2012

2011 ماكانتش سنة ظريفة اوى بالنسبة لى

ان شاء الله 2012 هاتبقى احسن

مش هاروح انتخب حد

تحديث:

نزلت اتفرجت فى كذا لجنة
واحدة الاشراف الامنى فيها عسكريين واقفين يشربوا سجاير على جنب وبيحكوا مع ناخبين واللجنة فيها الافات واقفين بشكل عشوائى ومفيش طوابير وعرفت ان الورق لسة جاى فيها ع المغرب وان اغلب الناس زهقت ومشيت اصلا, والتانية رحت لقيت الحرية والعدالة معلقين يفط ضخمة قدام باب اللجنة وحاطين ترابيزة وعليها بروشورات وقاعدين ماسكين ورق وبيقولوا للناس علموا على دول واختاروا دول ومفيش جنس عسكرى واحد

الظريف لما الاقى ناس ماشية تقول لا اله الا الله اللهم انصر الاسلام

ده اللى انا شفته بعينى
غير بقى اللينكات اللى بالهبل والتويتات اللى بالهبلي

عشان كدة
متطمن ان قرارى كان صح انى اقاطع المهزلة دى

______________________

عشان اخر استفتاء اتعمل قالوا هاينفذوه بعد 6 شهور وما اتنفذش

وعشان المجلس بيعمل بمبدا "ﺃﻧﺎ ﺃﻗﺘﻞ ﺍﻩ,ﺃﺳﺤﻞ ﺃﻩ,ﺃﺗﺤﺮﺵ ﺃﻩ, ﺃﺩﻫﺲ ﺍﻟﻨﺎﺱ ﺃﻩ,ﺇﻧﻤﺎ ﺃﺯﻭﺭ ﺍﻹﻧﺘﺨﺎﺑﺎﺕ, ﺃﻫﻮ ﺩﺍ ﺇﻟﻠﻰ ﻣﺶ ﻣﻤﻜﻦ ﺍﺑﺪﺍ"

وعشان الغياب الامنى عندنا والاشراف القضائى الرائع والمتمكن طبعا
فى استفتاء مارس كان الاشراف الامنى ساعتها متمثل فى رائد وامين شرطة على لجنة فيها حوالى 10 الاف واحد
والاشراف القضائى كان واحد اعتقد لسة خريج طازة وشكرا
استحالة هو ده الاشراف على الانتخابات

وعشان مفيش مرشح عندنا احترم برنامجه

وعشان اصلا ده وقت غلط للانتخابات


مش هاروح انتخب حد

قلب الوطن مجروح

 

قلب الوطن مجروح .. لا يحتمل اكتر
نهرب وفين هانروح؟ .. لما الهموم تكتر
نحمى غصون الورد .. من دمع سال ع الخد
اه يا حبيبة الروح .. قلب الوطن مجروح

 

عاطف السكرى

 الذكرى الرابعة

رحم الله يونس شلبى

13-11-2011

السبت 14 نوفمبر كان اخر يوم شغل ليا فى مشروع استعلامات دليل الامارات .. اتنقلت مشروع تانى تبع نفس الشركة وهو مشروع موبايلى السعودية
وكان الحد 15 نوفمبر اول يوم تريننج
والحمد لله انتهى الشغل بيومين اوفرنايت (من 11 بالليل لسبعة وربع الصبح) وهو شيفتى المفضل فى الشركة واللى كنت بغير مواعيد شغلى ليه دايما وبقيت تقريبا اكتر واحد ف الشركة نزلت اوفرنايت
يعنى كنت المفروض اشتغل السبت بالليل من حداشر لسبعة وربع صباح الحد اروح انام واصحى انزل التريننج العصر
المهم السبت صحيت 1 الضهر .. وفضلت صاحى لحد ميعاد الشيفت بالليل
نزلت رحت الشركة تسعة ونص
وفضلت من تسعة ونص لحداشر .. خلصت ميعاد الشيفت عادى سبعة وربع الصبح .. اييه اللى يقعدنى بقى .. ماحدش يسالنى
فضلت قاعد لحد ميعاد التريننج اللى هو الساعة اربعة العصر
يعنى رحت الشركة بدرى ساعة ونص .. وبعدين اشتغلت 8 ساعات وربع شيفت اوفرنايت .. وبعدين قعدت بعد نهاية الشيفت 9 ساعات الا ربع لحد الترينينج
الترينينج كان من اربعة لحداشر .. يعنى 7 ساعات اضافية
مشيت م الشركة 11 .. بعد ما فضلت قاعد فيها 25 ساعة ونص متتالية
روحت والحمد لله وفى نيتى انام بعد ما فضلت صاحى ال25 ساعة ونص دول وقبلهم 8 ساعات ونص صاحى يعنى اجمالى 34 ساعة صاحى
وابص ع المفاتيح ما الاقيهاش
المهم رجعت الشغل تانى بعد ما روحت ومالقيتش المفاتيح .. بعد ما قلت الحمد لله خلاص هى المفاتيح ضاعت وهاركب اروح العبور وخلاص ابات عند اهلى ببص لقيت واحد م الامن بيقولى مفاتيحك دى؟ .. كنت عايز ابوسه من بقه
خدت المفاتيح وروحت البيت الساعة اتنين بالليل
يعنى فضلت صاحى 37 صاحى .. منهم 26 ساعة فى الشغل

عملت ليه بقى البوست ده؟
عشان افتكر اليوم ده وما انساهوش .. اول يوم ترينينج ليا فى موبايلى

11-11-11-11-11

 

 

 

سامو عليكو

 

النهاردة 11 شهر 11 سنة 11 ودلوقتى الساعة 11 الدقيقة 11

 

قلت بس احط البوست وبعدين اقولكوا اللى عايز اقوله كمان شوية

 

 

السماعليكو

عيد اضحى سعيد 1432

 ممكن تسيبكوا من كلمة منتدى عمرو فكرى او السلوجان اللى هو (صلاة النبى احسن)

مارضيتش اجيب صورة اى خروف تانى لان الخروف ده كله عاجبنى ومكسل اقص الصورة بصراحة .. ركزوا بس ف الخروف عشان الصورة تبقى مظبوطة

 

 

 

 

 

كل سنة وانتوا طيبين

ويارب السنة الجاية تكونوا فى اى حتة مع اى حد وبتعملوا اى حمد

تعديل فورى: وانا بكتب كنت بقول التكبيرات فبدل ما اكتب (وبتعملوا اى حاجة) كتبت (وبتعملوا اى حمد)

ايه لزمة الاضافة؟ يعنى رقاصة وبترقص؟

ما علينا

كل سنة وانتوا طيبييييييييين .. وماتنسوش حماية العيد

بؤجة الخير والتبرع الثلث سنوى بالدم

بؤجة الخير والتبرع الثلث سنوى بالدم

برعاية نوران الشاملى هذه انا هذه حياتى وفاتيما روح قلب ماما

 

 دوسوا على الصورتين دول
 

 

 

 

 
او اللى الصور مضايقاه ممكن يدوس هنا:

11 / 11 / 2011

الــبــؤجــة أولاً

وشكرنننن

واحد اسمه عيد

ربع قرن

انا ماكنتش ناوى اعمل بوست

بس غيرت رايى ف اخر لحظة عشان بس خدت باللى ان الرقم مستدير .. يعنى مش 24 او 26

ما علينا

شهادتين وبس

شهادة نوارة نجم عن ما حدث فى ماسبيرو:

دخلت المشرحة وشفت جثة 14 عريس غير اللي في التلاجة ماتوا بالرصاص الميري ومعدية عليهم العربيات يا جيش شهادة الزور واليمين الغموس

كل ده عشان تاخدوا الحكم؟ الهي تولعوا انتوا والحكم والبلد والدنيا كلها.. تقتلوا الناس دي كلها ليه؟ ليه؟ ربنا يحرق قلوبكم على ولادكم
... ...
الجيش الكداب نصب على الناس لدرجة ان فيه ناس فعلا نزلت فاكرة ان المسيحيين مسلحين ولما لقوا الجيش كدب عليهم انضموا للمسيحيين

انا ما شفتش ام جثة عسكري واحدة، ومافيش حد كان مسلح غير الجيش، لو صدقوا ان حد مات منهم يبقى هم اللي قاتلينه بغشوميتهم ولا قاصدين حتى

الناس اللي قاعدين على التويتر يتفرجوا على القناة الاولى.. اخرسوا.. اذا ما كنتوش تنزلوا تشوفوا بعنيكم اخرسوا، يا ربنا يدوقكم اللي الناس شافوه

اي حد يكرر شهادة الزور اللي نشرها الجيش وكلها كدب في كدب مش حاقوله غير ربنا يوريك ابنك مكان اللي انا شفتهم النهاردة

واحد جه قالي: امال فين المسيحيين اللي معاهم سلاح؟ انا كنت نازل ادافع عن الجيش لقيت الجيش بيضرب الكل والناس بتضرب في بعضها وماحدش فاهم حاجة

وعلى فكرة، الناس اللي بتكرر كلام الجيش دي مش ناس هابلة، لانه لا كدب مساوي ولا صدق منعكش، دي ناس شريرة وبنت كلب وربنا يحرق قلوبهم يا رب

ودى شهادة صديقة أثق فيها تمام الثقة:

أنا هحاول اكتب اهم الحاجات اللي حصلت امبارح علما باني شفت المسيرة من بعد ادان المغرب و مشيت معاها لحد ما بدأ ضرب البلطجية قرب ماسبيرو- بعدها حضرت ضرب الجيش النار على المتظاهرين من المدرعات- بقيت في رمسيس هيلتون لحد الساعة تسعة- خرجت من هيلتون باتجاه ميدان التحرير من ناحية المتحف المصري..

في البداية عرفت عن مسيرة اليوم مصادفة عن طريق الانترنت منذ بضعة ايام و بعدها اتصل بي احد المشاركين فيها و هو شاب مسيحي اسمه عادل اعرفه من الميدان و طلب مني الحضور بالكاميرا مع الصحفيين لتغطية المسيرة اللي كانت هتبدأ من شبرا و هتتوجه لماسبيرو..

عادل كان معايا على التليفون اول باول عشان اتابع معاه لحد ما اوصل و قالي ان الاعداد بكيرة جدا في شبرا لحد ما وصلت المسيرة بالقرب من بولاق ابو العلا قرب محطة الاسعاف و بدأنا تصوير ساعتها..

الامور كانت هادية جدا و كان المشاركين اغلبهم نساء و اطفال و عائلات و ناس عادية و كان في مسلمين كتير مشاركين و ناس بتتفرج في كل حتة يعني يقدروا يثبتوا ان المتظاهرين ما كانوش شايلين سلاح ولا الكلام الفارغ اللي اتقال.. قالوا لنا ان في بلطجية من منطقة السبتية ضربوا عليهم من فوق بالطوب و الزجاج اثناء مرورهم تحت نفق احمد حلمي و عرفت ساعتها ان القلق هيبتدي كالعادة..

بعدها لما وصلت المسيرة عند قرب رمسيس هيلتون بشوية بدأنا نشوف طوب بيتحدف من شوارع جانبية على المسيرة و الناس بداوا يجروا و يهربوا النساء و الاطفال و الشباب بدأوا يردوا الهجوم.. الناس اصرت على السلمية رغم كل شيء و عشان يهربوا من البلطجية توجه الجميع صوب ماسبيرو زي ما كانوا مرتبين من الاول..

فوجئنا بصوت طلقات فشنك عالي جدا من ناحية ماسبيرو و فجأة اصبح في حركة عشوائية و صريخ و الناس بدأت تجري..

انا كنت تحت الكوبري ساعتها مواجهة للنيل و في مصور قدامي و فوجئت بالمدرعات بتاعت الجيش بتضرب نار ناحيتنا و على الناس بصورة عشوائية جدا و المنظر كان كابوسي فكرني بيوم 28 يناير و فضلت المدرعات تلف و ترجع تضرب نار..

بعدها تراجعت لبوابة رمسيس هيلتون و كان في حالة ذعر شديدة و الجرحى عمالين يتوافدوا على البوابة و الناس تنزلهم على الارض و شفت ناس مضروبة برصاص في بطنها و وشها و ناس مغمى عليها كتير و بدات افقد اعصابي من المنظر.. ستات كتير كاناو بيعطيوا و بيوصفوا منظر المدرعات و هي بتدوس على الشباب تموتهم.. بعدها جه شباب من اللي في المواجهة و قالوا نفس الكلام..

كان في حالة هستريا و رعب و صراخ رهيبة بس الغريب ان الناس كانت منقسمة في كلامها و انفعالتها، البعض كان بيلوم على الجيش و بيتكلم بحرقة و بيشتم في المجلس العسكري و بيتهمه بافتعال كل الكلام ده عشان يهخلي الناس يتوهوا في موضوع الفتنة بدل ما ينتقدوه و البعض الاخر كان معتقد ان المشكلة كلها بسبب "السلفيين" اللي اتفقوا مع المجلس العسكري عشان يبيدوا المسيحيين و يتخلصوا منهم سواء بحرق كنايسهم او بقتلهم بالاسلحة الثقيلة زي النهاردة..

فضلت عند البوابة لحد ما المصور رجع و دخلونا الفندق بعد محاولات كتيرة جدا مننا و محايلات و فضلت جوة الفندق لحد الساعة 9 بالليل و كان الجرحى بيدخلوا كتير و كان في حالة من الترقب و كنا بنتابع ماسبيرو من شباك الفندق..

في نفس وقت حبستنا جوة الفندق اصحابي في التحرير اتصلوا بيا و قالوا  ان في عدد قوات مهول نزلت الميدان بعد ما عرفوا ان في متظاهرين هناك و ضربوهم بالغاز المسيل للدموع و احد اصدقاءنا اتصاب بخرطوش كمان.. الكلام ده اكده اكتر من حد ثقة..

المهم على لاساعة تسعة بدأ ناس كتير تخرج و يقولوا لنا عادي مفيش مشكلة ممكن تخرموا من شوارع جانبية، اتجمعت انا و عائلة مسيحية مكونة من ام و اتنين شباب ولادها و مجموعة نساء مسيحيات كانوا جايين المظاهرة الصبح و خرجنا من الفندق..

(قالوا لي خليكي وسطنا عشان لما يشوفوكي مسلمة و محجبة وسطنا ما يضربوناش!)

كان احساس مؤلم الصراحة ما فهمتش ليه لان كل فكري كان ان الجيش بيضرب بعشوائية و الموضوع مش طائفي خالص بدليل ان ناس كتير اتصابت و ماتت مسلمين زي ما عرفنا بعد كدة..

عند بوابة عبد المنعم رياض و انت جاي من عند المتحف فوجئت بمجموعة كبيرة جداااااااا من الشرطة العسكرية قوات مكافحة شغب و معاها مدنيين لابسين خوذ و دروع و ماسكين عصيان نفس المنظر اللي حصل في فض اعتصام واحد اغسطس.. نفس الاسلوب الغبي استخدام مجندين بلبس مدني او عناصر مثيرة للشغب.. وكاناو متوجهين ناحية ماسبيرو من التحرير.. جرينا بسرعة ناحية شارع رمسيس عشان ما يعرفوش اننا من المتظاهرين لاني مكنتش فاهمة الصراحة وظيفتهم ايه بالظبط ورايحين يضربوا متظاهرين ولا مين دول.. بس شكلهم مكنش مطمئن..

وصلنا مترو ناصر في الاسعاف وطول الطريق كان في تجمعات بشرية كبيرة جدا فيما يشبه اللجان الشعبية زمان متعرفش ان كانوا بلطجية ولا متظاهرين ولا فضوليين ولا ايه بالظبط بس كان تركيزي خلاص شبه غائب و بعد كدة ركبنا و روحنا بيوتنا..

من شهادتي احب اوضح التالي:

-مسيرة الاقباط كانت سلمية من البداية و كان فيها مسلمين كتير و ناس عادي متضامنة..

-البلطجية هجموا على الناس مرتين مرة في نفق احمد حلمي و مرة قرب رمسيس هيلتون..

- الجيش ضرب فشنك و ضرب حي على الناس و المدرعات هرست الشباب اللي في الصفوف الاولى و دي بشهادة ناس كتير جدا شفت اثار الضرب على اجسامهم..

- الموضوع مكنش بادىء طائفي بالمرة بل على العكس توليع التلفزيون و المجلس العسكري هما اللي بيحاولوا يخلوه يبان كدة..

دي شهادتي قدام ربنا و اللي عاوز يصدق اهلا و سهلا اللي مش عايز يروح يتفرج على القناة الاولى و يريح دماغه و يريحنا معاه..

وانا اصدق الاتنين

خصوصا مع نفى النيل للاخبار خبر وقوع قتلى من جانب الجيش, وبرروا الخبر اللى اعلنوه سابقا بانه توتر مذيع!

سبحان الله نفس السياسة

كان شئ متوقع بصراحة مع بداية اسبوع انتخابات مجلس الشعب



10-10

حظر تجول .. تانى

اضغط هنا

----------------

تم تعديل التدوينة باضافة جزء اخير فى نهايتها 


وتم تعديل التدوينة مرة تانية

----------------

 

التاريخ أثبت ان المصريين مابيتعلموش من أخطاء الماضى

أبدا

----

مش فاهم موضوع حزق التبول ده لزمته ايه؟

يعنى الساعة حداشر ونص وكمان ساعتين ونص هايبقى فى حظر تجول لمدة 5 ساعات

الخمس ساعات دول هما اللى هايظبطوا الدنيا؟

طب وقبل كدة؟ الدنيا هاتكون منورة فاللى عايز يولع مش هايعرف يتحرك فى النور ومستنى الساعة اتنين عشان يتحرك ف الضلمة؟

طب اللى عنده مدرسة بعيدة او ماكانش بيذاكر ف الثانوية والتنسيق خلى جامعته ف حتة تانية او زى عندنا فى الشغل كدة هنا الناس اللى عندهم شغل الساعة خمسة الفجر وستة وسبعة الصبح دول يعملوا ايه؟

طب ليه اصلا؟

هل حظر التجوال ده هو اللى هايظبط الامن النهاردة؟

بداية رائعة لاسبوع انتخابات مجلس الشعب

------------

البهيم ابن البهيم اللى ضرب نار ع الجيش موت تلات اربع عساكر مالهومش ذنب وولع ف مدرعتين .. ده استفاد ايه؟

الا لو كان هو ده فعلا وهو كدة استفاد

هى مصر رايحة على فين؟

كل ما نتقدم خطوة لقدام ترجعونا عشرة لورا؟

--------------

دول مش المسيحيين

اللى عمل كدة مش المسيحيين

وانا كمسلم مش شايل اى ذرة غل او غضب من اى مسيحى .. الا لو كان زيه زى المسلم او الكافر اللى تآمر عشان يعمل كدة

----------------


 تعديل:
اضغط هنا: شهادة عيان امام الله على أحداث ماسبيرو

اقتباس:

"البعض الاخر كان معتقد ان المشكلة كلها بسبب "السلفيين" اللي اتفقوا مع المجلس العسكري عشان يبيدوا المسيحيين و يتخلصوا منهم سواء بحرق كنايسهم او بقتلهم بالاسلحة الثقيلة زي النهاردة.."

اهو انا لا احب المبالغة من هنا ولا من هنا
سلفيين ايه بس اللى يبيدوا المسيحيين؟!!!!



اقتباس تانى:

"(قالوا لي خليكي وسطنا عشان لما يشوفوكي مسلمة و محجبة وسطنا ما يضربوناش!)
كان احساس مؤلم الصراحة ما فهمتش ليه لان كل فكري كان ان الجيش بيضرب بعشوائية و الموضوع مش طائفي خالص بدليل ان ناس كتير اتصابت و ماتت مسلمين زي ما عرفنا بعد كدة.."

يا خوفى تقلب حرب اهلية ف الاخر بسبب شوية محرضين متخلفين

بس الغريب هو الاعداد الهائلة للى ماتوا .. خاصة من الجيش
دول ماتوا ازاى؟


---------

والله زى ما كنت متوقع
ف الاخر قناة النيل للاخبار نفت رسميا وقوع اى قتلى فى صفوف الجيش وبررت اللى حصل بتوتر المذيع


يا ولاد ال**** !!!!!!!!!!!


------------

اقرا ايضا: شهادتين وبس

 

تحية لبطل اكتوبر

ولا قائد ضربة جوية .. ولا قائد ضربة منوفية


تحية لأبطال اكتوبر الحقيقيين

الصورة للفريق سعد الدين الشاذلى رحمه الله

تـعـظــيــــم ســـــــلام

عدى 6 شهور

 

عدى 6 شهور على رحيل المخلوع 11 فبراير

وعدى 6 شهور على استفتاء التعديلات الدستورية 19 مارس

وعدى 6 شهور على نهاية مارس كله

وبدأ اكتوبر

ولسة المجلس ماسلمش السلطة (بسرعة وبسلام وسلاسة) لانقاذ الوطن وسرعة تسليم التركة والتخلص من الحكم العسكرى الخ الخ الخ

الاخوة اللى صوتوا بنعم لسرعة تسليم السلطة

الف مبروك الخازوق .. لسة اللى جاى أمتن

مدى نبيل زهدى

مدى نبيل زهدى

اول ميدالية كاتا لبدر

15-09-2011

Sick

Sick & Sick

عن عيد الفطر

 

احيانا بحسد نفسى ونفسنا على اننا عندنا صلاة العيد

وعلى شكلنا ساعتها

بحب اوى شكل الصلاة

لما ادخل او اقرب ع المكان والاقى التجمعات

ورجالة قاعدين وماسكين ايدين عيالهم الصغيرين

وستات وبنات لابسين اسدالات وبيجروا داخلين يصلوا

والفرش اللى ف الشارع اللى بيسد الطريق تماما

ونفضل نقول من قبلها بفترة طويلة تكبيرة العيد

الله اكبر الله اكبر الله اكبر .. لا اله الا الله .. الله اكبر الله اكبر .. ولله الحمد

ساعات بقعد مع نفسى سايبهم يقولوا التكبيرة دى وانا اقول الكبيرة

الله اكبر كبيرا .. والحمد لله كثيرا .. وسبحان الله بكرة واصيلا .. لا اله الا الله وحده .. صدق وعده .. ونصر عبده .. واعز جنده وهزم الاحزاب وحده .. لا اله الا الله .. ولا نعبد الا اياه .. مخلصين له الدين ولو كره الكافرون .. اللهم صل على سيدنا محمد .. وعلى اصحاب سيدنا محمد .. وعلى انصار سيدنا محمد .. وعلى ازواج سيدنا محمد .. وعلى ذرية سيدنا محمد وسلم تسليما كثيرا

وقبلها وبعدها التكبيرة العادية اللى بتتقال

والناس اللى بتعدى بتمر ع الناس عشان يفطروهم .. بالمناسبة ماكانوش موجودين عندى النهاردة

ولما نقوم عشان نصلى والشيخ يبدا يقول التكبيرات

بحبها جداااااااااااااا .. بحب لما يقول الله اكبر والناس كلها تقول وراه بصوت عالى الله اكبر .. ويسكت شوية واسمع صدى الصوت واحس انه بيرج الشارع .. سمعت بالمناسبة ان مش صح انى اقول وراه بصوت عالى او انى ارفع ايدى ف التكبير

ولما اقول وراه الله اكبر واتلخبط كل مرة ف النص وانسى احنا وصلنا للتكبيرة الكام

ولما يقرا سورتى الاعلى والغاشية

ولما بباخد معايا كل مرة الموبايل وافضل اصور ف الناس, واول ما يبدا الصلاة اشغل الريكوردر واسجل الصلاة مع بعض التكبيرات .. بالمناسبة ماخدتش الموبايل معايا السنة دى معرفش ليه

وبعد الصلاة لما اللى جنبى يمد ايده عشان يسلم عليا والاقيه سلم على اللى بعدى فاللى جنبى م الناحية التانية يسلم عليا ونلاقى الصف كله بيسلم على بعضه .. سمعت برضه ان ده مش سنة وانما هى بدعة .. بس عموما السلام بس مش مشكلة على اعتبار "افشوا السلام بينكم"
ولما اقعد اسمع اول جزء م الخطبة بعد الصلاة .. واللى دايما - اى شيخ - يبداها بان كان الافطار بالامس حراما, وصار الصيام اليوم حراما

وبيشدنى جدااااااااااا شكل العيال الصغيرة اللى مع اهاليهم .. تحس انهم "بواقى وقعت منهم"

التخين ومدور وماسك ابنه تخين مدور زيه, تحس كورتين واقفين جنب بعض واحدة كبيرة وواحدة صغيرة .. وابو نظارة وماسك ابنه ابو نضارة زيه, والواد يقعد يعدل ف النضارة ويحرك دماغه حركة عصبية كدة تنبئ بانه مشروع geek صغير

وبعدين لما اروح واول ما ادخل البيت اول حاجة اعملها اجيب اى حاجة اكلها بونبونى او سودانى او كحكاية او اى حاجة

بالمناسبة مابحبش كحك العيد .. ولا البسكويت ولا الغريبة ولا اى حاجة

بحب صلاة العيد

كل سنة وانتوا طيبين

اى كلام فاضى معقول - 2

-------------

اول الشهر كوعى اتكسر

وقعت عليه بشكل معين, الدكتور قالى مش عارف عضمة ايه اتكسرت ازاى والحتة الفلانية اتشرخت ازاى

دلوقتى لما بحط ايدى على كوعى بحس ان الصواميل مفككة من بعضها وان فى عضم غريب الشكل محطوط مش ف مكانه

الحمد لله عموما دلوقتى بقيت اعرف احرك ايدى احسن م الاول

فكيت الجبيرة من حوالى اسبوع وحاطط كوعى دلوقتى ف حاجة اسمها تقريبا كوع ايلاستيك والله اعلم

اذهلنى بصراحة ردود فعل ناس على ده .. واذهلنى برضه ردود فعل ناس تانية

فى ناس ماكنتش متوقع منهم حاجة لقيتهم بيكلمونى ويسالوا عليا ويبعتولى ع الفيسبوك

هما بصراحة عددهم قليل .. يعنى احبطنى جدا عدد اللى اهتموا بالموضوع من بين اللى عرفوا .. منهم اصلا اللى كان بيأدى واجب بس مشكور كتر خيره يعنى انه اهتم

وفى ناس كنت مستنى منهم اكتر من كدة اغلبهم لقيت منهم عدم اهتمام اصلا .. ولا حتى اداء واجب

مش مشكلة انا متعود على ده

----------------

انا بكره كلام النسوان ورغى النسوان ولت وعجن النسوان!!!!

----------------

الوفاء بقى عملة نادرة

او مش بس الوفاء

العرفان بالجميل .. او ال.. مش عارف احدد كلمة ميعنة بالظبط

بس الappreceation عموما مابقاش موجود

----------------

الشغل عندنا بقى فيه مشاكل التنين وقرف التنين وبقى عامل زى المركب اللى كله عايز يلحق يهرب منها قبل ما تغرق

بستمتع بصراحة بالمراقبة

انى اراقب قباطين المركب وهما بيهربوا بعد ما كانوا بيقولوا قبل كدة "الكبير لزمن يتظبط الاول عشان يعرف يظبطكم يا بلد بجر"

ودلوقتى بقى اللى يقول للعسكرى "دى كل حاجة عندى ف الحياة ولازم انزل معاها" والبت الصغيرة ماتعرفوش اساسا, واللى وقف يعزف ومالوش دعوة باللى بيحصل ف المركب, وقليل جدا اللى دخل اوضته يحس بالحاجات بتاعته والحنين للى معاه وبعد شوية هايبقى مش معاه .. اللى ماشافش تايتانيك يقدر يعمل نفسه ما قراش من اول حتة العسكرى اللى بعد قباطين المركب

بس انا رغم انى عارف انى ع المركب اللى هاتغرق واحتمال اغرق معاها وما اعرفش الحق مكان ف "قوارب النجاة" بس مستمتع بالفرجة .. حاطط لنفسى قوانينى الخاصة .. وملتزم بيها جدا وماشى عليها جدا

مستمتع بالفرجة على اللى بيهرب, واللى بيحاول يهرب, واللى عايز يهرب بس مش عايز يبين للناس انه عايز يهرب, بس هو شكله مفضوح اساسا وباين انه عايز يهرب

ما علينا ايه كل الكلام اللى مش مفهوم ده؟

-----------------

فى ناس من كتر ما بتبقى مركزة مع الناس عشان تمسكلهم اخطاءهم عشان يقولولهم اهو انتوا غلطوا ف كذا وانتوا مستمرين ف نفس الغلط .. من غير ما بياخدوا بالهم - او بياخدوا بس بينفضوا - بيقعوا هما نفسهم ف نفس الغلط

اهو انا بكره بقى اللى يكون فيه داء .. ويصمم يتهم الاخرين انهم فيهم الداء ده وانهم هما السبب فى كذا وكذا وكيت وكيت والعالم هايخلص ف 2012 بسببهم

---------------------

انا بكره التليفونات والموبايلات بغبااااااااااااااااااااااااااااااااااااء

وبكره الشات . او بمقته بمعنى اصح

---------------------

مابحبش البطء

مش ان الحاجة تبقى بطيئة عموما

ان الحاجة رد فعلها يكون بطئ

او الresponse بتاعها ليا يكون بطئ

بتخنق جدا

----------------------

انا محتاج براح .. وابقى بميت جناح .. والمس السما

-----------------------

انا بكره الخنقة والزحمة والحاجات الضيقة وانى ما ابقاش واخد حريتى او مساحتى الشخصية

بابقى عايز ارسم حوالين نفسى دايرة كدة او مربع ويبقى ممنوع ان حد يقرب او يلمس الدايرة دى او يخش جواها الا لو فى حاجة تستدعى ده

بكره الخنقة والتكتيف .. انى ابقى واقف مزنوق ف المواصلات او حد يزقنى وانا بركب او انى اضطر ازق حد .. انى ابقى قاعد على مكتب ومكتب اللى جنبى قريب منى .. ابقى ف نت كافيه والاقى اللى جنبى بيقرا اللى بكتبه, او ف المواصلات وعينين اللى جنبى راشقة ف النوتس اللى بكتبها باستمرار ع الموبايل .. لما العب كورة الاقى المساحات ضيقة وما اعرفش العب براحتى ولا اخد قرار اباصى ولا اجرى ولا اشوط .. لما ابقى لازم اخلص اللى ف ايدى بسرعة عشان فى حاجة تانية لازم اعملها بسرعة ولازم اعملها بسرعة عشان فى حاجة تالتة الخ الخ واكون مجبر اعمل الحاجات دى كلها بمعنى انى مجبر اعملها يعنى هاعملها .. بكره الهدوم الضيقة, بحس انى مش واخد راحتى, وبكره الياقات الضيقة, رقبتى بتتخنق وغالبا بقطع اللياقة لما بروح .. بكره الحاجة اللى تكون لازقة فيا, مابحبش حاجة تلزق فيا (الا بمزاجى) .. حتى لما ايدى كانت ف الجبيرة الجبس ,, كنت بفكها كل شوية عشان اعرف اهرش واريح ايدى شوية اعرضها للهوا وكدة وبعدين ابقى اربطها تانى .. بكره اللامؤاخذة القطونيل, عشان مابحبش صاحبك يبقى لازق فيك

بحب اخد راحتى واخد حريتى .. ف المساحة وف الوقت

انما الخنقة والضيق والزحمة وووو

مابحبش كدة

مابطيقش نفسى اصلا ف كدة

----------------------

بكره المرضى النفسيين وانا منهم

وبكره المغفلين وانا احيانا بكون منهم

وبكره الغباء والاستغباء .. والمماطلة وتضييع الوقت

بكره التشاؤم

انا بجد بكره التشاؤم جدا

عندك كلمة حلوة قولها ماعندكش اتفضل بعد اذنك اخرس واقعد ساكت وماتحبطش اهلى وتقولى ان الدنيا سودة سودة سودة

اه الواقعية حلوة .. والتشاؤم مطلوب فى بعض الحاجات اللى محتاجة توقع الاسوا

لكن ماتبقاش الدنيا مش مستاهلة والاقيك مصمم تكأب اللى خلفونى وتقولى لسة الوحش ماجاش

وتكون الحياة عادية اصلا مش مستاهلة كل ده

----------------------

احيانا بحب اللمة .. بس مابحبش الاهتمام الزايد عن الحد وان حد يبقى باصص ومهتم انك بتعمل ايه ومترقب ويفضل مترصدك

احيانا بحب ده .. انى احس انى محط الانظار او موضع اهتمام

بس ف اللمة بحب انى ادوب وسط الزحام

نبقى كتير وافضل الف .. كل شوية وشوية احس باللى باصص عليا وبيسال, ويرجع للى بيعمله .. احس بالاهتمام يعنى

بس بحب ابقى براحتى .. اكلم ده او لا .. اعمل كذا او لا .. اقف هنا او هناك

غير كدة بحب ابقى لوحدى

جدا

لو كنت بكتب الكلام ده من سنة مثلا كنت هاقول انى بحب ابقى لوحدى بنسبة 100% وبس

بس اكتشفت - بعد سنتين الا ربع عايشهم ف الشقة لوحدى لظروف الشغل - انى احيانا بابقى عايز حد

اى حد يقعد جنبى كدة ومابقاش طايق انه جنبى وابقى مخنوق .. بس لازم يقعد

حد يعمل قلق ويزعق وانا اتخانق معاه عشان بكره الصوت العالى واقول ياريتنى ابقى لوحدى مع الوحيد اللى بيعمل الحاجات اللى انا بحبها (اللى هو انا) او بمعنى اصح مابيعملش الحاجات اللى انا مش بحبها .. ومن جوايا عارف ان لا, عايز حد يعمل دوشة وخلاص

كنت احيانا زمان لما بحب احس ان فى حد وخلاص بفتح التليفزيون واجيب اى حاجة تعمل دوشة او صوت وانا مهتم باى حاجة تانية .. على اساس انى اهو مش لوحدى

دلوقتى الشقة اللى انا فيها قاعد على طول ف الصالة ع اللابتوب قدام التليفزيون .. بشغله واجيب اى حاجة فاضية مالهاش لزمة وارجع انشغل ف اللى بعمله ع اللاب .. واتخنق واتضايق ان مفيش حاجة عدلة ف التليفزيون .. مع انى اصلا مش متابعه ولا مهتم بانى اتابعه

لما بتوصل انى اتخنق اوى بقى

بنام

بقيت احب انى لما اتخنق اخش انام .. غالبا باصحى ناسى

وبقيت احب النوم جدا

انا ايه اللى انا كاتبه ده؟

حقيقة علمية

الصحة تاج على رؤوس الأصحاء .. لا يراه الا المرضى

حسام حسن للاسماعيلى

ياترى يا هلترى .. الاسماعيلى هايفوز ببطولة السنة الجاية؟

حسام حسن مديرا فنيا للاسماعيلى

اقرا: العميد يحقق "حلمه" بالتوقيع للدراويش.. ويعد ببطولة

اعتبروا ده فانوس

تدويناتى فى سباق ال100 تدوينة

خشوا اللينكات دى
ورشحونى بالضغط على (+1)

اختبارات عذرية؟

عندما تكون صاحب قرار

حضانة طنطا

اسف على الازعاج

عارف يا حسن
كنت دايما اسمع الناس وهما بيتكلموا عن علاقة الابن بابوه
لكن عمرى ما فهمت الكلام ده لحد ما خلفتك
حسيت انك المصغر بتاعى ..  بواقى وقعت منى .. وانا كنت اقربلك من امك بكتير .. وهى كانت تتجنن
يعنى انا اربى, وادادى, وااكل, وانت تيجى اخر النهار تاخد الحب ع الجاهز؟
سنين وانا شايفك بتكبر قدام عينيا .. اللى بيضحكنى بيضحكك, واللى بيزعلنى بيزعلك
بتحب اللى بحبه, وبتكره اللى بكرهه
نفس العادات .. نفس الاهتمامات
وطى الصوت ده شوية يا حسن
وطى يا حسن الصوت
يا ولد وطى الصوت انا بتكلم بقولك

انت اللى عملت مش انا .. امشى
مش هاعرف
عشان هابقى لوحدى
وانا مش عايز ابقى لوحدى
عشان انا على طول لوحدى
انا مش عايز أكتأب

بلد دلاديل 2

التدوينة دى انا كنت كاتبها هنا بتاريخ 4 يونيو 2009

من اكتر من سنتين

هنا: http://amrfekry.blogspot.com/2009/06/blog-post.html

جيت دلوقتى احط اللينك بتاعه ع الفيسبوك لقيته بيقولى ان البوست ده ممنوع عشان حد قبل كدة عمله فلاج!

يعنى انا لما حطيته من سنتين حد عمله فلاج وشاله من ع الفيسبوك ودلوقتى ماينفعش احط اللينك تانى

مرضى نفسيين

عموما .. البوست ده هاحط فيه نفس البوست اللى الاخوة الفلول الافاضل عملوله فلتج وشالوه عشان احط لينك مختلف

وشكرنن

______________________________________________________________

انا بصراحة مسكت نفسى ومارضيتش اعلق ع الهبل اللى حصل عشان لو كنت علقت ساعتها كان ممكن اغلط جامد وكانت هاتبقى اخر تدوينة تقروها لعمرو فكرى
فى الحقيقة لحد دلوقتى برضه مش عارف اصيغ الكلام بصورة مهذبة ازاى ! بس انا عايز اتكلم عن الهبل والتخلف العقلى اللى حصل ساعة ما حفيد حسنى مبارك مات


طفل .. ومات .. وخلاص !
نقراله الفاتحة .. وندعوله بالرحمة .. وخلاص !
لسة القلم ما كتبلوش ذنوب .. يمكن ربنا عمل كدة عشان حاجة مانعرفهاش .. بس ده اضح انه خير لعيلة مبارك !!!!


اللى زعل زعل .. واللى اتصدم اتصدم .. واللى فرح شمت ... خلاص خلصنا !
انما يعلن الحداد فى مصر بسبب وفاة طفل !!!! ده انا ما اقبلوش !
ايا كان الطفل ده مين


انما افتح التليفزيون الاقى القنوات المحلية مارشات عسكرية وقران !
وافتح الدش الاقى كلهم دلاديل جايبين قران !
ده يبقى اسمه عبط


دريم ودريم 2 وابتهالات واغانى دينية .. المحور وروتانا والحياة وحتى ميلودى وما شابهها !
OTV !!!!
حتى نجيب ساويرس مشغل قران !


كله مشغل قران !
طب فين المارشات العسكرية؟


ومرسى ابن المعلم الزناتى مات يا رجاااااالة !

PATHETIC !

شئ يخلى اللى الموضوع بالنسبة له .. يشمت !
يفتح باب الشماتة والقرف لكل اللى قالوا ده طفل ومالوش علاقه بجده وعمه يعنى
يخليه يقول (احسن) ويطلع لسانه ويقول خلى جده يجرب






انا غير راضى عن الهبل اللى حصل ف القنوات الفضائية والارضية ده !
يعنى ايه يعنى طفل مات؟
ما فى عشرات الالاف من المصريين ماتوا ف العبارة اللى غرقت ومساكن الدويقة اللى وقعت وف اقسام الشرطة م التعذيب وبالمحاصيل المسرطنة والفراخ ام انفلونزا والسمك المسمم والبقر المجنون والقرف المعتوه وغيره من الامراض الرائعة اللى ماشفناهاش ف عهد اى حكومة تانية


اه صحيح


احنا اصلا ما شفناش اى حكومة تانية




صحيح
كلب الريس مات .. راح يعزى فيه رؤساء
الريس نفسه مات .. ماراحلوش ولا كلب

مش اى كلام فاضى معقول - 1

الدنيا ماينفعش تكون اصعب من كدة

هى طبعا ينفع .. بس الواحد لما بيبقى ف موقف م المواقف دى بيشوفها غامقة قدامه

-------------------------------

حتى النوم مش مطاوعنى

-------------------------------

اسود اسود اسود اسود

مفيش بنى حتى؟

طب كحلى

----------------------------

 قمت نمت

ورجعت بعد ما مانمتش

جسمى تعبان ومحتاج يستريح بس دماغى مش مطاوعانى

وقمت وانا شبه مقرر انى انزل الشارع وافضل امشى لحد ما رجليا توجعنى

مش بحب لما دماغى تفضل تفكر ف مية حاجة لحد ما اصدع

-----------------------

طب مانا اللى خليت المجتمع يلفظنى م الاول

-----------------------------

هل انا شخص بهذا السوء؟

تمخض الجمل فولد فأرا

انتظر المصريون طويلا
ثم انتظروا
واخيرا خرج علينا رئيس الوزراء الثائر د. عصام شرف فى بيانه الى الأمة

البيان الذى تم الاعلان عنه على انه سيحمل قرارات مهمة وقوية
البيان الذى تأخر لأكثر من ساعة ونصف لاسباب غير معلومة
وجاء البيان
وبدا ب(اعتقد ان انتوا تتفقوا معايا ان احنا بنمر بلحظة تاريخية) .. وانتظرت شخصيا خطاب تاريخى يليق باللحظة التاريخية
ثم (اصدرت القرارات التالية) .. وترقبت القرارات التاريخية
وجاءت ال(قرارات) .. بلا قرارات!

1- اجراء تعديل وزارى خلال اسبوع
2- اجراء حركة محافظين تتفق وتطلعات الشعب قبل نهاية الشهر الجارى
3- تكليف السيد وزير الداخلية بالاسراع فى اعلان حركة وزارة الداخلية
4- اناشد المجلس الاعلى للقضاء بتطبيق مبدا العلانية على جميع محاكمات رموز النظام السابق على ان تكون المحاكمات منجزة ليطمان الشعب وترتاح اسر الشهداء
5- اصلاح هياكل المؤسسات الصحفية فى اسرع وقت

لماذا أعلن الدكتور عصام شرف تشكيل الوزارة الجديدة حين تولى رئاسة الوزارة فى خلال يومين (والتى يرفض رئيسها وجود 8 اعضاء منها!)
وعلينا الان انتظار اسبوعا كاملا للاعلان عن الوزارة الجديدة؟
لماذا وضع موعدا محددا لاجراء الحركة وهو 15 يوليو, وهو نفس الموعد الذى كان معلنا من قَبل من قِبَل وزير الداخلية
طب ليه هاتنهى خدمة قيادات الشرطة اللى اشتركوا فى قتل الثوار من غير ما تحقق معاهم؟؟؟ ليه ما اكتفيتش بإيقافهم عن العمل؟
هياكل المؤسسات الصحفية فى اسرع وقت .. اللى هو امتى؟ .. واشمعنى الهياكل الصحفية, فين الاجهزة الادارية والقيادات فى التعليم العالى وغيرها من المؤسسات الحكومية؟

وخرجنا من البيان ب(قررت ان اتولى بنفسى رئاسة مجلس ادارة صندوق رعاية ضحايا ثورة 25 يناير)

وانتهى البيان فى دقيقتين, انتهى قبل أن يبدأ


فين القرارات؟
فين اخبار الشعب بأن قرار انهاء خدمة قيادات الداخلية هو مؤكد وانه يستم فتح تحقيق عاجل معهم جميعا؟
فين علاج مصابى الثورة على نفقة الدولة وفى مستشفيات الدولة؟ والمستشفيات العسكرية مش بس المدنية .. زى ما المحاكمات بتكون محاكمات عسكرية
فين القرارات؟

هل كان هذا البيان القصير ليعلن فيه رئيس الحكومة توليه بنفسه مجلس ادارة صندوق رعاية ضحايا الثورة؟
أم ليصبح كبيان مبارك الثانى؟


الخبر على فكرى نيوز 

Fekry News

http://fekrynews.blogspot.com/

مجرد محاولة

حقيقة

احنا فعلا غلطنا لما سمعنا كلام حزب الكنبة ومشينا وسيبنا الميدان

انا ليه نازل بكرة؟

عشان مفيش خريطة طريق واضحة

عشان مبارك بقاله 5 شهور متنحى وما اتحاكمش

عشان المخلوع نايم ف مستشفى شرم الشيخ بينال رعاية خاصة وجايله طقم رعاية من المانيا ولا كأنه مذنب

عشان سوزان مبارك تعالج سنانها على نفقة الدولة, ومصابى الثورة يتلقحوا ف المستشفيات بال4 شهور لحد ما ماتوا

عشان جمال وعلاء ماحدش يعرف هما ف الحجز ولا لا

عشان حبيب العادلى لحد دلوقتى ماشفتوش بلبس الحجز ومعرفش محبوس ولا لا

عشان القناصة اللى معروفين بالاسم اللى كانوا فوق هيلتون رمسيس يصطادوا الناس لحد دلوقتى ماحدش حاسبهم

عشان امين الشرطة اللى قتل الناس والعسكرى اللى رقص بالسيف والظابط اللى شاور اشارات بذيئة للناس

عشان الحرامية اللى محكمة الجنايات طلعتهم براءة

عشان القضاة خدوا اجازة شهرين ولا كأننا فى حالة حرجة

عشان مبارك والعادلى ايدهم لسة ملوثة بدم الشهداء

عشان الشرطة مش فى خدمة الشعب

عشان كل ده

انا نازل بكرة التحرير ان شاء الله

ترشيحاتى لكتاب ال100 تدوينة

نتيجة البوست اللى طلب فيه اراء الناس بخصوص ترشيحاتى لكتاب ال100 تدوينة

اللى شاركوا فى (رأيك) اختاروا (عندما تكون صاحب قرار) 3 مرات, و(عن حضانة طنطا) مرة
التعليقات على البوست اختارت (عن حضانة طنطا) مرتين و(عن استفتاء 9 مارس) مرة و(يوم التدوين ضد التحرش الجنسى) مرة

يعنى النتيجة:
1- عندما تكون صاحب قرار (3)
2- عن حضانة طنطا (3)
3- عن استفتاء 19 مارس (1)
4- يوم التدوين ضد التحرش الجنسى (1)

الكتاب طالب ترشيحات ل4 تدوينات فى شهر يونيو على ان يكون منهم تدوينة واحدة ادبية وتدوينة واحدة سياسية وتدوينة واحدة اجتماعية وتدوينة واحدة خاصة بمواضيع اخرى

انا اصلا ما عملتش تدوينات ادبية .. فرشحت 3 تدوينات بس

بما انى كنت فعلا كنت مايل لصاحب قرار وحضانة طنطا

فترشيحاتى كانت كالتالى:

التدوينات السياسية: 02 يونيو: اختبارات عذرية؟؟؟؟

التدوينات الاجتماعية: 08 يونيو: عن حضانة طنطا

التدوينات اخرى: 17 يونيو: عندما تكون صاحب قرار

ترشيحى للتدوينات السياسية كان بين (عن استفتاء 19 مارس) و(اختبارات عذرية) .. بس فضلت انى ارشح اختبارات عذرية, وان كنت اشعر بضعف الاتنين

عموما .. اتمنى على الاقل واحدة من ال3 تدوينات تحجز مكان فى الكتاب .. ويا مسهل

Hernán Crespo 36

 

Hernán Crespo

05-07-1975 - 05-07-2011

03-07-1999

زى النهاردة من 12 سنة خدت الحزام الاسود فى الكاراتيه

اختاروا معايا

انتهى الحمد لله شهر يونيو اللى اشتركت فيه فى حمــلة التدوين اليومي لشهر يونيو 2011

عملت 25 بوست من اصل 30 يوم .. فى 4 ايام كنت برة البيت اصلا وماعرفتش اقعد ع النت, ويوم واحد بس هو الىل مانزلتش فيه البوست بمزاجى

دلوقتى انا هاقدم ان شاء الله فى مشروع كتاب ال100 تدوينة

رشحولى واحدة من ال7 تدوينات دى اقدمها للمشروع

17 يونيو: عندما تكون صاحب قرار 

30 يونيو: 30 يونيو

02 يونيو: اختبارات عذرية؟؟؟؟

08 يونيو: عن حضانة طنطا

 

19 يونيو: عن استفتاء 19 مارس 

20 يونيو: يوم التدوين ضد التحرش الجنسى 

24 يونيو: ثورة غضب أبناء مبارك 

وعليه

بما انى عارف ان الاقبال هايكون - كالمعتاد - تاريخى على الردود هنا فى التدوينة دى وممكن 3 بحالهم يردوا

فتسهيلا على الكسلانين هاحط مؤقتا تواريخ التدوينات دى ف (رأيك) .. عشان اللى عاجبه تدوينة يضغط بس على تاريخها

والله الموفق

30 يونيو

زى النهاردة من 8 سنين, 30 يونيو 2003 .. خلصت ثانوية عامة

اول ما خلصت امتحان الرياضيات 2 قعدت اعيط جامد

واللى معايا ف اللجنة فضلوا يقولولى طب راجع معانا يمكن تكون مش حالل غلط

انا ماكنتش بعيط عشان حالل غلط ولا حاجة .. انا كنت اخيرا تخلصت من ضغط نفسى وعصبى سببلى عقد نفسية يمكن تكون مصاحبانى لحد دلوقتى

خلصت الامتحان ورحت الستاد يوميها كان نهائى كاس مصر بين الاهلى والاسماعيلى ورفضوا يدخلونى الستاد عشان كان معايا الة حاسبة

اقولهم يا جدعان انا كان عندى امتحان يقولولى لا .. طب اعمل ايه .. وديها البيت وتعالى

اتغير فيا حاجات كتير اوى ف ال8 سنين اللى فاتوا دول

8 سنين يعنى اقل بحاجة بسيطة من ثلث عمرى كله

وزى النهاردة من سنتين - 30 يونيو 2009 - بابا كان هايتحجز فى المستشفى بس هو مارضيش وقالهم هايبقى يجيبلهم عينة من الكبد والكلى من عيادة خارجية

زى امبارح بالليل من سنة - 29 يونيو 2010 - كنا واقفين ف الشقة بنتفرج عليها عشان نقرر هانعمل ايه فيها وهانحط هنا ايه وهنا ايه

كانت اول زيارة بعد ما قرينا الفاتحة .. اللى كانت زى يوم الحد اللى فات من سنة .. 26 يونيو 2010

ياترى 30 يونيو 2012 هاكون فين؟

ف بيتى مع مراتى؟ هاتكون حامل؟

هاكون ف شغل تانى احسن او اترقيت ف الشغل اللى انا فيه؟

علاقتى هاتكون عاملة ازاى بالناس؟

الناس هاتكون ردت على ام المدونة اللى بيخشوها بس ومابيردوش عليها دى؟

ياترى 30 يونيو 2013 هايكون ازاى؟

هاكون شايل عيل ولا لا؟

مرتبى هايكون وصل كام ساعتها؟

ولا هاكون عاطل؟

ياترى 30 يونيو 2019 - كمان 8 سنين - هايكون عامل ازاى؟

هاكون قاعد بتكلم مع بنتى اللى هاتكون خدت اجازة اخر السنة وقاعدين نرغى انا وهى ف البلكونة وبحاول أثقفها وأعلمها حاجة جديدة؟

هاكون عملت اول مشروع ولا لا؟ ياترى هاينجح؟

ياترى 30 يونيو 2035 هايكون عامل ازاى؟

بنتى الكبيرة ان شاء الله هاتكون خلصت الجامعة؟
هاتكون لسة بتحبنى؟

هاكون بقيت رئيس للجمهورية؟

مشاريعى هاتكون كبرت ولا لا؟ بقيت مشغل كام واحد؟

ياترى هاكون عايش؟

كله فى علم الله

____________________________________________

شهر يوليو السنة اللى فاتت كان صعب اوى

من الشهور اللى الواحد مايحبش انها تتكرر تانى

يارب السنة دى يكون مختلف, واعرف اعمل الحاجات اللى انا عايز اعملها فيه