Click on a word to bring up parses, dictionary entries, and frequency statistics
[6]
Multum autem fluxisse
video de libris nostris, quos compluris brevi tempore
edidimus, variumque sermonem partim admirantium
unde hoc philosophandi nobis subito studium extitisset, partim quid quaque de re certi haberemus scire
cupientium; multis etiam sensi mirabile videri eam
nobis potissimum probatam esse philosophiam, quae
lucem eriperet et quasi noctem quandam rebus offunderet, desertaeque disciplinae et iam pridem relictae [p. 4]
patrocinium necopinatum a nobis esse susceptum. Nos
autem nec subito coepimus philosophari nec mediocrem a primo tempore aetatis in eo studio operam
curamque consumpsimus, et cum minime videbamur
tum maxime philosophabamur; quod et orationes declarant refertae philosophorum sententiis et doctissimorum hominum familiaritates, quibus semper domus
nostra floruit, et principes illi Diodotus Philo Antiochus Posidonius, a quibus instituti sumus.
de Natura Deorum. M. Tullius Cicero. O. Plasberg. Leipzig. Teubner. 1917.
This work is licensed under a
Creative Commons Attribution-ShareAlike 3.0 United States License.
An XML version of this text is available for download, with the additional restriction that you offer Perseus any modifications you make. Perseus provides credit for all accepted changes, storing new additions in a versioning system.