Կոսավա (բելառուս․՝ Ко́сава, լեհ.՝ Kosów Poleski, լիտ.՝ Kosovas, ռուս.՝ Кóссово, իդիշ՝ קאסעוו), քաղաք Բելառուսում՝ Բրեստի մարզիԻվացևիչիի շրջանում, շրջկենտրոնից՝ Իվացևիչի քաղաքից մոտավորապես 15 կիլոմետր հեռավորության վրա։ Մոտակա Մերեցևշչինա գյուղում է ծնվել Տադեուշ Կոսցյուշկոն։ Մերձակայքում են գտնվում Կոսավայի ամրոցի ավերակները (ամրոցը 1830 թվականին կառուցել են Պուսլովսկի ազնվականական տոհմի ներկայացուցիչները)։
Ներկայիս Կոսավայի տարածքում մարդիկ բնակություն են հաստատել X—XI դարերում։ Պահպանվել են X—XII դարերի ոչ մեծ քաղաքի մնացորդները։ Պատմական փաստաթղթերում Կոսավան առաջին անգամ հիշատակվել է 1494 թվականին մեծ իշխան Ալեքսանդր Յագելոնչիկի ընծայագրում։
1510 թվականին մեծ իշխան Սիգիզմունդ Առաջինը քաղաքին, որն արդեն շրջկենտրոնի կարգավիճակ ուներ, առևտուր և տոնավաճառներ կազմակերպելու իրավունք է շնորհել։ 1565—1566 թվականներին Կոսավան հայտնվել է Լիտվայի մեծ իշխանության Նովոգրուդեկի վոևոդության, 1795 թվականին՝ Լեհաստանի երրորդ բաժանման արդյունքում՝ ռուսական կայսրության կազմում։ 1825—1855 թթ. այստեղ գործել է գործվածքեղենի, 1845-ից՝ գորգագործական ֆաբրիկա, տարիների ընթացքում բացվել են նաև այլ ձեռնարկություններ. ընդհանուր առմամբ քաղաքի հիմնարկ-ձեռնարկություններում աշխատել է մոտավորապես 2.000 մարդ։ 1865 թվականին Կոսավայում բացվել է ժողովրդական ուսումնարան։ 1868 թվականին կառուցվել է սբ. Անտոնիոսի եկեղեցին։