1- ما تبطلش تزرع في ذكريات ولادك مواقف حلوة، دي اللي هتنفعهم بعدين وهتنفعك أنت كمان لما يفتكروك بعد ما تموت وتخليهم يترحموا عليك.
وأكيد مش من ضمن الذكريات الحلوة: المشاجرات العائلية، ولا خناقاتك مع أمهم، ولا تهديدك ليهم لو جابوا درجات مش حلوة، ولا ضربك ليهم أو شتيمتهم او نعتهم بالغباء لأنهم مش طول الوقت ماسكين الكتاب بيذاكروا...
استمتع بالنعمة اللي معاك، نعمة ولادك حواليك، لأنك فجاة هتلاقيهم كبروا وبقى ليهم حياتهم اللي وارد جدا تكون بعيدة جدا عنك.
2- ليه بعض الرجال لما تيجي سيرة المرأة في العموم يتكلموا عنها بتحفز وعداء؟!
مع إن المرأة هي أمه اللي ما يقدرش يعيش من غيرها، وبنته اللي شايله اسمه، وزوجته اللي بيحتاس من غيرها، وأخته عضده في الدنيا.
يعني لو كرجال هتجاملوا بعض فهتلاقي الست اللي مش عاجبك تصرفها ولبسها وسلوكها في العموم، وارد تكون ابنة أو أخت أو زوجة او أم لراجل زيك برضه.
يعني خارجة من بيت شايفينها وعارفينها وسلو عيلتهم إن ده كده تمام، فسيادتك بتعدل عليها ليه وهي ما تخصكش في حاجة؟
يعني على الأقل كرجال جاملوا بعض، ما تسمحش لواحدة تتهان أو يتعدى عليها باي شكل قصادك، لانها وحشة في حقك قوي كراجل عنده نخوة وعنده حريم يخاف بتحطوا في نفس الموقف لوحدهم وما يلاقوش حد ينصفهم.
3-عزيزي الرجل: أنت محتاج تتعلم تعمل شؤون البيت المختلفة.
أولا: علشانك، بصفتك إنسان عاقل ومعافى جسديًا.
وثانيًا: علشان لو الست اللي هتعيش معاك تعبت، ما تحتاسوش أنتوا الاتنين.
4- عايزين نبدل الخطاب المجتمعي من: "شوف كانت لابسة إيه" لـ "عيب تبص على بنات".
الأمل في الأمهات الجداد، ازرعوا ده في مخ ولادكم من وهما صغيرين، ربوهم على غض البصر وعلى حرمة كلمة "عيب وحرام".
عايزين كمان نركز لما نشوف جريمة، إننا ندين الجاني مش المجني عليه.. ما تدوش مبررات للمجرمين، ما تساعدوش على انتشار الجرائم بمجرد تعليق سلبي عابر لكن مفعوله وارد يتأثر بيه حد وياخده حجة.
5- عن حوادث قتل الزوجات، لو القانون عامل القاتل بالقصاص، الجرائم دي مش هتتكرر.
ولو بطلتوا تتعاملوا باستحقاقية الزوج وإنه عادي يضرب زوجته ويقومها وما إلى ذلك، المجتمع هيتظبط.
هي لا فاقدة الأهلية ولا ناقصة رباية، هي إنسان عادي زيها زيك، ولا أنت ليك فضل عليها في شيء.
وبدل ما تسمعوا مشايخ الغبرة اتعلموا سيرة النبي (صلى الله عليه وسلم)، خلوه قدوتكم، شوفوا كان بيعامل زوجاته إزاي، شوفوا الصحابة كانوا بيعاملوا زوجاتهم إزاي، شوفوا المرأة وقتها كانت مكرمة إزاي.
6-أعتقد إن أجمل حاجة ممكن تعملها في يومك إنك تستحمى، وتبقى ماشي كده ورائحة النظافة بتنبعث منك.
7- من المناظر المؤذية لما تلاقي شباب سنهم أقل من ٢٠ بكتير، وبيدخنوا؛ محاولة منهم لتقليد الكبار.
والمؤسف لما جسمهم خلاص يعتادها ويبقى صعب يبطلوها.
8- كل الأشياء عادية، حتى يمنحها الإنسان قدسية.
9- "ما بيضحكش في وشي، ما بيقوليش كلام حلو" دي مشكلتها اللي هتسيبه علشانها.
كتير وارد يشوفوها حاجة تافهة ومش مستاهلة.
لكني استقبلتها وأنا بقول: "سبحان الله"؛ لما يكون من أوائل الأحاديث النبوية الصحيحة اللي بنتعلمها وإحنا صغيرين:
"تبسمك في وجه أخيك صدقة" و "الكلمة الطيبة صدقة" يبقى فعلا صدق رسول الله صلى الله عليه وسلم، لا ينطق عن الهوى.
10- اللي نشأ على إنه عايش في سجن، هيتصدم صدمة عمره يوم ما يعرف إن فيه حياة بره فايتاه.
11-أعتقد إن الإنسان اللي حياته كلها في البيت محتاج حد يفكره من آن لآخر إنه محتاج يخرج ويتعامل مع الناس؛ حفاظا على صحته النفسية.
12- محدش مسؤول عن تصرفاتك غيرك، ولا حد هيتحاسب عليها غيرك؛ فاشغل نفسك بيها تسلم.
13- معًا لتعريب قوائم الطعام في المطاعم، وأيضًا العودة لاستخدام المجلة الورقية.
