مدونة عمرو فكرى

عمرو فكرى

ربنا خلق الكائن الحى الاول (الفرخة) وبعدين الكائن ده بدأ يتناسل ويجيب عيال عن طريق البيض !

عمرو فكرى

الحريةةةةةةةةةة

اخيرا خلصت التربية العسكرية بتاعتى واللى استمرت من 9 اغسطس لحد النهاردة الصبح

الاول ده الجروب بتاع التربية العسكرية ع الفيس بوك للى اداها او لسة هاياديها

برغم كل شئ ..
بس والله كانت لذيذة
وحسيت انى زعلت او اتضايقت كدة لما خلصنا ومشينا

لما خلصنا حل الورقة رحت سلمتها للنقيب وليد واللى سلمت عليه هو والرائد زكى واللى كانوا بيراقبوا علينا فى الامتحان - او كانوا المفروض بيعملوا كدة يعنى : biggrin

- ورحت على احمد سعيد (العريف) وسلمت عليه وبسته .. الواد ده كان راجل معانا جدا .. لما شافنى وسلمت عليه قالى : بس والله شكلك بقى قمر اما حلقت lol

شعور غريب كدة وانا بسلم على الناس اللى عاشرتهم اسبوعين وانا عارف انى تقريبا مش هاشوفهم تانى فى حياتى
موقف اثر فيا لما حازم رافت (مسلسل 12) قال لحسان عزولى (13) : نتقابل قريبا .. مع انهم ولا هايشوفوا بعض ولا هايتقابلوا تانى ولا معاهم نمر بعض ولا حتى بيخشوا نت عشان يشيتوا .. وواحد شغال فى التجارة والتانى شغال فى الجبس

حازم جه وهو طالع ع السلم وماشى راح مسلم عليا وقالى مش عاوز حاجة؟ ما قدرتش ارد .. فقد ضحكت ورفعت ايدى على بقى بستها ثم على دماغى بمعنى الف شكر

واما مايكل عزت (الحكمدار) واللى كنا بندله نقوله يا حيكو biggrin

جه يسلم علينا ويقولنا فرصة سعيدة جدا ولا سامر رشدى اللى فضل قاعد لحد اخر لحظة بيحل وغشيت منه اسئلة كتير biggrin

. انا فضلت احل اللى عارفه فى الامتحان لحد ما جمعت ف الاخر كام سؤال مش عارفهم رحت ناقلهم من سامر وحازم والشيخ كريم وكابتن اسامة عادل اللى كنت عرفت انه مدرب كاراتيه زيى

مانساش برضه الشلة اللذيذة دى بتاعة مسلسل 38 والشهير بماندو (الواد ده مسخرة . كان منظره يهلك م الضحك وهو عمال يغيظ العسكرى محمود امبارح بعد ما خلصنا امتحان العملى والطابور وطالعين المدرج وماشى يطلعله لسانه ويرقص كدة ويهز دراعاته) .. ومسلسل 31 والشهير بمهران وصاحب الكلمة اللى كان بيقولها على طول لاحمد سعيد (يا معلمى) .. ومسلسل 37 والشهير بكوتا او كوتة بتشديد التاء .. واللى كان قاعد فى البنش ورايا وكل ما اقوم واقعد يروح شايل الموبايل بتاعه بسرعة من ع البنش وخايف لاخبطه lol

ولا الناس المشاغبة اللى ارقامها بقت محفوظة .. محمد ابو لابتوب واللى بسببه عملنا البحث يدوى عشان بيقولوا انه اتفق مع المكتبات برة على الموضوع ده ونعمله كمبيوتر وظبطهم وكدة biggrin

.. و107 و310 اللى كانوا ضيوف دائمين عند الظباط biggrin

الظباط بقى !!!! .. الرائد زكى (صاعقة) واللى كلمنا شوية صغيرين جدا اول يوم بس اللى كان حفلة تعارف عسكرية .. وشغلنا خمس دقايق فى طابور الصبح يوم الحد فى تانى اسبوع وخلانا نقول النشيد بتاع الصاعقة يوم التلات قبل نهاية الدورة ب3 ايام .. وهو اللى راقب علينا النهاردة اخر يوم فى الامتحان .. وكلمنا قبل الامتحان شوية .. الراجل ده فعلا انضف ظابط فيهم كلهم
النقيب وليد (مدرعات) محترم لاقصى حد وعلى طول ما يقولناش غير يا حضرات .. بس فيه سنة رخامة شوية كدة
اما بقى الرائد تامر زكى فده اوسخ مخلوق فى التربية العسكرية (مخابرات حربية) ثم الرائد محمود سيف النصر (اوسخ مخلوق بالتساوى) فى التربية العسكرية (استطلاع على ما اتذكر)
وطبعا المقدم حسن صفوت مدير الادارة . وهو تقريبا اللى علمهم الوساخة تبقى ازاى
كان فى واحد بييجى كل سنة مرة نشوفه ف الطابور ما اعرفش عنه حاجة غير انه حاطط نسر على كتافه يعنى رائد .. وفى المقدم عبد الرحمن ده برضه ما اتكلمش غير شوية كدة اول يوم وجالنا قعد معانا محاضرة مع النقيب وليد

العساكر بقى .. العريف احمد سعيد (بنى ادم محترم جدا) .. اول يوم خدنى مخالفتين شعر ودقن وكرهته اوى .. بس الايام اثبتت انه بنى ادم محترم لاقصى درجة
محمود .. ده توتو خالص وطول الدورة كنت عاوز امسكه اقسمه نصين .. عنده عقدة نقص فظيعة .. بس بعد ما سلمت على احمد (كان واقف جنبه) وخرجت م المدرج وانا نازل السلم م المبنى حسيت اد ايه الواد ده غلبان فحت biggrin

.. لدرجة انى كنت هاطلع تانى اسلم عليه بس قلت لا خلاص انا عاوز اروح biggrin

.. بس عموما اى شعور من جوايا بالكره ناحية توتو ده اعتقد انه راح وانا نازل ع السلم مش عارف ليه .. لا بس الواد الصراحة غلبان غلبان يعنى biggrin

منظره كان بيبقى وحش اوى لما مانرضاش نشتغل معاه ف طابور الصباح ونقول بصوت واطى وبعدين اول ما احمد هو اللى يشغلنا نرج الجامعة lol

.. بمناسبة الطابور .. الطابور النهاردة كان لذيذ جدا .. احمد قعد يحاول يقولنا نشيد الصاعقة بس كان بيتلخبط وكلنا هلكنا م الضحك .. بعد ما حاول 3 مرات وماعرفش جاب واحد قالنا النشيد وف الاخر قال هو اخر 3 كلمات منه وراح مكمل بنشيد تانى بقى biggrin

كان بيقول واحنا نرد عليه .. تربية .. عسكرية .. جامعة .. عين شمس .. كلية .. تجارة .. رجالة .. كلية .. حقوق .. رجالة .. كلية .. اداب .. رجالة .. وفضل كدة زى ما نكون فى فرح وعمالين ننقط وحيى كلية كلية وف الاخر كلية تجارة احسن كلية احسن كلية biggrin

باقى الكليات كانوا واقفين برضه ف الطابور بس بعيد شوية .. قعدوا يهيصولنا لما حييناهم biggrin

.. مش باقولكوا كان فرح

عمرو فكرى

الراجل اللى خبطها بقى اول ما عدى راح واقف على طول ونزل جرى يقول انا اسف يا جماعة ومستعد للى تطلبوه واى حاجة عاوزينها انا تحت امركوا .. وقالنا نروح ناخدها عنده ف العربية بس بنبص لقينا الكاوتش بتاع فرقع !
غالبا فرقة قبل ما يخبطها بمتر ولا حاجة !!!!
المهم بعد ما رحنا المستشفى جه وفضل واقف ومستنى يتطمن عليها وكان مستعد لاى حاجة فعلا لحد ما قلناله لا خلاص امشى انت وايدنا الحادثة ضد مجهول عشان الراجل ما يتبهدلش فيها
الراجل كان واقف وغرقااااااان ميا من العرق وكان خلاص هايعيط وهو عمال يقولنا انا متاسف جدا وربنا يكتر من امثالكوا وباكرر اعتذارى .. وفضل شوية يدعى كدة لحد ما مشى
لما بعتنا جبنا الحاجة العليقة والدوا وعملنا اشاعتين وكدة بابا قال خلاص مش هانعمل للراجل حاجة ابقوا خلوه بس يدفع حق الحاجات دى فماما قالت لا حرام بلاش

المهم

عمرو فكرى

انا كنت هافضل مواصل ومانامش .. وكنت بافكر اخرج اصلا م الشقة وبالتالى كنت هاقفل الترباس
وكنت بافكر انام الفجر عشان اصحى الظهر

بس اللى حصل انى قررت فجاة انى مانزلش بدرى النهاردة وااجلها لبكرة ودخلت نمت على عشرة ونص
عشان الحرامى يدخل ويخلص ويخرج والناس تصحينى اربعة

من 3 ايام نزلت البنك صرفت حوالة مبعوتالى من امريكا
خدت 1110 حطيتهم ف الدرج عندى مع حوالى 150 تانيين ... وفى 1108 حطيتهم ف اوضة بابا وماما ع التسريحة !
مالقيتهومش طبعا ! .. بس بافتح الكوميدينو اللى كان جنبى وانا نايم والراجل مافتحوش فلقيت الفلوس ف وشى .. مش مستخبية حتى

الحمد لله على كل شئ
______________

عمرو فكرى

انا شفت حتة يوم ربنا مايوريهولكوا

صحيت الساعة 6 الفجر وانا مش قادر اقف على رجلى اصلا
ماهواش تشبيه او تعبير .. وانما فعلا ماكنتش قادر اعدل جسمى من النوم على جنبى للنوم على ضهرى مثلا او اقوم من السرير لان ضهرى كان واجعنى بشكل بشع .. ولما قمت اصلى ماكنتش حاسس بنفسى وكنت دايخ وعمال اتهز
وكان حاجة واقفة ف زورى وسخن وحاسس ان ماعنديش مناعة وكان عندى كل اعراض البرد بس من غير رشح

انا اصلا فى ال3 او 4 ايام اللى فاتوا نمت ما مجموعه حوالى 6 ساعات
وصحيت على الساعة 6 عشان انزل اروح النادى عشان اروح بالعيال اعمل بيهم عرض فى نادى هايزوره محافظ القاهرة عبد العظيم وزير وغالبا معاه شخصيات مهمة
المهم انى ماكنتش قادر اقف ولا افتح عينى اصلا وكنت لما باحاول ادعك ضهرى ايدى كانت بتوجعنى
فضلت نايم ف السرير حوالى ساعة الا ربع وقررت فجاة انى هاقوم واروح لو هاموت يعنى عشان الكابتن كان معتمد عليا انا وانا الوحيد اللى رايح مع العيال ولومارحتش ما اعرفش ايه اللى هايحصل (وفعلا لو ماكنتش رحت مش عارف كان هايحصل ايه مع الناس دى)
المهم انى قمت بالعافية شربت كوباية نسكافيه ماما كانت عاملاهالى الساعة ستة وكان معاها غالبا طبق رز بلبن مش عارف انا ماكنتش مفتح عينى ساعتها

وانا باتحرك غالبا كنت باتأوه فماما صحيت تشوفنى مالى وصحت بابا ادانىبروفين على ما اعتقد ونزلت وانا مش عارف انا ازاى بادوس على رجلى اصلا
ركبت مواصلتين لحد ما وصلت النادى الساعة سبعة ونص تقريبا فى الميعاد
رحت لقيت اولياء الامور واللعيبة والناس كلها قاعدين برة النادى ع الارض ومش راضيين يدخلوهم .. ومعاهم كابتن احمد خالد !

دخلت طبعا اتكلمت مع المسئولين جوة خليتهم يدخلوا الناس يقعدوا جوة ف الجنينة وجمعتهم كلهم ف مكان واحد

مين احنا؟

العدد اللى راح بالظبط كان 36 لاعب كاراتيه 18 ولد و18 بنت .. و4 لعيبة اراتيه برضه بس كبار وطوال يعنى واخدينهم زى مساعدين او عشان يلعبوا فى الجيم .. و3 عيال عشان يقعدوا ف المكتبة .. و2 كباتن معايا احمد خالد ومودى .. وانا
والمفروض ان انا المسئول عن الناس دى كلها
غير لعيبة كرة السلة ال24 اللى فضلت مسئول عنهم لحد ما الكابتن بتاعهم جه
المهم بتوع السلة ركبوا ف اتوبيس وانا ركبت العيال ف اتوبيس تانى او بمعنى اصح كربستهم ف اتوبيس تانى واديتنمرة تليفونى لاولياء امور العيال كلهم عشان يتصلوا بى يتطمنوا على عيالهم ! على اساس ان احنا هاناكلهم يعنى مثلا او واخدينهم نسربهم او نرميهم ف النيل
ما علينا

مشينا على حوالى تمانية ونص ووصلنا النادى فى مصر القديمة تقريبا على تسعة ونص ولو كنا اتاخرنا نص ساعة ماكنش هاندخل عشان الرياسة استلمت المكان الساعة عشرة وقفلت ماحدش دخل

ومن تسعة ونص واحنا واقفين ف الشمس لحد اتناشر ونص .. يعنى فى عز ما الشمس طالعة . وف مكان صعب اصلا
والعيال اللى كانوا جايبين معاهم ازايز ميا او ازايز تلج كله ساح واتشرب ف الطريق اصلا وفضلنا 3 ساعات من غير ميا تقريبا

لما كان حد بيعوز ميا كنا بدانا نروح نملا الازايز بس على الساعة اتناشر بعد ما اتاكدنا ان خلاص امان نطلع برة الملاعب وندخل الجنينة .. ونملا الازايز م الارض !
فى حنفيات ف الارض ترش الجناين كنا احنا بنملا بقى الازايز منها .. لحد ما الميا اتقطعت اصلا ومابقاش معانا ميا

احمد خالد خد العيال بتوعه عشان يروحوا صالة الجيمانيزيوم .. ومودى راح عشان يلعب بنج بونج .. والعيال بتوع المكتبة خدوهم رموهم فوق
وانا فضلت واقف تحت مع 36 عيل
ما اعرفش نعمل ايه بالظبط
هو الكابتن كان قالى اخد العيال .. واروح
بس كدة

!!!!

المهم اخترعت كذا حاجة كدة يعملوها وطلعت كام عيل بقى يعملوا حاجات كدة وفضلت اظبط وارتب وابدل لحد ما وصلت ف الاخر لكام مجموعة عيال ظابطين التايمينج مع بعض وقدرت اظبط عرض قوى مدته دقيقة ونص

جه واحد صورنا فيديو بتاع نص دقيقة كدة واحنا بنعمل بروفة . وواحد خد صورة فوتوغرافية

وبس

الراجل المحافظ دخل المبنى وباين الشمس كانت حامية عليه فلما دخل الملاعب اكتفى بعشر ثوانى باين يتفرج على الكونغ فو وبعدين فضل يعمل احاديث صحفية .. ومشى

والعيال اللى مرزوعين ف الشمس بيتعذبوا عذاب كفار دول مالهومش اهل مثلا يعنى ولا حاجة؟
العيال دى نفسيتها تبقى ايه دلوقتى لما يشوفوا ان كل ده طلع ع الفاضى ف الاخر

كان ساعتها احمد خالد جه هو والعيال بتوعه ومودى جه وبقينا كلنا موجودين على نص ملعب كرة قدم وف النص التانى فريق الكاراتيه بتاع النادى اللى احنا فيه اصلا

المهم انى لما شفت كدة لقيت كابتن السلة قال للعيال بتوعه مالناش دعوة اشتغلوا يا شباب وبدوا يعملوا العرض بتاعهم لنفسهم

رحت انا قلت للعيال احنا مالناش دعوة حد يتفرج علينا او لا .. احنا جايين نعمل عرض .. وهانعمله .. هايسكوداتشىىىى

بدات اشغل العيال الشغل اللى المفروض كانوا يعملوه ف العرض
احمد خالد فتح الموبايل وصور العيال فيديو وهما بيلعبوا العرض .. والدقيقة ونص بتوع العرض لما خلصتهم رحت بدات اسخن العيال وعملنا تمارين تسخين وتمارين اطالة وبدانا نشتغل ونعمل تمارين وعروض خدت مش عارف بتاع اربع خمس دقايق ولما خلصنا رحت ملاعب عيال الكاتا الاولى وبعدين رحت مطلع العيال القديمة وقلتلهم يشتغلوا الكاتا الخامسة

وعملنا عرض لنفسنا وصورناه فيديو .. وهاعمله على سيديهاية واديه للعيال دى

المهم ان بعد كل الكفر ده لقينا الباشا سيادة العقيد (اللى اكتشفنا بعد كدة انه طان قاعد كل ده فى المبنى جوة فى الضلة وقدامه طبق بيتى فور وكوباية شاى وعلبة كانز) بيقولنا يلا
مشيت العيال وركباهم ف الاتوبيس تانى ووصلنا النادى على الساعة واحد وربع تقريبا

فضلت قاعد مع العيال لحد ما سلمت اخر واحد فيهم لاهله الساعة اتنين وربع تقريبا

بعدها مشيت انا واحمد خالد مسافة بتاع 200 متر كدة عشان نركب نروح .. او بمعنى اصح جرينا بعض
انا والله ماكنتش قادر امشى اصلا وكنت كل شوية اهدى خطوتى يروح احمد خالد زاققنى لقدام فامشى لقدام شوية كدة بالقصور الذاتى لحد ما
خطوتى تهدى تانى يروح زاققنى وهكذا
ركبنا ف اول عربية قابلتنا وعرفنا بعد ما ركبنا انها الحمد لله رايحة مكان ما هاننزل

مشيت بقى بالظبط زى اللى (هائم على وجهه) مش عارف انا ماششى ازاى ولا هاقف ازاى

وصلت البيت وطلعت الدور السادس ! وخبطت ع الجيران قلت لطنط تصحينى على صلاة العصر بالظبط عشان انزل اروح المدرسة .. قالتلى مش هاتلحق تنام ساعة قلتلها معلش عشان الشغل بس واديتها المفتاح عشان لما ما اعرفش تصحى تدخل تصحينى .. دخلت ريحت ع الكنبة ولما جيت اقوم اتوضا لقيتنى مش قادر اقوم وفضلت بتاع دقيقتين باحاول اقوم مش عارف .. رحت مكلم الكابتن قلتله انا مش رايح المدرسة النهاردة اتصرف
وخبطت على طنط تانى قلتلها لا خلاص انا مش نازل فهانام شوية وابقى صحينى على الساعة سبعة عشان اصلى العصر وانزل اروح القصر العينى مشوار تانى .. جابتلى اكل بقى (لاحظ انى كل ده ما فطرتش .. ولا حتى شربت كوباية نسكافيه!)
كلت وصليت الضهر ونمت
ثوانى ولقيتها بتصحينى بتقولى قوم اصلى العصر الساعة خمسة تقريبا !
قمت صليت العصر واول ما ريحت جسمى ع السرير لقيت اختى بتصحينى بتقولى انت لسة نايم قوم يلا بابا مستنى تحت
قلتلها بابا ايه هى الساعة كام .. قالتلى الساعة اتناشر قوم !

يعنى صليت العصر ونمت وطنط عرفت بعد كدة انها نامت هى كمان ما صحتنيش الساعة سبعة وانا ما نزلتش لا التمرين ولا رحت القصر العينى

ولا حتى قمت على عشرة مثلا ولقيت اختى بتقومنى وبتقولى ان الموبايل مقفول

افتكرت انى كنت قفلته لما صليت الظهر ورحت انام عشان اولياء الامور كانوا هرونى موبايلات وكل ما اقفل الاقى تليفون جديد وحتى بعد ما مشيوا وروحوا برضه بيسألوا فى تمرين النهاردة ولا لا وهانعمل ايه وبكرة نظامه ايه وكدة

المهم انى قمت لبست ونزلت ركبت العربية ماما كانت جايبالى اكل كلته وشبه نمت ف السكة
روحت البيت اول ما دخلت رميت نفسى ع السرير بهدومى .. شوية ولقيتهم بيصحونى قوم يلا هاتلنا النتيجة
مين فين ايه ليه؟
قوم يلا احنا اصلا كنا رايحين مشوار ولما عرفنا ان الثانوية العامة ظهرت جينا نجيبك عشان تجيبلنا النتيجة من ع النت .. قلتلهم اه ماشى بس هو ثوانى عشان هاخخخخخخخخخخخخخخخ
ورحت نايم تانى
على ما فوقونى كان عدى نص ساعة تقريبا التليفون ما بطلش فيها وكله بيتصل يعرف عملنا ايه فى حرب الثانوية العامة !!!!

هنا بقى وقفة كبيرة هاقف عندها وهابقى احكى فيها

المهم على ما ركبت الكيسة ووصلت الهارد وفتح (كنت قبل ما انزل باصلح كيسة تانية) ودخلت طبعا نص ساعة عشان الموقع يفتح مش راضى وهما قاعدين باصين ومترقبين .. وكل ما اجى اكتب كلمة الاقيهم قربوا اوى وعمالين يبصوا انا باكتب ايه !

وانا بادور ع النتيجة ماما كانت بتدهنلى جسمى كله بكريم عشان اتلسوع بشكل غبى
اختى اول ما جت تصحينى ف البيت اتخضت وقالت وشك محمر كدة ليه انت كنت ف البحر النهاردة ولا ايه؟
طبعا م الشمس

المهم انى يا دوب لسة مخلص موضوع الثانوية اهو وباحاول اقوم من ع الكرسى عشان ضهرى حاسه مقطوم مش عارف

جسمى بيوجعنى اوى وبشرتى واجعانى .. حد قبل كدة حس ان بشرته واجعاه؟

اللذيذ بقى ان الكابتن عاوزنى اكون عنده ف النادى كمان 3 ساعات عشان فى بقى افتتاح نادى تانى ف الزيتون وتيتة سوزان مبارك رايحة

تحضر
هأو

عمرو فكرى

ما بين ما صويت ماما من الاوضة التانية صحانى وهى بتقولى الحقنى يا عمرو , وخروجنا من مستشفى جامعة عين شمس التخصصى .. 7 ساعات .. ما احبش حد يشوفهم , وتجربة ما احبش انها تتكرر تانى

بدون تفاصيل عشان انا لسة ما ذاكرتش حرف
ابويا كان فى حضنى وهو بيرجع وبيطلع دم من بقه .. عملناله رسم قلب واشعة مقطعية ورنين مغناطيسى والحمد لله رسم القلب والاشعة المقطعية كانوا كويسين بس لسة الرنين المغناطيسى ماجبناش التقرير

الكلام ده حصل على حوالى اربعة الا ربع الفجر تقريبا .. وخرجنا من المستشفى على حداشر الا ربع الصبح تقريبا

الحمد لله

عمرو فكرى

نزلت الجامعة عشان اعمل الكارنيه huh

(اه وربنا .. قبل الامتحان باسبوع) ورحت اشوف ملزمة مراجعة ليلة الامتحان هاتنزل امتى
لقيتهم بيقولوا انها نزلت السبت اللى فات .. يعنى من اسبوع blink

زغردى يا ام فاروق blink

!!!!!!!!!!!!

(تيييييييت) رقابة mad

يا حالولى يا حالولى .. هات الملزمة وقولى .. وصلى صلى صلىىىى ع النبى صلى صلىىىى

يا نهار اسوح ! الجزء الاول نزل السبت اللى فات والمفروض انه يكون خلص النهاردة وابدا فى الجزء التانى بقى النهاردة عشان الملزمة هاتنزل النهاردة او بكرة !

طبعا ماكانش فى مجال انى ارجع عين شمس تانى وقررت اجى العبور عشان من المفترض ابدا اذاكر شوية !!!!

انا متلخبط جدا على فكرة ومتوتر نسبيا

------
باى زا ويى .. ايه رأيكوا فى شريط نشرة اخبار عمرو فكرى دوت بلوج سبوت اللى فوق ده؟

2008-12-28

2008-12-25

2008-12-19

2008-12-18

2008-12-17

2008-12-15

2008-12-12

2008-12-08

2008-12-03

2008-11-29

2008-11-11

2008-10-17

2008-10-13

2008-10-06

2008-09-01

2008-08-21

2008-08-08

2008-08-05

2008-08-02

2008-07-19

2008-07-16

2008-06-03

2008-05-31

2008-05-29

2008-05-21

2008-05-10