpiar y cepillar les dos víes siguientes, La Sombra del Sol (7a+) y Diedro di Manuale (7a) que nun pude encadenar, pero qu'al menos tarán ya más llimpies ya que baxé como si tuviera enyesando una paré.

Na parte alta la sienda, la primer vía (6b) nun paez mui recomendable, pero la siguiente El día menos pensado (7a) si que ye una ruta buena, con parte baxa plaquera con pasín finu de regletéu, un tramu cenciellu, nel que tenemos que tener curiáu cola roca de baxa calidá y llueu saldremos ya per desplome de cantarral hasta cadena, terminando la vía guapísima.

La otra vía de su manzorga Irati (7b) ye del palu del 7a pero más guapa entá, eso sí munchu güeyu nes tres primeres chapes que tien un bloque cabrón y debemos tar sollerte, pa siguir escalando hasta'l siguiente bloque, el más duru de la vía xustu na metá, pa salir a tarrén cenciellu onde reposaremos y tendremos al igual que nel 7a, un tramu de chorrera y xarrada física pa terminar plaqueando hasta cadena... un rutón.

Hasta equí pueu falar, ya que nun torné a tocar más víes, asina que tendremos qu'igualo... y a sacar semeyes.

--------------------------------------------------------------------------------

Seaza (Grau) - Picu'l Víu - Picu Pedroriu - Moutas - La Fuexa

 22 Setiembre de 2024

Track: Seaza (Grau) - Picu'l Víu - Picu Pedroriu - Moutas - La Fuexa

Entamábemos temporada 2024 - 2025 dempués d'un final bastante apoteósicu de l'anterior, con una Travesera per Picos bien potente y un par de rutes de muncha calidá per tierres llioneses al Cuetu Ancino y a la Peña Forqueta. completando un branu montañeru escelente.

Pero como non, la meteo pal entamu de temporada, nun yera afayaiza y tuviemos que buscar una rutina curtia nuna ventanina de bon tiempu, que dexáranos tiempu pa poder picar dalgo dempués. Pa ello, preparamos una circular al traviés del cordal del Pedroriu, llende pente'l conceyu de Miranda y Grau.

 

Partimos del pueblu de Seaza (485 m) nel conceyu de Grau

Quedaremos a una hora prudente p'almorzar en Grau capital y saldremos hacia la GR-4 que percorre'l valle del rigu Vega, conduciendo per llugares realmente guapos hasta'l Puente Seaza, onde tomamos una pista asfaltada, per pindia hasta'l pueblín de Seaza, onde aparcamos a la entrada'l pueblu y preparámonos pa caleyar.

Cualladrona (Morcín)

28 d'Agostu de 2024

Continúabemos con esti añu estrañu no meteorolóxico, onde pudimos esguilar onde mui pocos sitios, como na Cualladrona o el Cantu la Sierra, baxando munches vegaes moyaos o llibrando de milagru na parte más desplomada de la Cualladrona, nes víes de la mandrecha'l seutor principal, o dando pegues rápidos nel Texu probando les víes que nos van quedando más a bloque.

 

Silvia plaqueando na Placa d'Arriba de la Cualladrona

Por embargu, quiciábes la mayor novedá nesta escuela, ye la creación d'un nuevu seutor na parte alta de la Cualladrona, al qu'apórtase caleyando cuesta arriba dende la Cualladrona, pasando per delantre del Texu, La Fayona y penriba d'una cuevina vallada, por restos arqueolóxicos, alcontrarémonos con una placona, del tipu la Fayona o Texu, pero más durina de trepar, con plaques casi nidies en dalgunos tramos y na parte baxa del seutor víes de sétimos medios bastante téunicos.

Faciendo Blue Magic... un 7a bien completu de la Placa d'Arriba

Gracies al trabayu, como non, de Poch y cola ayuda de Fer, fueron creando un seutorín nuevu, onde pudimos probar dalgunes víes durante'l branu, siempre acompañando a los equipadores, faciendo dalgunos sestos baxos anque pelín duros de la manzorga la placa y sobretóu dando dellos pegues a Blue Magic, un 7a bien plantáu, nel mió mou de ver a la mandrecha'l seutor.

Quedándome con ganes de probar munches más víes, quedamos a espenses de la meteo, ya que la placa tien mal secar al tar mui metída na viesca y cuésta-y munchu nun alcontrar colos furacos de munches preses flitrando agua, asina que podremos esfrutar d'esti nuevu seutorín nun branu dalgo más secu qu'esti añu, que ta siendo un pocu infernal pa la escalada n'Asturies.

 

-----------------------------------------------------------------------------

Santolaya (Morcín)

 21 Marzu y 22 Agostu de 2024

Nuevu sectorín na redolada de Santolaya en Morcín, que tanta falta-y fae a esti pueblu, ya que col cierre de Figares, los chigres vense afeutaos pola falta d'escaladores, que pasen toos pal siguiente valle del rigu Riosa, na Foz de Morcín, onde asítiense escueles como Otura, Peña Manteca, Cualladrona,... y munches más escueles a lo llargu del valle.

Ana esfrutando de les guapes víes del Sidrán

Asina que vien estupendamente qu'intentemos sacar dalgo de provechu a los muros esistentes na fastera del Picu La Llera, xustu enriba de Santolaya. Nesti casu, el seutor que vos presento ta na parte más baxa de la faldera, un pelín penriba de la cueva del Sidrán, cueva que podéis ver a la vuesa mandrecha de la que venís d'Argame a Santolaya.

 

Vistes del muru equipáu por Dani Andrada dende'l camín hacia Santolaya

La opción más rápida p'aportar al seutor, ye aparcar en Santolaya y caleyar pela carretera hasta la cueva'l Sidrán onde pocu más alantre, a la entrada d'un túnel del tren, toparemos un senderu que xube penriba'l túnel, alcontrándonos a la manzorga col antiguu y guapísimu camín que vien dende Santolaya y nós deberemos ascender hacia la mandrecha per un claru senderu hasta ver el murín enriba nuesa.

 

El murín del Sidrán dende'l camín a Santolaya

Alcontrarémonos con un murín con 7 víes guapísimes pente 6a+ y 6c+, de placa vertical, con un tastu a la roca de Frechura pero con meyor adherencia. Personalmente, gustáronme toles víes que pude facer, saliendo a vista nun par de díes de visita, una en Marzu y otra n'Agostu, poro como podréis comprobar, el seutor tien sombra práuticamente tol día, al tar empozáu na parte baxa del monte.

Vistes dende'l camín antiguu que llévanos hasta Santolaya

Lo dicho, sectorín bien guapu, qu'esperemos nun se pierda, siendo una pena que'l muru nun de pa más víes, sicasí, toes y digo toes, merecen la pena. Como siempre dar les gracies a los equipadores, Sergio, Pablo,... pol currazo y a los que vayáis, pues ya sabéis, aprovechar pa llimpiar el paré, ya que tien tendencia a crecer la vexetación nos furacos, sinon tien un continuu d'escaladores.

 

Croquis del sectorín del Sidrán en Santolaya

Por últimu, dicir, que paga la pena muncho, volver pel camín antiguu a Santolaya anque seya un pelín más llargu, tanto poles vistes, como polo guapu del camín armáu sola carretera, ya que tamién, pudiera sirvir nun futuru, tener esti camín llimpiu pa tener accesu a dellos muros qu'espero completen un pelín esta posible escuela de Santolaya nel picu La Llera.