قــــــام مــــن نــــومــــه

قام من نومه
بس عيونه
خايفة تفتح
كرمش قلبه 
من الاحزان
بخ الميه 
على القمصان
وقعد يكوى 
ف كل هدومه
***
دقنه طويلة
قالك يحلق
قالك يسرق
لحظة قصيرة
يغير فيها
كل ملامحه
ويمكن حتى
يغير لونه
بس مصيبته
كان مستعجل
زود جرحه
وجرح الوش
وقبل ما حتى مرايته تلومه
قالها اسف ..معلش !
***
عمل القهوة
وطلعت شاى
بس ازى
هيحط السكر
عمره ما فكر
يضحك اكتر
من جواه
كان وياه
الحلم زمان
بس زمان
مبقاش وياه
فاته امبارح
علشان بكرة
وبكرة مجاش
***
قضى سنين العمر بلاش
من غير حتى
ما يفرح مرة
واما ف مرة
حب يسيب احزانه المره
فتح القلب على الشباك
لا النور دخل
ولا الضلمة
طلعت برة !