sukdanan nga lista alang sa mga bag-o nga mistiko

(hubad sa Iningles nga balak ni Li-Young Lee)

Suga, aron mabasa nimo ang mga pulong sa tablita.
Kamot aron masundog nimo ang mga laray sa pulong nga imong makaplagan.
Kamot nga pahulayan sa imong ulo.

Mga tiil nga mosayaw sa lakbit-saysay sa imong nakaplagan.
Langgam nga motilok sa imong kasingkasing.
Langgam nga motabang nimo paglitok sa linya sa mga pulong.

Gininhawa nga mopaypay sa pugaran sa ka’yo.
Hurnohan sa pagsuway sa napilian.
Korona nga ipabilin ilawom sa tiil.

Duha ka mata nga motan-aw sa usa sulod sa usa.
Tulo nga motan-aw sa duha sulod sa usa.
Pito nga motan-aw sa tanan sulod sa usa.
Kamot nga mopapas sa imong nga’n.

Asno nga mopas-an sa imong tai.
Unggoy nga moyuhot og sinsiyo ug pagkaon.
Igsoong lalaki nga motudlo sa agianan.
Igsoong babaye nga moluwas sa gibalibaran.
Igsoong babaye nga motubos sa mga uhot.
Igsoong babaye nga mopukaw nimo pakapin og mga halok
dihang nitidlom kang natagpilaw sa imong sinulat.

lutaw nga langit

(alang kang Barack Obama sa iyang pagpanumpa)

Kanang panganod nga gapaanod
ibabaw sa among kapupod-an sa sabakan
sa Pacific Ocean mao ra'y dagway

anang galutaw sa Capitol Reflection Pool
diin wala'y kisaw nga gapauraray ang tin-aw
nga anino sa Washington Monument
nga buot unta nakong mao'y sangitan
sa mga tabanog nga tulilik sa bulhot
sa aso ug abog nga gaulbo gikan
sa mga suok-suok sa kalibotang
natugsaw ug nagkaunlod sa lapok.

Itugpo ko kining akong gambalay
nga papel tuskig sa tukog sinapsap
gikan sa lubi ug kawayan alang
sa akong duha ka anak ug namong tanan
nga gahangad sa langit sa imong ngalan.

batang rugby, nga abi nako’g gaampo sa hulagway sa mantalaan nga nangalisbo sa tawhanong kahuyang

Aso sa ahos nga gigisa
(adobong baboy, barilis nga minantikaan),
ug alisngaw sa utan tinunoan nga gisugkay
sa bag-ong haon nga humay.

Alimyon sa sampaguita
nga gituhog aron ihalad ibabaw sa altar
diha sa tiilan sa mga balaan nga nagluom
og paminaw sa mga tarantar nga hungihong
sa among wala’y hunong ug wala’y
katagbawan nga kagutom.

Alisngaw sa dakbayan
nga nagwara-wara sa iyang mga panghaw.
Mora’g mga kandila sa simbahan diin
nasaag ang irong kibol, nanimhot mora’g
buot motultol sa lawas nga nahanaw
ug nadugta padulong sa kalimot.

Hala, dong, hingos pa!
Padayon hangtod manug-ab imong ilong
samtang wa po’y kataposan ang panihapon
sa among pagpabadlong.

pagkaon og piniritong manok

(hubad sa balak ni Linh Dinh)

Gadumot ko pag-angkon ini, igsoon, apan naa’y mga higayon
Dihang gakaon ko og piniritong manok
Dihang wa ko’y laing gihunahuna kon di pagkao'g piniritong manok,
Dihang hingpit kong nalimot kabahin sa banay, dungog ug nasod,
Mga nagkalain-laing dugoon nga utang nga bayranan nimo nako,
Ang akong kanhi mga kauwaw ug umaabot nga salaod--
Tanan, sa lakbit, gawas sa kagumkom nga panit sa akong
piniritong manok.

Apan dili ko yawan-on sa kinatibuk-an, naa’y mga higayon
Nga magdumili ko pagtilap ug pagtulon sa bisan unsa
Nga dili kasagaran matilawan sa katawhan.

(Nga, kon imong hunahunaon, sa bug-os wala gyod.)

Ug wa’y duda mao na nganong ang mansanas mao’y
hinungdan sa kagubot,
Ug ang karne nagdala og kaulaw,
Ug matag hangak sa hangin mao
Ang magpahuot sa baga og pulbora sa pusil ug aso.

nag-ampo na ka

(hubad sa balak ni Li-Young Lee)

Dihang ang hangin
Nilingi ug nangutana, sa tingog sa akong amahan,
Nag-ampo na ka?

Nakahibalo ko og tulo ka butang. Usa:
Dili nako mahuma’g tubag ang mga patay.

Duha: Ang tawo upat ka hangin ug tulo ka kayo.
Ug ang upat ka hangin mao’y tingog sa iyang amahan,
tingog sa iyang inahan…

O tingali siya ang pito ka hangin ug napulo ka kayo.
Ug ang mga kayo nanan-aw, naminaw, nanghikap,
nagdamgo, naghunahuna…
O siya kaha ang ginhawa sa Ginoo?

Dihang ang hangin nahimong magpapanaw
ug nangutana, sa tingog sa akong amahan, Nag-ampo na ka?
Nakahinumdom ko og tulo ka butang.
Usa: ang gugma sa amahan

mao’y gatas ug asukar,
duha-sa-tulo nga kabalaka, duha-sa-tulo nga kasubo, ug unsa’y nabahaw

mao’y gigunting ug gipatubo aron mahimong pan
nga sa mga patay ug mga buhi saw-an.

Ug ang pagpailob? Mao na ang pagsugakod
sa makapakitbi nga pagpatubo ug pagmasa.

Ug ang kinaadman? Mao na ang nawong sa akong amahan
sa pagkatulog.

Dihang ang hangin
nangutana, Nag-ampo na ka?
kahibalo ko nga kini mao ra ako

nga nagpahinumdom sa akong kaugalingon
ang buwak usa ka hunonganan tali
sa tinguha sa kalibotan ug himaya sa kalibotan, ug ang dugo

mao ang kayo, asin, ug gininhawa sa wala pa
kini nagpadali sa bisan unsang batuta o sanga, o kasway
nga gipukaw nga nagsulti. Kini ako ra

sa boda sa hangin,
o ang akong amahan pinaagi nako, nangutana:
Nakakita na gyod ka sa imong dangpanan?
Nangutana, Nalipay ka ba?

Kahibulongan. Nasamok nga amahan. Malipayong anak.
Hangin nga duna’y tingog. Ug ako nga nakigsulti sa wala.

gikan didto sa sears tower

Nakutaw ang akong kuto-kuto
ug kalimutaw didto sa kinahabogang bahin

sa America. Lupig pa nako’y luwan
sa barko nga nalukapa sa pangpang
sa unos, gibagnos sa gabungtod
nga mga bawod. Sa akong pagtambo
tidlom sa kilumkilom, gihikyad
sa dakbayan sa Chicago ang lawod
sa mga dagitab. Ay, dili diay hinubog
ang pasiatab ni Carl Sandburg:
“Come and show me another city…
so proud to be alive.”

Apan ambot nganong kalit lang nalagpot
ang gilawmon sa akong panghupaw
ngadto sa bukid sa Busay. Didto diin
ang pusod sa kagabhion kanunay
sayon matultolan, labi na kon
tutokan ang parola sa Liloan.

pagbasa sa gabii

(hubad sa balak ni David Ignatow)

Unsa’y akong nakat-onan nga mohupot nako
gikan sa yanong pagmatuod sa akong pagkahimatyon?
Wala sa mga hunahunang akong nabasahan magpabilin
uban nako og dugay, akong nakit-an ang kangitngit
nga nisuksok alirong nako samtang akong gisirad-an
ang libro ug nagdali ko pag-abli ini
pag-usab aron pasagdan iyang kahayag sa pagsilaw
sa akong dagway

kinutoban sa kahinam

kon pananglit masaag ko
sa mahayag nga padulngan ug
mabiyaan sa panahon nga padayon
paghikyad nianang mga pulpog
nga dahon sa akong agianan

hinaot intawon makaw-itan
sa akong dila ang galabyog
nga sumpay sa taghoy subay
sa ginhawa sa akong inahan
dihang gihawanan sa laylay
ang lasang sa katulogon

unta dili ko mawitkan
sa sanga sa damgo nga wala
mamunga ug igo rang magmahay
maghilom bisan pa’g buot ko
manawag sa batang laagan
nga naatlan sa iyang kalaay

unta kuyogan ko niya bisan pa’g
makasunggo ang hangos sa uwan
sa udtong tutok hangtod ngadto
sa kinasang-an sa hilanat
ug sulirap sa kahiamgo

nahanaw ang langgam

(hubad sa Iningles ni Sam Hammil gikan sa balak ni Li Po)

Nahanaw ang mga langgam padulong sa langit,
ug karon nahubas palayo ang kataposang panganod.

Kuyog mi'g lingkod, ang bukid ug ako,
hangtod ang nagpabilin mao na lang ang bukid.

tan-awa

(hubad sa Iningles ni Olav Grinde gikan
sa balak ni Rolf Jacobsen)

Gapakli ang buwan lahos sa libro sa kagabhion.
Gakaplag sa lanaw diin wala’y napatik.
Gadibuho og tul-id nga linya. Mao ni tanan
iyang gibuhat. Igo na kini.
Baga nga linya. Tul-id paingon nimo
—Tan-awa.

usa ka gabii sa kinabuhi sa sinuholang mamumuno

ug nipaghot ang tambutso sa iyang motorsiklo
bulhot palayo sa lanog sa iyang pistola ug sa pula
nga alibwag sa anino sa nalup-og: nagnganga

gipaksi niya ang tabon sa iyang nawong ug ulo
sa pagnaog niya tungod sa iyang barong-barong

gituktok niya ang pultahan samtang gisangpit
ang asawang’ nagkagidlay og laylay sa ilang anak

gihapuhap sa iyang halok ang hilak sa masuso
nga kalit nahinanok sa kainit sa iyang kamot

ug naghuwat sa talad ang namugnaw nga sabaw
ug hagkot nga hiwa sa nilat-ang baka: lami usbon
og ihaw aron di na magkagot sa iyang ngipon

kahilom

(hubad gikan sa Iningles ni William I. Elliott ug
Kazuo Kawamura sa balak ni Toshio Nakae)

Kon mahimong magpakabuhi ko nga dili makigsulti bisan kinsa
ug makig-ambit lang uban sa mga mananap ug mga tanom,
hastang linawa ug lagsika kaha sa kiat sa akong kasingkasing.
Makigsawo dayon ko sa tanan uban nila,
ug, sama nga di masukod ang kabahandianon ug kawala’y bili sa kalibotan,
makigsayaw sa kawanangan nga hanginon ug magdula ibabaw sa kabukiran ug hawanan. Makigsulti ko sa kaisdaan tibuok adlaw,
bisan ang kalanggaman hatdan kita sa ilang tinagoang timailhan,
samtang mangitik ang hangin sa atong mga dunggan kun motusok sa atong mga utok ug mopadayag lang sa gikinahanglan.

Ug kon mahimong magpabilin kong hingpit nga hilom uban sa matag usa,
mahimo ko nga pinuy-anan nga gawasnon sa mga insekto ug ulod,
ug mahimo ko nga kabukiran ug kasubaan,
magmagahi ug magdagayday,
usahay magdugdog, masunog ug magdahunog,
usahay mosid-ok ug moingon ‘Whoosh!’
Sa laing bahin, bisan unsaon, hingpit kong maghilom,
ug mosangpot sama sa yuta nga maglupad tadlas sa kawanangan,
hilom nga matigulang uban sa kalibotan.

duha ka tinagup-at

(hubad sa Iningles ni Marilyn Chin gikan

sa balak ni Ho Xuan Huong)

Suso

Si nanay ug si tatay nakaanak og suso.
Gabii ug adlaw nikamang ko sa nanimahong kasagbotan.
Mahal nga prinsipe, kon nahigugma ka nako, ablihi ang ganghaan.
Hunong, ayaw ikulitog imong tudlo sa akong ikog!

Nangka

Ang akong lawas sama sa nangka nga gatabyog sa kahoy.
Sapnot akong panit, dasok akong unod.
Mahal nga prinsipe, kon buot mo akong tugsakon sa imong kuhit
Ayaw pangumot, magtubod unya ko ug maglama imong mga kamot.

labing lunhaw: pamalandong samtang gihuboan sa tingtugnaw ang mga sanga sa america

Layo’g labyog kanang panon sa mga dahon,
Galumpayat. Wa’y kalainan sa mga gapnod

Gikan sa gakos sa lasang tadlas sa naglawod
Nga Autumn. Ania gatapok sila sa akong tiilan,

Natumban. Ug ang kasikas sa nitaliwan nilang
Kalunhaw nikisaw pagbalik sa mga sagbot,

Nangagupok sa halok sa akong lapalapa subay
Ug tadlas sa tampi sa suba sa Mananga diin

Nitugsaw ang kalanggaman sa nagbawod
Ug naglandong nga labong sa kawayanan.

nahisakop ko didto

(hubad sa Iningles ni Carolyn Forché
gikan sa balak ni Mahmoud Darwish)

Nahisakop ko didto. Duna ko’y daghang panumdoman.
Natawo ko sama sa uban.
Duna ko’y inahan, balay nga daghang bintana, mga laking igsoon, mga higala,
ug selda sa prisohan nga duna’y tugnaw nga bintana! Duna ko’y bawod
nga gisakmit sa mga kanaway, usa ka talan-awon nga akoa ra.
Duna ko’y natuhop nga balilihan. Sa ilawom nga kanawkanaw sa akong pulong,
duna ko’y buwan, kabaskog sa langgam, ug wa’y kamatayong kahoy nga uliba.
Dugay kong nagpuyo sa yuta sa wala pa ang mga tawo gihimong
tukbonon sa mga espada.
Nahisakop ko didto. Dihang ang langit nagbangotan sa iyang inahan,
akong giuli ang langit sa iyang inahan.
Ug nihilak ko aron ang gapauli nga panganod modala sa akong mga luha.
Aron lapason ang mga lagda, nakat-onan nako ang tanang pulong
nga kinahanglanon sa pagsuway nga dugoon.
Nakat-onan ug nabungkag nako ang tanang mga pulong aron kuhaon
gikan niini ang usa ka pulong: Pinuy-anan.