Erabilerraztasun-osagarria

Kontrolatu telefonoa edo tableta erabilerraztasun-etengailuekin edo aurreko kamerarekin. Elementuak hautatzeko, gora/behera egiteko, testua idazteko eta gauza gehiago egiteko erabil ditzakezu erabilerraztasun-etengailuak.

Erabilerraztasun-osagarria aplikazioaren bitartez, erabilerraztasun-etengailuak erabil ditzakezu Android-eko gailuarekin interakzioan aritzeko, ukipen-pantailaren ordez. Erabilerraztasun-osagarria lagungarria izan daiteke zuzenean gailuarekin interakzioan aritu ezin bazara.

Erabiltzen hasteko:
1. Ireki gailuko Ezarpenak aplikazioa.
2. Sakatu Erabilerraztasuna > Erabilerraztasun-osagarria.

Erabilerraztasun-etengailuak konfiguratu

Erabilerraztasun-osagarria aplikazioak pantailako elementuak hautematen ditu, eta bakoitza nabarmentzen, bat hautatzen duzun arte. Erabilerraztasun-etengailu batzuk dituzu aukeran:

erabilerraztasun-etengailu fisikoak
• USB edo Bluetooth bidezko erabilerraztasun-etengailuak (adibidez, botoiak edo teklatuak)
• gailuko erabilerraztasun-etengailuak (adibidez, bolumen-botoiak)

kamerako erabilerraztasun-etengailuak
• ahoa irekitzea, irribarre egitea edo bekainak igotzea
• ezkerrera, eskuinera edo gora begiratzea

Gailuko edukia hauteman

Erabilerraztasun-etengailu bat konfiguratu ondoren, pantailako gauzak hauteman ditzakezu, eta haiekin interakzioan aritu.

• Mugimendu lineala: joan elementu batetik bestera, banan-banan.
• Errenkadaz errenkadako mugimendua: mugitu pantailan errenkadaz errenkada. Hautatu errenkada bat eta joan zerrenda horretako elementu batetik bestera.
• Puntukako mugimendua: erabili mugitzen diren lerroak kokapen horizontal eta bertikal zehatz batera iristeko. Gero, sakatu Hautatu.
• Talde-hautapena: esleitu erabilerraztasun-etengailuak kolore talde desberdinei. Pantailako elementu guztiei kolore bat esleituko zaie. Sakatu erabili nahi duzun elementuaren inguruko koloreari dagokion etengailua. Murriztu taldearen tamaina, nahi duzun elementura iritsi arte.

Menuak erabili

Elementu bat hautatzen denean, erabil daitezkeen interakzioak dituen (adibidez, hautatu, gora/behera egin, kopiatu, itsatsi eta abar) menu bat ikusiko duzu.
Halaber, beste menu bat agertuko da pantailaren goialdean, gailuan zehar mugitu ahal izan zaitezen. Adibidez, jakinarazpenak ireki ditzakezu, hasierako pantailara joan, bolumena aldatu eta abar.

Kameraren erabilerraztasun-etengailuekin nabigatu

Kameraren erabilerraztasun-etengailuei esker, aurpegi-keinuak erabil ditzakezu telefonoan nabigatzeko. Arakatu edo hautatu telefonoko aplikazioak telefonoaren aurreko kamera erabilita.
Halaber, keinu bakoitzaren sentikortasuna eta iraupena pertsonaliza ditzakezu, zure beharretara egokitzeko.

Lasterbideak grabatu

Ukipen-keinuak graba ditzakezu haiek erabilerraztasun-etengailu bati esleitzeko edo menu baten bidez abiarazteko. Besteak beste, ukipen-keinu hauek graba ditzakezu: atximurkatzea, handitzea edo txikitzea, gora/behera egitea, hatza pasatzeko mugimendua edo birritan sakatzea. Ondoren, maiz egiten diren edo konplexuak diren ekintzak abiaraz ditzakezu erabilerraztasun-etengailu bakar batekin; adibidez, ezkerrera birritan hatza pasatzeko mugimenduaren keinu bat graba dezakezu liburu elektroniko baten bi orri pasatzeko.

Baimenen oharra
• Erabilerraztasun-zerbitzua: aplikazioa erabilerraztasun-zerbitzu bat denez, zure ekintzak ikus ditzake, baita leihoetako edukia eskuratu eta idazten duzun testua ikusi ere.