eggs

طبعا احنا شايفين ارتفاع اسعار البيض هاليومين الي من كان الكرتون بنص دينار وصل الحين دينارين واذا مو اكثر بعد عاد وانا ادور ذاك اليوم ولا احد الي ضايفهم بالمسنجر دزلي خوش فلاش فقلت لازم كل كويتي يشوفه علشان تعرفون قيمة البيض و فوائده وهذا اللنك

http://www.iloveegg.com/3_theater/song.htm

زين صارت مو زين

اليوم وكعادتنا زيارة بيت اليده الله يطول لنا بعمرها واحنا قاعدين بعد الغدا قعدت يم يدتي اسولف جان تقولي هذا تلفوني ما ادري اشفيه الناس يدقون علي ويطلعلهم الجهاز مغلق قتلها يمكن ماكو سيرفس قالت ما ادري اشفيه هذيل الإتصالات من غيرو اسمهم حق زين وصار تلفوني مو زين فضحكت وقتلها والله يمكن كل شي جايز وفكرت شنو الأشياء الي سوتها زين تلفت الإنتباه كشركة عالمية على قولتهم انا كمستخدم اشوف انهم ما سووا شي يلفت النظر غير انهم طوروا" اي جو" لسرعة7.2 لا وتلقى ماخذينها من شركة موبايلي الي اهي اول شركة بالشرق الأوسط طلعت بسرعة 7.2 وسلامة عمركم.

ننتقل حق شركة الوطنية الي سمعت اخر اخبارهم تقول ان شراها واحد من قطر يعني مالكها قطري الله يطول بعمركم ويقولون انهم بلشوا يوظفون عمالة فلبينية لإنها أرخص وتتعلم بسرعة وتحافظ على الشي مو مثل الكويتيين لاعبين بإيدهم وريولهم ،يعني انا قاعد اتخيل الموقف اذا اتصلت عليهم وترد علي فلبينية شقولها السلام عليكم ولا كوموستاكا واهي شراح ترد علي اكيد مابوتي :) لا وحلاتة يتصل عليهم شايب يبي يحط خدمه عاد شيابنا الله بالخير ما يصدقون يكلمون فلبينية ولا يتوهق ما يعرف يتكلم انجليزي .

hyundai vs german cars

والله وكله يقولون الهيونداي مو شي شوفوا بالله عليكم شنو الفرق بينها وبين المرسيدس اختلافات بسيطة مو صح :)

لا ومو بس جذي حتى من ورا ماكو فرق بينها وبين الجكوار يعني الليتات نفس القصة .

ويظل الكوري منافس للألماني لووووووووول .

قانون تجريمي للمتشبهين بالنساء

اليوم استغربت لما قريت بالجريدة عن احتجاز 3 جنوس فقلت اكيد مسوين لهم عمله ولا مخربطين ولكن تفاجأة أن الحكومة أو بالأخص وزارة الداخلية قامت بتفعيل قانون تجريم التشبه بالنساء وأيضا تشبه النساء بالرجالhttp://www.alraimedia.com/Templates/frNewsPaperArticleDetail.aspx?npaId=15233

"من أتى إشارة أو فعلاً مخلاً بالحياء في مكان عام بحيث يراه أو يسمعه من كان في مكان عام أو تشبه بالجنس الآخر بأي صورة من الصور، يعاقب بالحبس مدة لا تجاوز سنة وبغرامة لا تجاوز ألف دينار أو بإحدى هاتين العقوبتين"

لووول الله يعينهم شكلهم راح يتعبون من كثر ما ايمعون بالجنوس لما تطق جبدهم ويقررون اما الغاء القانون أو إعادة صايغته، ولو استمروا لازم راح يصيدون واحد تلقاه واصل ومعروف وعنده واسطات،الرسالة الي نبيها توصل إن ماكو فايدة من قوانينكم إذا كان الأساس باطل وفاسد.

مستلزمات العيد

هذي مستلزمات العيد يعني نبي نعيش الجو مثل الأمريكيين وربعهم بس احنا ملتزمين بأن هالمنتجات كلها خالية من الكحول علشان ما نخورها :)

جريدة النهار الظاهر قامت تخورها

الظاهر جريدة النهار شافت ان سوقها مشى فقالت خنبلش نخربها شوية يعني راح يصير حالها من حال الوطن وغيرها

ماشالله اللغة العربية عندنا زاخرة بالمصطلحات

هذا راعي نخي يعني كاتب آش وهريس وجريش والمفروض كراعين بس اللغة الي عنده متقدمة وايد فما قدر يعبر عن الي في مخه.

بعدين يقولون ليش عيالنا يقطون بدليات و ما يعرفون يتكلمون :) اذا الولد قرا مثل هالكرت اشلون ما تخترب اللغة عنده

.

فطاحل قسم اللغة العربية بكلية الآداب

بالكورس الصيفي الي طاف كنت ماخذ مادة نحو عند أحد الدكاترة المخضرمين، صج كان دكتور فاهم بمادته وخصوصا بالنحو لدرجة ان لما يتكلم بالمواقف العادية كان يستخدم لغة عربية فصحى(ياساتر)عاد بو ديكاتي من كان بالمتوسط واهوه ما يواطن شي اسمه نحو أو العربي ،وبالثنوية كنت أنجح بالدز والي زاد الطين بله اني خذيت مقررالنحو قبل لا أخذ مادة مهارات اتصال الي اهي تعتبر مقدمة بالنحو،المهم ما اطول عليكم الشعبه مالت النحو كانت أغلبها من كلية الشريعةويمكن 6 او7 من الآداب،فكنت اقعد جدام يعني بشد حيلي بس أخر شي طلعت فيه أيضا بالدز،الحين نرجع حق دكتورنا الحبيب ضحكني بصراحة لإن طلع حتى لما يتغشمر يكون محور النكتة او الغشمره باللغة العربية شوفوا هالموقف صار وانا كنت قاعد أمشي مع الدكتور رايحين المكتب وبالطريج شفنا دكتور ثاني رفيجه، هم مشى معانا فالحديث الي دار بينهم هو كالتالي:

دكتورنا:كيف حالك يا دكتور صلاح؟

دكتور صلاح:(واهوه مبتسم) حال مرفوع وحال منصوب وحال مجرور

دكتورنا:ضحك بشكل موطبيعي يعني مضحكته القطة

ديكاتي:(طبعا كان ودي اذبحهم على هالغشمرة السخيفة)جان اقول حق دكتورنا والله وتعرفون تنكتون بعد

دكتورنا:وهل اقتصرت النكت على الشباب يا بني

أنا شفت جذي جان اسحب نفسي وأرجع بيتنا لإني حسيت ان وكتي ضاع على الفاضي الله لا يبلينا واياكم لإني صج حسيت ان الي فيهم بلاء

who is ducati? :) وهل يخفى القمر

http://feehq8i.blogspot.com/2006/07/blog-post_23.html
بدون شرح وطوالة دشوا على هالرابط واتعرفوني بإذن الله، وانشالله قريبا راح ابلش انزل مواضيعي .