عاوز اكتب

امبارح وانا ماشى ف الشارع كنت بافكر - لأول مرة تقريبا - فى ان انا عاوز اكتب حاجة جديدة ف المدونة وبختار يا ترى اكتب ايه
قعدت افكر ..

* اكتب عن امتحان الكاراتيه بتاع العيال اللى انا بامرنهم اللى كان اول امبارح الجمعة (كان يوم عصيب جدا) واللى كان اول امتحان منظم من فترة طويلة , وعيالى لعبوا فيه كويس جدا وتم الاشادة بيهم؟

* ولا أكتب عن امتحاناتى اللى فاضل عليها 6 ايام بالظبط ! وتقريبا مش مستعد نهائيا .. ربنا يستر بقى .. دعواتكوا

* ولا أكتب عن سنة 2007 وسنة 2008 زى ما مينا فايق عمل .. واللى منحاز بشدة للمسيحية (شئ طبيعى) بس ما بيجرحش فى الاسلام

* ولا أكتب أغنية تعبر عن حالتى دلوقتى .. ولا عن حالتى نفسها دلوقتى اللى مش عارف هى ايه بالظبط؟! لا مبالاة فظيعة وعدم احساس بالمسئولية؟ بس راحة بال وطمأنينة غريبة

* ولا أكتب عن منتخب مصر اللى بيتسعد لكأس الأمم الافريقية لكرة القدم .. واختيارات حسن شحاتة الغريبة ! شكلنا هاناخد على دماغنا بالقوى !

* ولا أكتب عن معرض الكتاب اللى ع الأبواب واللى مستواه بيتدهور كل سنة عن اللى قبليها والواحد مابقاش يستفاد منه حاجة نهائيا .. ده ان راحه اصلا !!!!

* أكتب عن ايه ولا ايه بالظبط؟

احترت .. وفى الاخر ... قررت انى اكتب
اكتب انى عاوز اكتب وخلاص

مواضيع كتير عاوز اكتبها .. بس هاكسل وهانساها كالعادة
بس مشكلة

المهم .. انى قلت ... انى عاوز اكتب


-------------

تدوينة استثنائية (3) : Binazir boto

بينظير بوتو
زعيمة المعارضة الباكستانية .. سابقا
مش مهم هى كانت كويسة ولا لأ واستغلت الظروف
مش مهم مساوئها والفساد اللى اتهمت بيه مرتين
المهم الموضوع نفسه
اغتيال بوتو !
للى ما يعرفش بوتو فدى نبذة بسيطة عنها من موقع البى بى سى العربى

(((((

تلقت تعليمها في جامعة هارفارد بالولايات المتحدة وجامعة أوكسفورد في بريطانيا

قاد والدها باكستان قبل إعدامه عام 1979

قضت خمس سنوات في السجن

تولت رئاسة الوزراء ما بين عام 1988 وعام 1990 ثم ما بين عام 1993 وعام 1996

تم طردها من منصبها في المرتين من قبل الرئيس الباكستاني بسبب اتهامها بالفساد

كونت تحالفا مع نواز شريف عام 2006

أنهت منفاها الاختياري بالعودة الى باكستان في أكتوبر 2007
)))))

تغطية مفصلة لاغتيال بينظير بوتو على موقع البى بى سى العربى



فيديو :
صدمة وبكاء وذهول مع اغتيال بينظير بوتو وضحايا باكستانيين

تفجير انتحاري يستهدف رئيسة الوزراء السابق



-------------------------

تدوينة الجمعة (7) : العبور تحترق

تدوينة الجمعة دى تدوينة خاصة
باكتب فيها حاجة انا كتبتها قبل كدة
ممكن اكون كتبتها فى مدونتى القديمة او فى اى موقع تانى
المهم انها هاتكون تدوينة تستحق انى اكتبها تانى

**********************************************

الكلام ده كان يوم 6 فبراير 2007



بعد ما خلصت النادى نزلنا رحنا شقة عين شمس لحد ما بابا خلص العيادة وجه خدنا فنزلنا وركبنا العربية عشان نروح العبور


واحنا ماشيين فى السكة فجأة سمعنا صوت خبط جامد وبعدين شفنا حجر ضخم بيخبط فى عربيتنا من قدام ويتقسم نصين وكل نص يطير فى جنب

كانت عربية محملة حجارة وده وقع منها او واحد غير مسئول سابه فى نص الشارع لمجرد انه كسل يحطه على جنب الطريق
وده كان طريق سريع والعربيات كلها ماشية على 90 اقل حاجة واحنا عن نفسنا بنمشى على 100 او 120 مثلا
اللى حصل ان الحجر ده خبط فى التويوتا اللى كانت قدامنا وبعدين خبط فى عربيتنا
طبعا التويوتا وقفت عشان صاحبها ينزل يشوف اللى حصل (التويوتا ورق اصلا وزمانها خربت)
واحنا نزلنا عشان نشوف اللى حصل
العربية من قدام شكلها متخرشم والله اعلم ايه اللى فيها
المهم انى عاوز اتكلم فى فكرة الحجر نفسه
ده ليه فى نص الطريق؟
ده الحمد لله اننا خبطناه مش دسنا فوقه لاننا لو كنا عدينا من عليه كان زمانه بهدل العربية من تحت طبعا
والحمد لله انه كان على الارتفاع ده وخبط فى الاكصدام بتاع العربية وماعليش فوق حبة
ده كان حجر كبير وتقيل ما يقلش عن عشرين خمسة وعشرين كيلو وحجمه اعتقد انه نص متر فى ربع متر او اكبر شوية
يعنى لو كان طلع فوق كان خرشم الازاز ومن وراه خرشمنا احنا كمان والله اعلم كان ممكن يعمل فينا ايه
اهو اللى حصل ده شئ حكمة من ربنا برضه
احنا مثلا لما بنطلع فلوس لله وبنطلعها بالزيادة فده ان شاء الله جزاءه بيبقى ان ربنا يبدلنا خير منها وبيديلنا بدالها
ممكن ماناخدش فلوس قدامها
انما ممكن حجر زى ده كان يخبط الازار والفلوس اللى بندفعها ندفع اضعافها فى ازاز جديد او عملية جراحية لحد فينا الحجر بهدله
فالحمد لله على كل شئ

المهم مشينا شوية وبعدين بنبص لقينا حريقة ضخمة على اليمين فى فيلا من الفلل

نزلنا نشوف فى ايه لقينا ماس كهربائى ضخم وعامل شرار هايل اعتقد ان بسببه النور هايتقطع عن العبور بكرة
وكمان لما نزلنا سمعنا الصوت . مش ممكن ... صوت غبى جدا والمنظر نفسه صعب
تخيل اكبر شرار كهربائى شفته فى حياته
اهو مايجيش حاجة جنب اللى شفناه النهاردة
شرار ضخم بحجم عمارة كاملة وباين من بعيد وقريب جدا من فيلا جديدة كبيرة
طبعا احنا ماكانشى ينفع نقرب منه لان الطريق فى العبور بعيد عن الفلل اللى فى اول الطريق بمسافة كبيرة وفاصل بينهم مسافة رملية ومنحدر كبير واسوار وحاجات كدة
انما الشكل من تحت باين
فوقفنا زى ما فى عربيتين وقفلت قبلينا وعربية بعدنا وقلنا لواحد من العربيات دى يبلغ بالموبايل (ماكانشى معايا رصيد) عشان لازم الناس تيجى تشوف حل قبل ما الموضوع يكبر وتبقى كارثة
الراجل كلم النجدة قاله : سلامو عليكو فى ماس كهربائى ضخم جدا فى مدينة العبور و... الو الو
الراجل قفل السكة فى وشه !!!!!

دى النجدة !!!!!

قولنا نكلم المطافى .. الو الوضع كذا كذا كذا ايه؟ البلاغ عندكوا؟
طلع ان البلاغ عندهم .. يعنى حد بلغ عن الحريقة دى وهما ساكتين !!!!!

طب العبور كلها بالعربية قريبة جدا من بعض واقدر بالعربية اوصل من اول العبور لاخرها فى توقيت زى اللى احنا كنا فيه (الساعة اتنين بالليل تقريبا) فى اقل من خمس دقايق
والراجل بيقول ان البلاغ عنده !!! يعنى المفروض يتصرف .. لكن الباشا نايم او قاعد و اللى بلغهم نايمين ومش عاوزين يتعبوا نفسهم وييجوا زى البيه اللى كان بيتفرج على فيلم السهرة وقفل السكة فى وش الراجل لما كلمناه فى النجدة عشان نبلغه !!!!!

فضلنا واقفين شوية ومفيش اى حاجة جت !!!!!

الراجل ابو تليفون راح قسم الشرطة عشان يبلغهم واحنا طلعنا ع الجهاز
رحنا جهاز مدينة العبور لقينا اتنين باشوات مولعين نار وبيتدفوا عليه فبابا جه يدى كلكس عشان الراجل ييجى فلقى الكلكس مش شغال واتضحلنا ان الحجر اياه بوظ الكلكس !!!
المهم رعشله النور قام الراجل جاى بيتمخطر فقولناله الوضع كذا كذا كذا فقالنا يا ساتر ده خطير فعلا طب انا ان شاء الله هابلغ الطوارئ , وسابنا ومشى
وطبعا ماشى على مهله يعنى لا هايبلغ ولا حاجة لانه لو كان هايبلغ كان مشى بسرعة
ولما سابنا بصيت عليه واحنا ماشيين بالعربية لقيته فضل قاعد يتدفى ومادخلش الكشك عشان يبلغ



ايه البلد دى؟؟؟؟؟؟

طب احنا المفروض نعمل ايه اكتر من كدة عشان الناس تتصرف؟
يعنى احنا بلغنا اهم 5 جهات مختصة
النجدة
المطافى
الشرطة
جهاز مدينة العبور
الطوارئ

طب وبعدين؟
ايه العمل؟
امتى الحكومة تتصرف ؟ وامتى يبقى فى ناس مسئولين بجد؟
يعنى ايه مسئول ؟
مسئول يعنى راجل مسئول عن حاجة او مهمته ان تكون الحاجة دى مسئوليته
طب ايه العمل لو هو فرط او قصر فى مسئوليته؟ هل هايلاقى حساب؟
هل حد هايعاقبه؟
انا مش فاهم
يعنى ايه النجدة؟
و يعنى ايه نكلمهم يقفلوا السكة فى وشنا؟
ويعنى ايه المطافى يقولى البلاغ عندنا؟
هل فعلا البلاغ عندهم ؟
طب دى تبقى مصيبة لانهم البلاغ عندهم وما اتصرفوش
هل البلاغ مش عندهم وقال كدة عشان يقصر مع الراجل ويقفل ويتابع الفيلم؟
طب دى تبقى مصيبة اكبر
لا حول ولا قوة الا بالله

احنا فقدنا الامل فى ان الحكومة تتصرف وانها تجيب حد يطفى الحريقة دى
أملنا فى الله
يارب
يا قدير
يارب نزل مطرة تطفى الحريقة دى
يارب اتصرف مادام المسئولين عننا مش على قدر المسئولية
يارب اتصرف طالما المسئولين ماهماش مسئولين

احنا بعد كدة كل ما نتمنى حاجة مش هانطلبها م الحكومة
اوعى !!

احنا بعد كدة هانتوجه الى الله

يااااااارب

يارب الكهربا ما تقطعش فى العبور بكرة

لانها لو اتقطعت هاتطول اوى
لان الماس ماكانش هين

يارب مش هادعيلك واقول يارب خد المسئولين
لا
يارب اهديهم
يارب مادام ماحدش بيحاسب حد فى البلد دى , أملنا ان انت اللى تحاسبهم
يارب ارزقنا بناس بتفهم فعلا ومسئولة بجد
امتى هاشوف ف بلدى ناس مسئولة بجد
ناس مسئولة ما تسيبش حجر فى وسط الطريق
ناس مسئولة تهتم بان فى شئ ممكن يؤدى الى كارثة ضخمة ومصيبة كبيرة وتبقى مشغولة وقلقانة وبتتابع
ناس مسئولة بجد


اعتقد انى مش هاعيش عشان اشوفهم
اتمنى ان ولادى .. او بلاش اكون متفائل زيادة عن اللزوم .. اتمنى ان احفادى ان شاء الله يشوفوا ناس مسئولة

تفتكروا ؟

العبور تحترق

شاهد على يو تيوب

كل سنة وانتوا طيبين

عيد أضحى سعيد عليكوا كلكوا :)

انا مشغول جدا فى الفترة الاخيرة ومش ملاحق اخد نفسى حتى
فعشان كدة بقالى فترة مش قليلة ما بدخلش مدونات للاسف !
دى حاجة من الحاجات اللى فقدتها فى الفترة الحالية بسبب انشغالى :(

افرغ من اللى شاغلنى ان شاء الله وهانطلق ...

مش عارف حتى ارد على التعليقات بتاعتكوا فى تدويناتى :(



المهم
كل سنة وانتوا طيبين والسنة الجاية ان شاء الله اللى نفسه فى حاجة يحققها :)

اه يا بقر

ده خبر ذكره موقع مصراوى وموقع فى البلد وهما اتنين من المواقع الاخبارية الخفيفة المنتشرين بشدة فى مصر


اسيبكم الاول مع نص الخبر



بقرة من أسيوط تفوز بلقب ملكة جمال البقر في صعيد مصر

أسيوط - أعلنت مديرية الطب البيطرى بمحافظة أسيوط الثلاثاء نتائج مسابقة إختيار ملكة جمال البقر فى صعيد مصر والتى أقيمت بمديرية الطب البيطرى بالمحافظة برعاية المحافظ نبيل العزبى ومشاركة أكثر من 120 بقرة من محافظات أسيوط والمنيا وسوهاج وقنا وأسوان وبنى سويف بالإضافة إلى مدينة الأقصر.

وقد فازت بقرة من أسيوط بالميدالية الذهبية والمركز الأول وتوجت بلقب ملكة جمال البقر فى صعيد مصر وتم إلباسها التاج الملكى ومنحها الميدالية الذهبية للمهرجان، فضلا عن صرف 5 أجولة عليقة مركزة هدية من المحافظ .. بالإضافة إلى شهادة تقدير لمربيها فوزى إبراهيم أحمد من قرية دوينة مركز (أبوتيج) ومبلغ 350 جنيها مصريا.

وقال الدكتور محمد مرزوق مدير مديرية الطب البيطرى بمحافظة أسيوط إن البقرة الفائزة تبلغ من العمر سنتين ، وتزن حوالى 350 كيلوجراما، وتعتبر هجينا ثالثا من السلالات المحلية وسلالة البراون سويس ..حيث أن نسبة البراون سويس تبلغ 85 % والمحلى 15 % ويتميز هذا الهجين بقصر القوام ولونه البنى اللامع وأيضا بهدوئه وجودة إنتاجه من اللحوم والألبان.

وأضاف مرزوق أنه تم توزيع جوائز نقدية شهادات تقدير وأجولة علائق مركزة لعدد 7 أبقار أخرى خلافا للتلقيح المجانى لجميع الفائزات من الوصيفات حتى المركز السابع.

يذكر أن هذا المهرجان يقام للمرة الأولى فى أسيوط بمشاركة لجنة للتحكيم تضم أساتذة من الطب البيطرى بجامعة أسيوط وفريقا بيطريا أسبانيا يمثل هيئة الخدمات البيطرية فى أسبانيا.

انتهى الخبر


يا عينى ع البقر اللى متدلع اخر دلع
خلاص حلينا مشاكل البنى ادمين عشان نحل مشاكل البقر؟
على رأى محمد صبحى فى (ماما امريكا) خلاص خدنا للناس حقوقها وبندور دلوقتى على حقوق الحمير؟ .. او البقر مش فارقة

عاوز بس اعرف هل فى حد تانىغيرى استفزه الخبر ؟ .. ولا انا بس اللى مش طبيعى ؟


يظهر ان احنا اللى بقر !!!!

المرور فى القاهرة

بتفرج دلوقتى على برنامج 90 دقيقة على قناة المحور فى فقرة بتتكلم عن المرور فى القاهرة
لفت نظرة كام رقم كدة

4.228.000 سيارة فى القاهرة (4 مليون وربع)

فى اخر سنة ونصف مليون ونصف (1.5 مليون) سيارة جديدة فى القاهرة

سنة 2017 متوقع ان تكون اقصى سرعة للسيارة 9كم/س

7000 (سبعة الاف) قتيل و30000 (ثلاثون الف) مصاب فى السنة بسبب حوادث الطريق



حد يفهمنى ازاى

تدوينة الجمعة (6) : الخطير

تدوينة الجمعة دى تدوينة خاصة
باكتب فيها حاجة انا كتبتها قبل كدة
ممكن اكون كتبتها فى مدونتى بشمساوى او فى اى موقع تانى
المهم انها هاتكون تدوينة تستحق انى اكتبها تانى

**********************************************

القصة دى كتبتها زماااااااااان .. ايام ثانوى .. من ييجى 7 سنين

********************************


ثلاث دقات طرقها رجل متشح بالسواد على باب احد الحجرات بشكل منتظم ولم يلبث ينهى دقته الثالثة حتى سمع صوتا رخيما هادئا لا يحمل اى انفعالات يناديه من الداخل قائلا : اتفضل
وجم الرجل للحظة ثم حسم قراره وفتح الباب ودلف لداخل الحجرة ليجد الرجل الذى ناداه جالسا خلف مكتبه موجها جسده نحو النافذة الكبيرة التى تقع خلف مكتبه ومعطيا ظهره للباب الذى دلف منها الرجل وواضعا احدى قدميه على الاخرى ويدخن سيجارا وينفث دخانه بشكل بطئ
اغلق الرجل الباب خلفه ودخل وقال : طلبتنى ؟
لف الرجل بكرسيه واعطى للرجل وجهه وقال : ايوة
كنت عاوز اعرف منك اخر الاخبار
قالها وهو يطفئ سيجاره فى المطفأة الفخمة الموضوعة على المكتب
ثم قام ببطء من مقعده وهو يعقد يديه خلف ظهره ونظر للرجل الذى رد عليه قائلا : كله تمام
والاربع قنابل هاتنفجر فى الاربع مدن فى نفس الوقت ونيويورك وواشنطن ولوس انجليس ولاس فيجاس هايبقوا كوم رماد
عقد الاول حاجبيه وهز راسه متفهما ثم قال للزائر : وموقف روسيا ايه؟
رد الرجل بسرعة وكانه يعرف مقدما انه سوف يطرح هذا السؤال : هاينكروا تماما علاقتهم بالموضوع بل هايستنكروا العمل البشع ده وهايتبرعوا كمان بالامدادات والمعونات البشربية والطبية للامريكان
ابتسم الاول ابتسامة سخرية وقال : يا لسخرية القدر
روسيا ؟؟؟ هاتعمل كدة لامريكا؟
ابتسم الزائر ابتسامة خفيفة ولم يعقب
انتظر الرجل لحظات وكانه يفكر فى شئ ما قبل ان يسال الزائر : والشرق الاوسط؟
رد الزائر : ماله؟
فقال الاول : عرفوا ادوارهم كويس؟
فقال الاول : مظبوط وكل واحد عارف هايعمل ايه كويس
وهنا قال الاول : جميل
وتحرك للامام قليلا ثم نظر فى عينى الزائر وقال له : انت عارف اننا كلنا ممكن نروح فى العملية دى
لازم تكون العملية باتقان شديد
فطمأنه الزائر وقال : ماتخافش
عرفنى انت بس خطة سفرك هاتكون ايه عشان اعمل ترتيباتى
تنهد الاول ثم قال : اسمع
وبدا يسرد له طريقة سفره المعقدة
وبعدما انتهى منها ودعه وطلب منه ان يكون على اتصال دائم معه
وخرج الزائر من الحجرة
واحكم اغلاقها
وابتسك ابتسامة سخرية شديدة وقال : هههه مغفل
خطة سفر؟؟؟
ثم خرج من الطابق بخطوات سريعة ويقول للحارس الكامن عند بداية الطابق : خد بالك كويس من الراجل ده
ده مجنون رسمى
واى محاولة منه للهرب استدعى زمايلك وكتفوه وخدروه على طول
فقال له الحارس : تمام يا فندم
وتركه الزائر وخرج من الطابق ليغادر المبنى باكمله

المبنى الذى كتب عليه من الخارج عبارة مخيفة للغاية






عبارة ..





مستشفى الامراض النفسية والعصبية بالعباسية



الخطير

يبقى انت أكيد

لما تصحى الصبح تبص ف المراية تلاقى عينيك ضيقة واول ما تطلع من البيت تلاقى الكل بيبتسم فى وشك ببشاشة ويقولك : أوهايو جوزايموس

يبقى انت اكيد .. اكيد فى اليابان

***

لما تحب تتفسح فتخرج تستجم فى الرفييرا وتستمتع بهواءها النقى وبعدين تقف تتفرج على جمال برج ايفيل فى وسط بلد قمة فى النضافة

يبقى انت اكيد .. اكيد فى فرنسا

***

لما تجوع وتدخل اى مطعم قدامك وتاكل الذ مكرونة كلتها ف حياتك وتخرج تركب مركب تمشى بيك ف وسط الشارع لحد ما توديك فينيسيا الساحرة

يبقى انت اكيد .. اكيد ف ايطاليا

***

لما تقف قدام قصر باكينجهام وتقعد تتنطط قدام العساكر وتتريق وتعمل اللى انت عاوزه .. من غير ما حد منهم يبص عليك حتى

يبقى انت اكيد .. اكيد فى انجلترا

***

لما تمشى بحريتك ف الشارع وتعمل اللى انت عاوزه وماحدش يقولك حرف واحد ولا يتدخل فى خصوصياتك ولا حتى يضايقك بنظرته الفضولية

يبقى انت اكيد .. اكيد ف امريكا

***

* لما تصحى الصبح تبص على نفسك فى المراية فماتلاقيهاش .. وتفتكر انك بعتها امبارح عشان مانتاش لاقى تاكل .. فتبص ع الازاز تلاقى وشك مليان عماص والناموس هراك تقريص والدبان مالى الشقة

* ولما تصحى على صوت خناقة وزعيق باكبر قدر ممكن من الشتائم والسباب بين الناس , تطلع تبص م الشباك تشم الهوا اللى مليان عادم سيارات ودخات سجاير وريحة حجر تفاح طالع م القهوة اللى تحتيكوا وتبص ع السما تلاقيها سودة مليانة دخان من حريقة قش رز

* ولما تجوع فتصوم عشان مانتاش لاقى تاكل , ولو اشتد بيك الامر اوى تروح تاكل عند عم عبده بتاع الفول فول حمضان وطعمية نص عمر وتحاسب وانت ماشى فى الشارع وتخلى بالك احسن اللى بيسوقوا العربيات ما بيعرفوش ابوهم وممكن جدا يطسوك وتطلع انت اللى غلطان .. ولما تحاسب عشان العربية ما تخبطش فيك تلاقى الطينة اللى فى الارض ومية المجارى كلهم بقوا ف هدومك عشان العربية طرطشت عليك

* ولما تكون ماشى ف الشارع تلاقى حد بيديك على قفاك مرة واحدة ولما تقوم من ع الارض تكلم امين الشرطة اللى ضربك كدة تلاقيه طالب البطاقة ورخصة السواقة .. مع انك ماعندكش عربية اصلا

* ولما تمشى فى الشارع اى حركة او اى حاجة بتعملها تلاقى الف عين باصة عليك وكل الناس بتتلككلك ومستنيالك اى غلط عشان يهبوا فيك ولو بصيت لحد تلاقيه بيبلطج عليك ويقولك انت عاوز ايه وتلاقيه مسك فيك وتلاقى الشارع كله وقف يتفرج والناس عندها بلادة وواقفين يقزقزوا لب ويتابعوا الخناقة هاتخلص على ايه



يبقى انت أكيد .. أكيييييييييد ..
أكيد فى مصر

تدوينة الجمعة (5) : عنيدة

تدوينة الجمعة دى تبقى تدوينة خاصة
هاكتب فيها حاجة انا كتبتها قبل كدة
ممكن اكون كتبتها فى مدونتى بشمساوى او فى اى موقع تانى
المهم انها هاتكون تدوينة تستحق انى اكتبها تانى

**********************************************

الخاطرة دى نشرتها فى شمساوى يوم 19-3-2006 .. يعنى من اكتر من سنة ونص




* أحبك .
- لا اّبه .
* أريدك .
- جدى غيرى .
* اريدك انت .
- لا اريدك .
* أرجوك .
- .......
* ماذا ؟؟
- أين كرامتك ؟
* ضاعت فى بحر حبى لك .
- لا اريد من لا مبادئ لها .
* لى مبادئى .
- مبادئك تختلف عمن اريدها .
* أغير منها .
- لا اريد من تغير مبادئها .
* ماذا تريد؟
- لا اريدك .
* لا أسالك عما لا تريده بل اسالك عما تريد .
- اريد اى فتاة غيرك .
* لماذا؟
- لأنى احبك !

------------------------

- انتى ؟؟؟؟
* انت ؟؟؟؟
- ........
* ........
- كيف حالك ؟
* بخير . وانت؟
- لا زلت حيا .
* كم مر من الزمان؟
- سنوات
* ألم تغيرك السنون؟
- لا يتغير المرء بسهولة .
* لا زلت غريبا !
- لا زلتى عنيدة !
* لماذا تفعل ذلك بى؟
- سلى نفسك ..
* سألتها مرارا ولا تجبنى .
- العيب فيكى اذن
* ماذا تريد منى؟
- اريدك ان تتركينى فحسب .
* لن اتركك .
- لماذا؟
* لانى احبك !

------------------------

- احبك .
* اخيرا !!!
- أحبك .
* وانا ايضا أحبك .
- كلا . حبى لكى يفوق كل وصف
* انت لا تدرى مقدار حبى لك
- عنيدة !!!!



عنيدة

سبيشيال تدوينة (4) : يونس شلبى

الله يرحمك


ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اصابات اصابات اصابات

انا بمر بيومين فى غاية الغرابة من ناحية الاصابات

خلصت امبارح ورايح اقعد وفجأة لقيت نغزة غريبة والم شديد فى رجلة
غمضت عينى وحركت ايدى جامد
ولما فتحت عينى بعدها بثوانى اكتشفت انها ابرة
عبده زميلى اللى كان على شمالى شالها وقال للمديرة الادارى اللى كانت قاعدة جنبنا ان الابرة ربعها او نصها كان جوة رجلى
هى خدت منديل من البنتين زمايلنا اللى كانوا قاعدين قدامنا وخدت كالونيا وطهرت الجرح
راح الكابتن الكبير بقى قال ان كدة مش كفاية
وراح قايم
ومولع فى رجلى

بجد ومش هزار
جاب الولاعة وراح مولع فى صباعى من تحت فى الحتة اللى الابرة دخلت فيها

دلوقتى انا المفروض استحمل الم الابرة ولا الولاعة ولا وجع التمرين نفسه؟

اه يا رجلى


انا رجلى وجعتنى لما الابرة دخلت (قصدى اتغرزت) فيها وماوجعتنيش لما الكابتن ولعلى فيها بالولاعة مع انها كمان كان عليها كولونيا يعنى المفروض تلهلب اكتر
والكابتن بيولع كنت بضحك بصوت عالى فى الاول وبعدين قعدت اراقب البنتين اللى قاعدين وهما مخبيين وشهم ومغمضين عينيهم قوى وهايصوتوا من الالم اللى المفروض ان انا احس بيه


فى نفس يوم الابرة ده وانا رايح افتح اللوكر بتاعى اجيب حاجة منه وبطلع ايدى بسرعة راحت ايدى اتفتحت من حديدة فى جنب اللوكر بطول حوالى 10 سنتى فوق الكوع

النهاردة بقى رجلى اليمين (القدم) اتخبطت فيها جامد مرتين ! وفيها دلوقتى كدمة بشعة بتوجعنى كل شوية اكتر

وصباع رجلى اليمين الصغير اتفتح
(نفس الرجل الموبوءة)

ايدى اليمين بقى فوق الكوع اتخبطت فيها النهاردة جامد وهى معلمة لحد دلوقتى

و لسة مكتشف حالا انى متعور فى كفى الاصابة دى شكلها جديدة .. يعنى النهاردة برضه

-----------------
تحديث تانى يوم :
فى الواقع .... احم ... وانا بصلى دلوقتى وبحط ايدى على ركبتى لقيتها بتوجعنى , بعد ما خلصت صلاة بشمر كم البنطلون لقيت كدمة جديدة !
وامبارح بعد ما نشرت البوست كسلت اقول ان مفصل الحوض اليمين اتجذع


اييييييه اييييييييييييييييييه كلكوا عليا ولا ايييييييييييه؟

اسكندرية .. لييييييييييه؟؟؟؟

مريت يوم 14 أكتوبر الحالى بأحد أغرب وأبشع أيامى على الاطلاق
كان تانى ايام عيد الفطر المبارك
نزلنا من البيت فى العبور الساعة 8:10 صباحا عشان نسافر اسكندرية نقضى العيد مع عيلة بابا اللى اتفقنا معاهم نقابلهم فى مكان معين ونطلع كلنا مع بعض على شقة بنت عمتى فى اسكندرية واللى جنب شقتنا اللى قلت اننا اتفقنا ناخدها بس لسة ما خلصتش وهما كانوا شطبوا شقتهم وخلصوها خلاص

رحنا لعمى فى التجمع الخامس والحمد لله تهنا واحنا بندور عليه وبندور على المستشفى اللبنى اللى هو قالنا عليها فى الموبايل
المهم اننا بعد نص ساعة تقريبا اكتشفنا اننا بنطوف حوالين المستشفى اللى كانت بمبى مش لبنى وماعرفناش انها مستشفى عشان مش مكتوب عليه اى حاجة بتاتا .. ولا يافطة ولا باب ولا اى حاجة فى اى حاجة
خدناه وطلعنا على باقى العيلة ووصلنالهم على حوالى تسعة ونص وطبعوا واقفين مستنييننا من ساعة ونص
المهم فى نص السكة عربية من عربياتنا التلاتة راحت تجيب ناس من باقى العيلة (عربية رابعة) دخلوا طنطا مش عارف يجيبوا ايه

فى النهاية الموكب اصبح 4 عربيات تحمل فى طياتها (كنت عاوز اكتب الجملة دى قوى) عيلتنا (بابا وماما وانا واختى) وعيلة بنت عمتى (بنت عمتى وجوزها وعيالهم الاتنين اللى 5 و 4 سنين) وعيلة اخوها (ابن عمتى وبناته الاتنين اللى بتاع 13 و 10 سنين) وام الاتنين اللى هى عمتى , بالاضافة الى تلاتة اعمامى (فى نهاية اليوم جالنا ابن خالة والدى واللى متربى مع العيلة قضى معانا تانى يوم اللى هو تالت يوم العيد)

حصل كلام كتير وحوارات كتير بس مش هاحكيها لانى دلوقتى مش بحكى يوم من ايامى وانما عاوز احصر اشياء معينة بعينها
وصلنا اسكندرية على الساعة اتناشر الا ربع تقريبا (يعنى الطريق من ساعة ما اتقابلنا ما اخدش اكتر من 3 ساعات)طلعنا لقينا بحر فى الشقة , الشقة كانت عايمة !!!!

الحنفيات مقفولة وكل حاجة .. بس اتضح ان الصرف الصحى ضرب فى الشقة عشان المواسير كانت مسدودة .. المهم نزلت انا وبابا واعمامى التلاتة وابن عمتى رحنا الجامع اللى فى المدينة (مينا جرين هاوس مدينة صغيرة واخدة توكيلها شركة مينا اللى عاملة كان عمارة فخمة وفى اخر المدينة مسجد الاحسان)
الجامع نفسه ماكانش فيه غيرنا بس , صلينا الظهر واستنينا العصر صليناه وطلعنا
طلعنا بقى البيت لقيناهم مسحوا الارض نسبيا وركبوا مواسير جديدة مؤقتة المهم انهم ظبطوا الشقة تقريبا
عاوز اقول طبعا ان الترابيزة الخشب والكنب عفن من المية والمية نفسها نشعت ع الحيطة والسيراميك بهت واشياء اخرى
هاحكى بس موقف واحد حصل معانا فى الجامع
كنا نايمين او شبه نايمين انا واتنين اعمامى والباقيين راحوا يشوفوا ايه الاخبار
كان فى اتنين دخلوا بيصلوا واحنا جوة فوهما قايمين من الركوع الامام قال : (سمع الله لمن حمده)
عمى كان نايم وبيشخر اول ما سمع (سمع الله) راح فايق وقال (وعليكم السلام ورحمة الله وبركاته) وبص كدة مالقاش حد راح نايم وشخر تانى :D
انا كنت مواصل من اليوم اللى قبله على الكمبيوتر ونزلت من غير ما انام على اساس انى هانام فى العربية بس ماعرفتش !!!!
دخلت انا نمت بقى فى البيت وصحيت صليت المغرب ونمت تانى وصحيت على تسعة او حاجة شبه كدة .. ما اقدرش اتذكر الوصف التفصيلى لليوم ده بدقة لانى نمت فيه كتييييييييير جدا
لكن لما صحيت لقيتهم ضيعوا اليوم فى تركيب الستاير اللى الراجل اللى عملها مش عارف غلط فى ايه وانهم بيقولوا انه حمار عشان مش عارف ايه حاجة كدة
قولنا ننزل بقى
فانا قلت ماشى يلا هوب .. ركبنا العربيات وواحنا فى الطريق اكتشفنا اننا رايحين القلعة
ما اعرفش بقى مين اللى اختارها بس كنت عاوز افهم بس قلعة ايه اللى نروحها دلوقتى !!! بالليل ! وفى العيد ! ونقدر نقعد فى اى حتة تانية فى كافيتيريا ولا ع البلاج ولا اى حتة !!!!
عموما اتحركنا الساعة 10 من البيت عشان نروح القلعة

لحد الساعة واحدة ونص واحنا فى الشارع محبوسين مش عارفين لا نتحرك ولا نقدم ولا نأخر ولا نلطم ولا نعيط ولا اى حاجة
يعنى حتى قرار العودة مش بايدنا .. ومفيش شوارع جانبية نهرب منها
تلات ساعات ونص مفيش شئ بايدينا زى المتكتف
واحنا بقى تعبانين وجانين وعاوزين نخش الحمام وقرفانين م السفر اصلا قبل حتى ما نبقى تعبانين من الوقفة
المهم اننا قدرنا نهرب فى الاخر ونرجع تانى ع الكورنيش ونمشى عشان نروح ناكل فى اى حتة فى الشارع وقررنا جاد
المهم انا كنت راكب فى عربية جوز بنت عمتى (اللى هما اصحاب الشقة)
شوية وجالى تليفون من ماما فى عربية بابا بتقولى انهم وقفوا عشان عربية ابن عمتى العجلة بتاعتها نامت وهما وقفوا معاهم عشان يغيروا الاستبن
ساعة كدة كمان واحنا مستنيينهم عند جاد لحد ما وصلوا وعرفنا انهم بعد ما غيروا العجلة وركبوا الاستبن ومشيوا .. الاستبن نفسه نام !!!!!
يعنى هى ايه فرصة ان العجلة تنام؟ احتمال قليل نسبيا
امال ايه بقى احتمال ان العجلة تنام وتغيرها ويروح الاستبن هو كمان ينام ؟؟؟؟؟؟ دى حاجة بتحصل مرة فى العمر !!!!
روحنا البيت اخيرا على الساعة اربعة الفجر بعد 6 ساعات من القرف والتعب والغضب والألم
عملنا شاى وبنشرب .. كوباية الشاى اتدلقت على ماما حرقتها !!!!

يعنى ايه احتمال ان الصرف الصحى يضرب فى الشقة؟ مرة فى العمر؟
ايه احتمال ان العجلة واستبنها يناموا هما الاتنين؟ مرة فى العمر؟
ايه احتمال ان كوباية الشاى تقع تحرق اللى ماسكها؟

طب ايه بقى احتمال ان كل ده يحصل فى يوم واحد ؟؟؟؟؟؟؟؟

يوم غريب

21

اه والله

النهاردة كملت 21 سنة

بفكر اسيب البيت :D


---
لا بلاش
وانا بكتب البوست ده لقيت بابا جاى يدينى 100 جنيه وبيقولى كل سنة وانت طيب :P

عشرة وشوكة ونضارة ومذاكرة وكورة وبرد وعبقرى وامتحان وامتحانات

بقالى كتير ما كتبتش عنى
بقالى كتير ما كتبتش اصلا

الكام يوم اللى فاتوا كانوا غراب شوية

انا بصوم العشر الاوائل من ذى الحجة (اول يوم بس نسيت وفطرت) .. يوم الخميس اللى فات كنت بافطر سمك ... لحد دلوقتى فى شوكة واقفة ف زورى ع الجنب ناحية الشمال شوية ومش راضية تنزل (النهاردة الحد .. يعنى تالت يوم النهاردة اهو)

النضارة كانت اتكسرت ولاول مرة تقريبا فى 3 سنين اعمل كشف (بعد ما بابا فضل يتحايل عليا سنة)
عملت النضارة
النضارة الجديدة لذيذة .. لونها شفاف برضه زى اللى فاتت .. بس اللى فاتت كانت اصفر .. دى فضى او ابيض شفاف .. لذيذة
عملتها انتى ريفليكشن وبلاستيك .. يعنى دخلت ف 145 جنيه !


سبت شقة العبور ورحت بت فى شقة عين شمس يوم الخميس وعند جدتى ف منشية البكرى يوم الجمعة
ال3 ايام دول .. خميس جمعة سبت ... خلونى احس ان فى امل انى انجح السنة دى :D

انا كنت حاسس انى هاعيد السنة (لسة الاحساس ده عندى بس بشكل نسبى) قبل يوم الخميس
بس خميس وجمعة وسبت قعدتهم برة العبور سبحان الله عرفت اذاكر وانجزت
العبور يظهر نحس (مع انها بتاعة التقديرات :D السنة اللى فاتت اول مرة انجح بتقدير .. 3 امتياز و2 جيد جدا و1 جيد وتقدير عام جيد) والسنة دى رابعة ويا مسهل عاوزين نخلص

برضه النضارة القديمة يظهر كانت نحس
الخميس كنت فى النادى يعد التمرين باتفرج على اصحابى وشوية عيال بيتمرنوا معانا وهما بيلعبوا كورة
شوية ونزلت لعبت معاهم .. نزلت مع فريق تعبان كان مغلوب 2-1
نزلت وانا مش شايف حاجة اصلا , فى دقيقتين كنت جايب 3 اجوان واتقدمنا 4-2 فى رقم قياسى لعدد الاجوان اللى جبتها فى اقل فترة زمنية ممكنة من ساعة ما رحت بدر تقريبا :D
بغض النظر عن ان الفريق اتغلب بعد كدة 8-4 :lol:


كان عندى الاسبوع اللى فات نزلة برد رهيبة .. اكتشفت امبارح انى خفيت



اكتشفت من شوية بالصدفة عازف كلارنيت تركى يدعى حوسنو

HÜSNÜ ŞENLENDİRİCİ

حوسنو من مواليد بيرجاما مواليد 12-7-1976 .. وهو صاحب اللحن الاصلى اللى اتسرق وغناه محمد فؤاد فى اغنية طمنى عليك

(طمنى عليك - موسيقى فقط بدون صوت فؤاد)

بغض النظر عن انى باعشق الاغنية دى
بس اكتشفت ان حوسنو ده جامد جدا
ياريت تدخلوا هنا تشوفوه وهو بيعزف اللحن الاصلى لـ(طمنى عليك) .. او الاغنية الحقيقية المسماه (اسطنبول اسطنبول اولاللى)
وده الفيديو كليب اللى عمله للاغنية بيغنى فيه لبلده وفؤاد خدها غناها لحبيبته

وبالمرة عشان ما اعملهاش تدوينة كاملة
خش هنا وشوف الناس وهما بينقطوا حوسنو سنلندريسى .. احنا ف مصر بننقط الرقاصات وهما ف تركيا بينقطوا العازفين !



النهاردة الحد انزل النادى فى اخر تدريب قبل العيد
بعد كدة هاريح 8 ايام وانزل النادى تانى يوم الاتنين اللى بعد العيد ولمدة 5 ايام متواصلة ينتهوا يوم الجمعة 28-12 موعد امتحان الحزام للعيال
ان شاء الله ينجحوا كلهم
هايكون اخر يوم لى فى النادى لمدة شهر على الاقل
مش هاروح النادى تانى لحد شهر فبراير
لما اخلص امتحانات نص السنة بقى
اللى هابدأها يوم خمسة يناير 2008 !!!!

ربنا يووووستووووووووووووووووووووور



---------------

تحديث (17/12/2007 2:10 am)
نسيت اقول ان اللى عرفنى سكة حوسنو سنلندريسى هو المدون مشمش صاحب مدونة طرطشة افكار

كنت معزوما

كنت معزوم

هاحكى الموقف باختصار شديد
كنت معزوم النهاردة ع الفطار فى الشرقية .. استاذ اسماعيل ابو اسامة (اللى انا بمرنه عشان نازل امتحان حزام اسود) كان هو اللى عازمنا انا والكابتن بتاعى كابتن محمد (الكابتن الكبير فى النادى) ومعانا مدام حنان المدير الادارى للفريق واللى هى فى نفس الوقت بتشتغل مع استاذ اسماعيل مدرسة فى دار ابرار مصر للمعاقين ذهنيا والمتوحدين والمتأخرين عقليا وخلافه الدار دى اللى هو يملكها ويرأسها
استاذ اسماعيل طنطاوى ده كان جه مرة مع احمد شوبير فى اواخر حلقاته فى قناة دريم ومعاه واحد اسمه محمد حمدى متأخر ذهنيا بس بيقرا قران كويس (صوته جميل جدا وحافظ القران كله تجويد وترتيل من غير ما يعرف يقرأ أو يكتب) وكانوا بيعرضوا مشكلة انهم مش لاقيين حد يدعمهم وكلام كتير ومشاكل كتيرة لا داعى لسردها هنا اولا لانه مش مكانها وثانيا لانها اصبحت طبيعية فى العصر الحالى
المهم اننا كنا معزومين مع بعض اللى شغالين فى الدار عشان نفطر فى الشرقية عند استاذ اسماعيل طنطاوى فى العزبة بتاعته
نزلت زى ما كنت متفق مع مدام حنان واستنيت الاتوبيس فى موقف العاشر الساعة اتنين
الاتوبيس جه الساعة اتنين ونص وكان فيه احمد السواق ومعاه عم عبد الله العامل العجوز بالدار (واللى ساق الاتوبيس فى اغلب الطريق عشان احمد راح ينام) , وكان موجود استاذ محمد ومراته المنتقبة (والظريفة جدا) مدام (او نقول ميس) ناهد ومدام حنان وابنيها احمد (لاعب كاراتيه معانا) وكريم الكبير اللى بيلعب كورة , و ام عبد الرحمن وابنها عبد الرحمن اللى عنده سبع سنين لكن عمر عقله حوالى سنتين وكان فى محمد حمدى (او شيخ محمد) اللى طلع فى دريم مع استاذ اسماعيل وكان فى 3 بنات شغالين فى الدار عمرهم فى حدود 20-22 سنة (مى و هيام واسماء تقريبا) بالاضافة الى الكابتن محمد (الكابتن بتاعى وكبير المدربين فى نادى بدر) بالاضافة الى اسامة واسلام ولاد استاذ اسماعيل (واللى انا بمرنهم فى النادى)
المهم ان عم عبد الله الحمد لله وصلنا على خمسة الا ربع يعنى فى تلات ساعات الا ربع !!! صلينا العصر ولقينا البلد كلها معزومة (كفر ابو صريد) حوالى يعنى فوق ال350 نفر اتعزموا النهاردة على الاكل
مكرونة بشاميل ولحمة خرفان ومحشى بتنجان ومحشى كوسة وفلفل ورز وكوسة وسلطات طبعا بالاضافة للحاجة الساقعة والعصير والأكل بزيادة وكل واحد كل حوالى وجبتين

يعنى العزومة اتكلفت ما لا يقل عن 3 الاف جنيه غير اجرة ال10 طباخين طبعا والكراسى والكلام ده كله
المهم مشينا على ستة ونص ووصلنا موقف العاشر على حوالى تسعة عشان خدنا الطريق السريع (احمد اللى كان سايق) مش عم عبد الله اللى كان نزل فى وسط الطريق واحنا رايحين عشان يجيب مراته اللى فى المستشفى (وركبوا معانا واحنا مروحين)
محمد ده بقى اللى بيقرا قران ده عسل وصوته حلو جدا , قرا قران واحنا رايحين وبالمرة غنى شوية أم كلثوم وهرج شويتين وهو بيقلد محمد سعد فى بوحة وكتكوت (عمره الطبيعى 27 سنة وعمر عقله 9 سنوات) بس ابن ناس كويسين وابوه واخد توكيل امريكانى فى مصر ودى كل المعلومات اللى قدرت احصل عليها
سلم عليا من نفسه من غير ما يعرفنى ولما وصلنا وقعدنا مع الرجالة فى الشرقية هناك وقابلنا استاذ اسماعيل شاور عليا وقاله: كابتن عمرو اهو :D
واحنا راجعين بقى الواد عبد الرحمن ابن ام عبد الرحمن فضل قاعد جنبى وفضل عمال يبصلى ويرغى معايا
هرجت معاه طول الطريق وفضلت اكلمه والواد بالرغم انه رخم بس لذيذ :D
المهم انى لما وصلت العاشر نزلت انا وبنت من التلاتة (هيام) عشان كانت نازلة العاشر هى كمان تركب للسلام وفضلت واقف معاها لحد ما ركبتها السلام وبعدين ركبت انا للعبور
المهم انه كان يوم لذيذ والله والاكل كان حلو والرحلة حلوة بس المشوار مقرف والطريق صعععععب وسط قش الرز والصحرا ومقرات فرق المظلات والصاعقة
كان يوم كويس

My IQ

The Classic IQ Test

My Result: Visual Mathematician

You have a strong ability to process visual-spatial and mathematical information. These skills combined with your strengths in logic are what make you a Visual Mathematician.



You're able to understand patterns visually and in numbers. That means your mind can create a mental picture for any problem. In addition to that skill, you possess an intelligence that allows you to apply math to that picture, too. That helps you manipulate multiple parts of the picture (or problem) to come up with a solution.

You have many skills that are critical to success and problem-solving. Your talents help you understand the "big picture," which is partly why people may turn to you for direction — especially in the workplace. You flourish in environments where tasks are clearly defined, and you are a whiz at improving processes and making things more efficient. Your ability to detect patterns and your skills in math and logic, make it natural for you to come up with ideas and theories that simplify processes for everyone.



Outside of work, Visual Mathematicians tend to do well at strategic activities like chess. It must be that ability to recognize patterns — both as they are and how they develop. Regardless of how you put your mind to use, you've got a great set of talents. You will be able to envision a clear path and calculate the risks, and more importantly, the rewards, of anything you take on.

Take this test >

عملته والله وانا مش مركز ومن غير ما افكر كتير فى اسئلة كروتتها عشان اخلص وعملت نتيجة أقل من اللى عملتها قبل كدة فى اختبارات تانية

احتجاب

المدونة محتجبة عن الظهور غدا...



تضامنا مع الصحفيين الشرفاء



اعلنت احتجاب المدونة لمدة اربعة وعشرين ساعة



بدأ من اليوم الأحد 7 أكتوبر وحتى الإثنين 8 اكتوبر




من مدونة سكوت هانصوت

درس دينى

بسم الله الرحمن الرحيم
بعد الصلاة على النبى



حابب ابدأ أول موضوع دينى بشكل مختلف
كان طبيعى لو هاتكلم عن حاجة دينية اتكلم بالفصحى
بس حبيت اتكلم بالعامية لان الحديث الدينى ده هايكون حوار بصبغة شبابية
مش هاتكلم عن عذاب القبر وعذاب النار ولا هاقولك افعل ولا تفعل ولا هاقولك لو ماعملتش كدة تبقى فى النار ولازم تعمل كدة ..
لا
احنا هانتكلم بشكل مختلف

الاول بس حابب اتاكد من حاجة
هل انت مؤمن بيوم القيامة ولا لا؟

لو غير مؤمن بيوم القيامة يبقى الموضوع ده مش ليك ..
لو انت مؤمن بيوم القيامة وعارف ان بعد الموت فى حياة وفى بعث ومن بعد كدة خلود فى الجنة او فى النار - والعياذ بالله - يبقى ركز معايا

فلنفرض انك دخلت الجنة (قول يارب) هاتقعد قد ايه قبل ما تموت؟ خلود بلا موت
ايوة يعنى قد ايه يعنى؟ يعنى مالا نهاية

طب يا سيدى مش هاقولك مالا نهاية ولا مية مليار سنة ولا مية مليون ... هانقول انك هاتقعد فى الجنة او فى النار مية الف سنة .. بس

عارف انت حياتك كلها على بعضها قد ايه؟
بكل افراحها والامها وقسوتها ونجاحاتها وفشلها .. كل اللى انت عيشته فى حياتك وهاتعيشه .. كــــــل ده . قد ايه؟
مية سنة !!
طبعا الاعمار بيد الله وممكن حد يعمر اكثر من مئة سنة بس فى المتوسط وعموما ماحدش بيوصل للمئة سنة اصلا

طب روح بسرعة هات ورقة وقلم واحسب معايا
100 سنة فى الدنيا : 100 الف سنة فى الاخرة
انت واخد بالك من الفرق؟

يعنى لو انت مستمتع فى الدنيا بس بتعصى ربك (مئة سنة) هاتيجى فى الاخر وهاتاخد عقابك مــيـــة الــــف ســـنــة

يبقى فكر معايا
ايهما افضل؟
حط قدامك صورتين كدة وقارن بينهم
الصورة الاولى : انت بتعصى ربك ومستمتع فى الدنيا اخر استمتاع طوال مية سنة كاملة .. لكن مقابل كدة هاتدخل النار وتتعذب مية الف سنة
الصورة الثانية : انت بتطيع ربك فى الدنيا مية سنة بس .. مقابل كدة ربنا هايجازيك خير ويبسطك فى الاخرة اخر انبساط طوال مية الف سنة
خدت بالك ان المية سنة دول كلام فارغ؟ حاجة صغيرة جدا ما تذكرش (1:1000)
يا اخى تعالى على نفسك الشوية الصغيرين دول عشان تستريح بعد كدة
يعنى لو اتعرض عليك تقعد لمدة يوم وانت اغنى راجل فى العالم والناس بيعاملوك على انك الملك المتوج والحاكم بامره .. لكن مقابل كدة هاتتعذب بعدها لمدة الف يوم الناس هاتضربك فيهم واللى يشتم يشتم واللى يجيب عصاية ويضرب .. الف يوم يعنى اكتر من سنتين ونص
بلاش
لو اتقالك هاتقعد شهر اغنى واحد فى العالم وملك العالم وهاتحكم وتأمر وتنهى .. لكن بعد كدة (مش هاقولك الف شهر لا خليها مية شهر بس يعنى 8 سنين) 8 سنين هاتتعذب وتتعامل كالعبيد .... رأيك هايتغير؟
هاترضى بكدة؟
اهى دى نفس النسبة 1:1000

طيب تعالى نعمل تجربة عملية
قوم ولع البوتاجاز وغمض عينك وحط ايدك فى النار .. ثانية واحدة بس
ايه مالك؟ مانا عارف ان ايدك اتلسعت
طب تخيل ان انت كله ممكن تبقى جوة نار زى دى مش ثانية ولا الف ثانية ..لا .. الف سنة
انت كلك جوة النار دى مية الف سنة متتالية .. بس ايه . مش هاتبقى نار ضعيفة زى دى
هاتبقى اشد مية الف مرة

صعب مش كدة؟
طب تتعب نفسك ليه وتفكر انه يبقى فى احتمال يحصل كدة؟

انت لو والدك قالك تعمل حاجة هاتسمع كلامه ولا هاتقوله لا؟ فلنفرض يا سيدى انه قالك انك لو ماسمعتش الكلام هاينزل فيك ضرب وهايحبسك فى الاوضة ومش هاتخرج ولا هايأكلك لمدة يوم كامل .. حتى لو انت مش عاوز برضه هاتعمل اللى بيقولك عليه
طب لو رئيس الجمهورية قالك تعمل حاجة هاتسمع الكلام؟ طب لو قالك انك لو ماعملتش الحاجة دى هايعذبك لحد الموت انت وامك واختك واهلك كلهم وهايحبسك عشر سنين ومش هايأكلك فيهم .. حتى لو انت مش عاوز لكن برضه هاتسمع الكلام
طب يا اخى ده ربنا اللى خلق والدك وخلق رئيس الجمهورية بيقولك على حاجة وانت لو ماسمعتش كلامه هايحبسك بقى مية الف سنة وهايعذبك اشد عذاب ومش هاتاكل ولا تشرب طول 100 الف سنة لانك هاتكون متفرغ للصراخ والتألم بس .. وكل ده مش عاوز تسمع الكلام؟

طب انت لما تسمع كلام والدك من اول مرة هايعمل ايه؟ هاتلاقيه فرح بيك وجابلك هدية ولا خرجك تتفسح ولا حتى زودلك المصروف
تخيل بقى ربنا لما انت تسمع كلامه هايعمل معاك ايه؟

عاوز بقى تتخيل معايا قصورفى الجنة وخدم وحشم واستمتاع وانت ما بتعملش حاجة فى الحياة غير انك فقط تأمر وفى ناس مخلوقة خصيصا عشان يلبولك طلباتك
مانفسكش تبقى اغنى واحد فى الدنيا؟ اهو انت هاتبقى اغنى من اغنى واحد فى الدنيا مية الف مرة
يعنى لو اغنى رجل فى العالم دلوقتى معاه جنيه انت هايبقى معاك مية الف جنيه ولو هو معاه الف جنيه انت هايبقى معاك مية مليون جنيه
متخيل؟

طيب
عرفنا دلوقتى الفرق بين الصورتين
نعمل ايه عشان نبقى من اللى فى الصورة التانية ومانبقاش من اللى فى الصورة الاولى؟
الامر بسيط جدا
نسمع كلام ربنا
الامر فى البداية صعب لكن لما تبطل سجاير ولما تتحجبى شهر واحد بس هاتحسوا بالفرق
انت براحتك عاوز تفضل تشرب سجاير وعاوزة تفضلى من غير حجاب برضه ده براحتك وده شئ انا ماليش دخل فيه .. عاوز تبقى كدة براحتك .. مش عاوز برضه براحتك
انما عاوزك تعقلها
* انا لو عملت كدة -1- ابقى بعصى ربنا وهابقى من اللى فى الصورة الاولى
* انما لو عملت كدة -2- ابقى اثبتت لربنا حسن نيتى وقدمت ورق اعتمادى انى اكون من اللى فى الصورة التانية
هاتلاقى عقلك بيقولك لا يا عم وايه لزمة مية سنة متعة وراها مية الف سنة تعب؟

اسمع كلام والدك ووالدتك وربنا هايجازيك فى الدنيا وفى الاخرة .. فى الدنيا هاتلاقى ولادك سمعوا كلامك , وفى الاخرة .. عارفين طبعا , الصورة الثانية
ساعد الناس فى حياتهم عشان تلاقى ربنا بيوقفلك الناس يساعدوك
انت لو اديت عشرة جنيه مثلا لفقير هاتكون عنده بالدنيا كلها مع انها مش فارقة اوى معاك .. وهاتلاقى اللى بيساعدك بالف جنيه وهى مش فارقة معاه اوى لكن هاتفرق معاك جدا لو عاوز تعمل مشروع او تشترى حاجة او خلافه

عشان كدة ربنا خلق الناس طبقات
عشان لو انت ساعدت اللى تحتك .. اللى فوقك هايساعدك
لو ماساعدتش اللى تحتك .. اللى فوقك هايدوسك برجليه

يبقى عاوزك بقى تفضل ماشى فى الدنيا والصورتين قدامك
حصل معاك موقف معين . قبل ما ترد على الموقف ده حط الصورتين قدامك .. واسال نفسك
ايه التصرف اللى يخلينى اوصل للصورة دى وايه التصرف اللى يوصلنى للصورة التانية؟ هاتلاقى نفسك بتتصرف صح
هاتلاقى نفسك دايما بتعمل الصح .. لان ربنا مابيعملش حاجة ابدا الا ويكون فيها خير ليك . حتى لو انت اعتقدت انها فى الاول شر
يمكن ربنا مايوفقكش فى النتيجة وماتقدرش تدخل الكلية اللى انت عاوزها وتعتقد ان ده شر ليك
انما انت لو عقلتها هاتاقى انك لو كنت دخلت الكلية اللى انت حاببها كان ممكن تسقط مثلا ومستقبلك يضيع
او كان ممكن تتخرج وتتسبب لمعلومة خاطئة فى غلطة كبيرة جدا بانك تقتل مريض لو كنت دكتور او تهدم عمارة لو كنت مهندس ... الخ

يبقى اخيرا نلخص الكلام ده كله بحاجتين
1- اشكر ربنا على كل شئ وارضى بنصيبك
2- حط قدامك دايما صورتين .. مية الف سنة عذاب فى النار . ومية الف سنة نعيم فى الجنة .. وحاول تلاقى المفتاح الصح اللى يوصلك للصورة اللى انت عاوزها

وبس


************************************************************************************

مسلسلات أطفال؟؟؟؟

مسلسلات الأطفال فى مصر حاجة غريبة
المفروض انها للاطفال يعنى
لكن الوضع الحقيقى غريب
بدءا من موعد عرض برامج الاطفال اللى بيكون (غالبا) واغلب الاطفال فى المدرسة !!!! وحتى محتوى البرنامج نفسه ..
السنة اللى فاتت بكار كان بيحارب اللصوص الاشرار
ماشى .. كويس
انما ايه اللى دخل الجاذبية والمعاملات الكيميائية فى الموضوع ؟ ما اعرفش
السنة دى - كالعادة - رمضان انقسم نصين
فى النص الاول كانا بيعرضوا مسلسل (كراكيب) واللى فيه بنلاقى شخصيتين اللى هما تيكو وبوجو سافروا بسفينة فضاء وراحوا كوكب تانى !
ومع بداية النص التانى من الشهر اتعرضت الحلقة الاولى من المسلسل التانى (ظاظا فظاظا وجرجير طازة) واللى اتكلموا فيها عن السفر عبر الزمن !!!!!

الكواكب الاخرى والسفر عبر الزمن نفسهم كانوا موضوعين من مواضيع حلقات بكار الموسم اللى فات (واللى ما جاش السنة دى لاول سنة من بداية ظهوره على التليفزيون المصرى ويظهر انهم السنة اللى فاتت خلوا ابن منى ابو النصر يخرجه اكراما ليها بس عشان وفاتها)

زمان برضه اتذكر كان سندباد بيسافر وبيقع فى وادى فيه مخلوقات غريبة وبيحارب رخ وثعبان ضخم ويصر عليهم ويسافر مع العمالقة والاقزام

انا الموضوع ده على فكرة فى ORT


طب مش هاقول ان مازنجر وغريندايزر وسلاحف النينجا ده عنف ولازم الاطفال ما يتفرجوش عليه لانهم بيبقوا فى مرحلة تكون الشخصية
انما سؤال واحد
هو سؤال واحد بس
هل السفر عبر الفضاء وعبر الزمن مواضيع يقدر يستوعبها عقل الطفل .. المصرى ؟؟؟؟

طبيخ

3 رمضان
تجربة مريييييييرة

ماما كانت هى واحتى فى ع شمس عشان اختى عندها درس وانا وبابا هنا فى العبور
ماما كانت عاملة حلة محشى وملوخية ولحمة عشان نفطر بيهم اول رمضان
فطرنا بيهم اول رمضان (4 افراد) وبعدين اتسحرنا بيها انا وبابا وفطرنا بيها تانى رمضان انا وبابا واتسحرنا بيها تالت رمضان
خلصت طبعا !!!! طب هانفطر ايه ف تالت رمضان؟
بابا ما رضيش يجيب حاجة من برة على اساس ان الفول للجميع ولية فى شوية ملوخية وقطايف وكنافة
انا قلت هاسلق مكرونة واحمر شوية بطاطس
لقيت نفسى صاحى على خمسة وعشرة تقريبا وبابا ما صحانيش اعمل اى حاجة
المهم قلتله هاعمل كذا كذا
ازاااااااى؟ طبعا انا ما بفهمش حاجة وبابا خريج جامعة اوكسفورد هارفورد كامبريدج المشتركة لغات فى فنون الطبخ !
يا عم الحاج سيبنى انا عملت الموضوع ده ميت سبعين مرة قببل كدة
لا لا الزيت كدة كفاية ماتزودش
يا بابا مفيش زيت اساسا دول هايطيروا دلوقتى اصلا .. لالا كفاية كدة
وسابنى بقطع البطاطس ولقيته راح حاطط المكرونة فى الحلة
يييييييه ايه بس اللى عملته ده؟ لقيته بيسألنى احط الكيس كله؟
كيس ايه بس اللى تحطه كله؟ احنا كام نفر اساسا؟ احنا اتنين بس .. لا طبعا مفاية تلات ارابع الكيس اللى انت حطيته ده وماتزودش تانى
مصمم بقى .. افتح الحلة يروح مغطيها .. ياعم قلب المكرونة احسن تعجن .. لا لا سيبها بس
وبيقلب بمعلقة أكل !!! سيب بس كدة .. ورحت جايب كبشة وبدأت اقلب بيها .. لقيته بياخ\ها منى وقالى اكمل انا تقطيع البطاطس واسيب المكرونة
سيبتله المكرونة وبدأت تحمير البطاطس لقيته سابها وكمل طبق الفول اللى بيعمله !!!!!!!
شوية ... انت لسه رميت مية فى الزيت؟ هه؟ ليه بس انت؟
يا بابا انا بس نطرت كام نقطة مية اشوف الزيت قدح ولا لسة
اااه طيب كمل
انا خلصت خلاص التقطيع هابدأ اهو احط البطاطس ... لااااااااااااا اوعى ترميها من هنا بص قرب ايدك م الطاسة وانت بتحط البطاطس
طب لما انت شجيع السيما حطهم انت ولما تتحرق هابقى اكمل انا ... امممم طيب كمل
حطيت البطاطس وراح واخد هو الكبشة من ايدى وبدأ يحمر البطاطس ... هات بس اشوف شغلى .. لا سيبنى
يا بابا ... سيبنىىىىىى .. روح انت مش عارف اعمل ايه ادلق يلا التمر فى الكوبايات
شوية واسهيه وهو بيعمل الفول واروح مطلع اليطاطس من الطاسة وحاططها فى الطق برة الاقيه بيقولى .. بس دى كدة بيضة اوى مش المفروض تستنى؟
استنى ايه بس يا حاج الساعة ستة الا خمسة وفاضل اقل من عشر دقايق ع المغرب انت مش عاوز تفطر ولا ايه؟
طب ماشى كمل .. ويروح طافى النور
يا بابا بتطفى النور ليه بس ؟ عشان الدبان .. دبان ايه بس احنا هانهرج؟ دى عاشر مرة انور النور تروح طافيه فى عشر دقايق
طب انا مابشوفش فى النور اصلا تروح انت طافى ؟؟؟؟

المهم يعنى بعد ما خلصت قصدى بعد ما بابا خلص البطاطس والمغرب اذن واحنا بنخلص اخر دفعة بطاطس
المهم نيجى ناكل بقى .. لا ما تعملش حسابى فى المكرونة
نعم؟ ليه بس؟
قالى انه مش عايز ياكل مكرونة !!!! طب ليه ماخليتنيش اتصرف انا واكايل ورحت انت حاطط مكرونة ل4 افراد طالما مش هاتاكل؟؟؟؟
لا انا هاكل فول وهاكل بطاطس معاك
طب على فكرة المكرونة مش مستوية اوى عشان انت ماخليتنيش احط زيت كفاية وخليتنى اطبخ ف الضلمة..
مانا قايلكككككككك انا مش قلتلك فى المطبخ انها بييييييييييييييضة؟؟؟؟؟؟؟
طب يا عم خلاص حقك عليا
نشوف البطاطس
الاقيه كل بطاطسايتين وساب الاكل !!!!!!!!
طب لما انت مش هاتاكل البطاطس ولا المكرونة وهاتسيبنى اطفحهم لوحدى .. لعبت فيهم ليه؟
ماسيبتنيش انا لسه اتصرف بمعرفتى طالما انا اللى هاتدبس فى الاكل كله لوحدى

المهم انها كانت اسوأ مرة اعمل فيها بطاطس ومكرونة
شكرا للأبوة !!!!

تأجيل اضطرارى

للمرة الثانية فى اقل من شهر تتسرق كابلات التليفونات من العبور وتقعد العبور كلها تقريبا من غير خطوط تليفون
الموضوع غريب جدا .. اول مرة قعدتلها بتاع عشر ايام او اقل من اسبوعين وكان ده على اواخر اغسطس وشمل الموضوع جزء كبير من العبور (المستقبل والشباب والحى الثانى وغيرهم)
المرة دى الموضوع بقى مقرف جدا
الناس استسهلت باين ومابقيتش تهتم ودلوقتى الكابلات مسروقة تانى وبقالها بتاع عشر ايام دلوقتى (من قبل رمضان بيومين تقريبا) وماحدش عنده لا تليفون ولا نت
الغريب فى الامر (او فنلقل الحقير فى الامر) ان المرة دى الموضوع شمل العبور كلها تقريبا بل وسمعنا ان السرقة دى نزلت تحت على عين شمس والمطرية والمرج وجسر السويس ... ومفيش حد بيتحرك !!!!
الاغرب فى الامر (او فلنقل الاحقر فى الامر) ان لالكابلات اللى استرقت دى كلام فارغ .. لا هى زى بتاعة الكهرباء اللى بيتسرق النحاس اللى فيها ويدخل فى صناعة الدهب ولا دياولو .. الموضوع كله 50 الف جنيه وتخلص المشكلة كلها !!!
بس قيل بقى ان الشركة اللى واخدة التوكيل فى منطقة تروح تسرق الكابلات دى من منطقة تانية لحد ما تروح منطقة تالتة تروح سارقة الكابلات من المنطقة التانية اللى هى كانت سارقاها اساسا قبل كدة , وماحدش بيقول لحد انت بتعمل ايه !!!!

المرة دى الموضوع قعد 11 او 12 يوم وصحت النهاردة لقيت بابا بيتكلم فى التليفون اخيرا
الحمد لله ان الموضوع خلص بسرعة كدة لانه خلاص مابقاش فى حد بيهتم وبقى فى لا مبالاة فظيعة


او ار تى للاسف اتاجلت شوية للاسف ..
انتظرونا فى النصف الثانى من شهر رمضان ان شاء الله


موعدنا 16 رمضان
ان شاء الله

---------------------

اى شكوى
اى اقتراح
اى رد
اى تعليق
اى استفسار
اى خناقة


اوعوا تسكتوا
كلمونا هنا

سرطان

الثلاثاء 11 سبتمبر 2007

الساعة 1 ظهرا
كنت راجع انا وبابا من المرور عشان كنا بنجدد الرخصة وقعدنا بتاع 3 ساعات , وواحنا بادئين نمشى بالعربية قلت لبابا الا صحيح العربية دى حصل فيها كل حاجة الا سرطان الازاز فرد على بيا ساتر


الساعة 12 مساءا
راجعين انا وهو واختى من النادى فخدت بالى انه لسة ما لزقش الورقة بتاعة الرخصة
فبقوله انت لسة ما لزقتش الورقة
فجأة الازاز فرقع واصابه سرطان الازاز بعد الموقف اللى فات ب11 ساعة !!!!
ازاى توقعت موضوع سرطان الازاز؟ ازاى ما لزقش الورقة بتاعة الرخصة لحد ما الازاز فرقع؟ الله اعلم

المهم اننا وقفنا بالعربية وشيلنا باقى الازاز وطبعا نفضنا هدومنا
بابا جاتله ازازة فى جفنه اليمين وانا ايدى شبه اتشرحت بس كويس عشان اول ما شفت منظر الازاز وهو بيفرقع رحت رافع ايدى وحامى بيها وشى
اختى بقى فى الكرسى اللى ورا اخر صهللة وماجرالهاش حاجة
الحمد لله على كل شئ

على فكرة صحيح
الثلاث ده هو اول 11 سبتمبر يوافق يوم ثلاث ييجى بعد احداث 11 سبتمبر 2001 وتفجيرات برجى التجارة العالميين

لا للتحرش .. بالرجال

ايه التماحيك دى؟

مش عارف ابدأ ازاى .. تقريبا كل ما بحب ابدأ اكتب فى تدوينة او مقال او حتى قصة , بتكون غالبا البداية (واحتمال النهاية) فى دماغى مسبقا , انما المرة دى مش عارف ابدا ازاى .. عموما هما 3 قصص قيرة او 3 حكاوى ومواقف حصلتلى شبه بعض وحابب اسردهم يعنى.

-1-

من شهر تقريبا او 5 اسابيع كنت ف كنتاكى نادى الشمس (عبد الحميد بدوى) مع العيلة .. طلعنا الدور التانى لقينا شوية شباب نضاف (باين من شكلهم انهم ولاد ناس يعنى) قاعدين لابسين زى ما يكونوا خارجين م النادى .. شورتات بقى وتى شيرتات وبتاع , وقاعدين ياكلوا كل شوية مع بعض (هما كانوا كلهم على بعض بتاع 8 او 9 شباب من 16 ل 22 سنة)
شوية ولقينا ناس طالعين .. واحدة شابة (بتاع 20-25 سنة) لابسة نضيف جدا بس شبه بتوع الجامعة الروشين يعنى وورها بنت اصغر شوية (12-16 سنة) لابسة زى بلوزة كت تقريبا وبطنها باينة وبنطلون ضيق وحاجات كدة , واتنين ولاد (10-14 سنة) باين عليهم انهم ولاد ناس اوى

تقريبا طبعا الشباب اللى قاعدين عمالين يبصوا ع البت وانا ببص عليهم , واحد منهم بص لقانى باصصله ومبتسم راح ضاحك وهز دماغه , ضحكت وهزيت دماغى .
اغلب الشباب فضلوا باصين ع البت , انا بلف عادى بكلم بابا لقيتها باصة عليا .. عادى . زى ما اى عينين بيقعوا على بعض فى حظة عابرة
شوية وببص بالصدفة لقيتها باصة تانى , وبعد شوية لقيت ماما بتعلق ع البت اللى عمالة تبص عليا دى ...

-2-

من حوالى 3 اسابيع نزلت ف موقف العاشر وركبت عربية تودينى العبور , بس العربية وقفت شوية فى العاشر قدام كشك زجاجى , الكشك كان فيه عيلة من راجل وست وبنتين وولد اصغر وكانوا بيفطروا ساندويتشات تقريبا حاجة كدة , بنت م الاتنين كانت واقفة ف الشبك .. اللى قدام الميكروباص اللى انا راكبه , او بمعنى أدق .. قدام الشباك اللى انا قاعد جنبه.
انا اعرف لما ولد بيبص لبنت كتير ويبحلق فيها , البنت بتتكسف وبتودى وشها الناحية التانية .. عايز اقول ان انا اتكسفت من كتر ما البت فضلت باصالى ومش عاوزة تودى وشها الناحية التانية .
الغريب انها نادت على امها واختها ولكمتهم بحاجة فلقيتهم بصوا عليا هما راخرين وامها ضحكت وانبسطت اوىىى !! ونادت على الراجل اللى معاهم يبص هو راخر !!!! بص هو كمان بس من غير انفعالات ودقق شوية وبعدين كمل اكل عادى كأن مفيش حاجة ..
انا تقريبا شبه مذهول
بصيت يمين وشمال ودققت قوى لكن العربية كانت تقريبا فاضية والمنطقة كلها نفسها تكاد تكون غير مكتظة كعادتها عشان بس ساعتها كان صبح قوى مش بالليل
اتاكدت انه انا
كذا مرة اشيل وشى والمح كدة الاقيها بتاكل ... وبتبص !!!!

-3-

امبارح بقى راجع م الجامعة ركبت فى ميكروباص من موقف العاشر ورايح العبور .. الميكروباص تقريبا فاضى .. الكنبة اللى قدام قاعد فيها اتنين , وانا قعدت وراهم لوحدى , وفاضى ورايا كنبتين.
واحدة شابة شكلها محترم , لابسة اسدال وتمام وكل حاجة. فتحت باب الميكروباص .. وجت قعدت جنبى .
انا اتخنقت بصراحة .. يعنى الميكروباص فاضى خالص وانتى جاية تخنقى عليا .. طب ماشى يا ستى ادينى هاتعدل اهو وهافضل قاعد محترم طول الساعة اللى هانقعدها ف الطريق.
لقتها بتطلع جنيه وراحت مدياهولى !! طب يا حاجة انا دلوقتى قاعد جوة وانتى قاعدة بينى انا والتباع فسهل يعنى انك تديله هو الفلوس خاصة انه بينه وبينك نص متر يعنى .. تدينى انا الجنيه ماشى لو انا على يمينك او بينك وبين التباع او حتى لو انا فى الكنبة اللى قدامك مش قاعد جنبك الناحية التانية !!
خدت الجنيه ولقيت الناس اللى ورايا على يمين الولية دى بيجمعوا مع بعض وراحوا مديينى انا الفلوس .. خدت اربعة جنيه فى جيبى ورحت مدى التباع خمسة جنيه.
الاخت بقى سابتنى؟ ازاى؟؟؟ بكوعها بقى وشغالة ف جنبى .. فضلت ابعد عنها واتاخر لحد ما لزقت فى الشباك خالص وطلعت براه كمان .. وهى بقى راحت شغالة بكتفها !
انا مش عارف اتصرف ازاى بصراحة لانى لو كنت قلتيلها بلاش او عيب او خدى بالك هايبقى موقفى اا اللى وحش على اساس ان الناس هاتقول بقى الاخت المحترمة دى هى اللى بتضايقك ياد انت؟
طب انا عيان وعندى برد .. كحيت , عادى يعنى خالص مفيش حاجة .. لقيتها كحكحكح كححححح .... بقيت مكسوف أكح احسن حد ياخد باله يقول انى بغلس عليها وبرد على كحتها .. بعاكس يعنى.
شوية خرجت الموبايل العب بيه . لقيتها خرجت وقعدت تكتب عليه مش عارف ايه .. مش عارف بقى نمرتها دى ولا ايه بالظبط!
قعدت محترم وماليش دعوة بحاجة بس كنت بلمحها بطرف عينى عمالة كل شوية تبص على شمالها (عليا يعنى) تلاقينى مش باصص تروح باصة يمين تانى .. شوية وتروح مديانى وشها .. لحد ما زهقت راحت نايمة بايدها وراسها على الكنبة اللى قدامنا وحاطة وشها ناحية الشمال .. قال ايه مش باصة يعنى .. وتروح قايمة مرة واحدة خابطة ف جنبى.
انا دعيت الشوية دول يعدوا على خير لحد ما وصلت الحتة اللى عاوز انزل فيها وجاى انزل .. لقيتها راحت متدورة وموسعالى انزل يعنى وهى قاعدة !! طب يا حاجة فى ايه؟ اتفضلى انزلى طيب ده انتى جنب الباب .. مفيش . رحت نازل وانا بحسس ع الارض عشان ما اخطبش فيها ولا المسها ولا حاجة .. بس فى الاخر راحت زاغدانى برجلها فى انكل رجلى من ورا كدة . نزلت ما بصيتش ورايا .. وطلعت أجرى :D

سبيشيال تدوينة (2) : جد السفاح وسماح

التدوينة دى انا واخدها كوبى من مدونة كاتروز


****************************

البقاء لله جد المدونين ..سفاااح كرمووز ..و زى الهواااا

توفى الى رحمه الله جد المدون

safa7 karmooz

عن عمر يناهز السابعه و الثمانون عاما

و جد المدونه زى الهوااا

انا لله و انا اليه راجعون

اللهم نور له قبره روضه من رياض الجنة لا حفرة من حفر النار

اللهم اغفر له وارحمه واعف عنه وأكرم نزله

اللهم أبدل دار خيرا من داره وأهلا خيرا من أهله وذرية خيرا من ذريته وزوجا خير من زوجة وأدخله الجنة بغير حساب برحمتك يا أرحم الرحمين

اللهم انقله من ضيق اللحود ومن مراتع الدود إلى جنات جنات الخلود

لا إله إلا أنت يا حنان يا منان يا بديع السماوات والأرض تغمد المتوفى برحمتك يا أرحم الرحمين

اللهم أن كان غير أهلا لوصول رحمتك فرحمتك أهلا لأن تسعه

اللهم أطمعه من الجنة وأسقه من الجنة وأره مكانه في الجنة وقل له أدخل من أي باب تشاء

............................

تدوينة الجمعة (4) : ممنوع ان البنت تدافع عن نفسها

تدوينة الجمعة هاتبقى تدوينة خاصة
هاكتب فيها حاجة انا كتبتها قبل كدة
ممكن اكون كتبتها فى مدونتى بشمساوى او فى اى موقع تانى
المهم انها هاتكون تدوينة تستحق انى اكتبها تانى

**********************************************


ممنوع ان البنت تدافع عن نفسها

جرنان الدستور بتاع 20-12 اللى فات كان فيه موضوع مهم
أنقلكوا منه :


اكثر من ستة اشهر عقوبة استخدام هذه الوسائل وحكم مع ايقاف التنفيذ فى حالة حيازتها
بنات مصر يستخدمن وسائل دفاعية من اول دبوس الابرة والكتر الى الرذاذ والصاعق المصنع محليا


الدفاع عن النفس حق انسانى لا يكفله الدستور المصرى للبنات , فلو لم تستطع الدفاع عن نفسها بدراعها ولم تحصل على ترخيص سلاح لن تستطيع ان تواجه اى تحرش او اعتداء فى الشارع , فمحظور فى مصر حيازة اى اداة دفاعية حتى ما يسمى السيلف ديفينس من اول السبراى او الرذاذ الذى يسبب العمى المؤقت وحتى الصاعق الذى يسبب الشلل المؤقت رغم كل ما يحدث الان من تحرش واعتداء وعدم وجود الامن الكافى فى الشوارع
ورغم انها وسائل متاحة بالخارج الا ان القانون المصرى يجرمها باعتبارها مواد تمثل ضررا بالاشخاص او مواد تضر الغير فى العديد من المواد بقانون العقوبات وان لم يشر اليها بشكل مباشر وتعتبر جنحة عقوبتها من ثلاثة اشهر الى ثلاث سنوات غالبا
وان كانت المادة 242 من قانون العقوبات تشير الى ان من احدث بغيره جرحا او ضربا لم يبلغ درجة الجسامة يعاقب فاعله بالحبس مدة لا تزيد عن سنة او بغرامة لا تقل عن عشرة جنيهات ولا تتجاوز مائتى جنيه مصرى
ووفقا لقانون البلطجة رقم 97 لسنة 92 تجرم المادة 35 المواد التى تضر بالغير وتتراوح العقوبة من الحبس ستة اشهر الى سبع سنوات وفقا لتقدير القاضى اما حيازته فيحرر ضدها مخالفة او يصدر حكما مع ايقاف التنفيذ بصرف النظر عن السبب الذى استدعى استخدامه او حيازته فليس هناك ما يسمى ترخيص استخدام السيلف ديفينس

الخ الخ الخ الخ

ويبدى العميد السابق محمود قطرى تخوفه من الترخي للوسائل الدفاعية مثل الرذاذ والصاعق لان هناك حالة فوضى امنية فى مصر فلو ابيحت مع غياب الامن قد تحدث فوضى ويعلق ان البديل الوحيد لحدوث هذه الفوضى ان تقوم الشرطة بوظيفتها ويعاد العمل بما كان يسمى عسكرى الدرك فى كل شارع بالنهار والليل . ( وش بيقول سلامتها ام حسن )
ورغم ان شوارع المدن الاوروبية تحظى بحماية امنية الا ان استخدام هذه الوسائل متاح فى الخارج , لكن المحامية نهاد ابو القمصان مديرة مركز حقوق المرأة تجد ان الخارج ليس معيارا فالمجتمعات التى تبيح استخدام هذه المواد شديدة العنف , قد لا تواجه الفتيات فيها تحرشا يوميا لكن هناك مناطق خطرة قد يحدث فيها اعتداءات اجرامية وليست اعتداءات صبيانية مثل التى تحدث يوميا فى مجتمعاتنا وتحتاج الى وقفة امنية اكثر من اى شئ اخر , موضحة انه فى مصر لا نحتاج لتشجيع تدابير العنف ولكننا بحاجة لتفعيل القانون والشرطة , لا نحتاج الامن السياسى الموجود حاليا ولكن نحتاج امنا اجتماعيا
ومن وجهة نظرها العنف لا يولد الا مزيدا من العنف , والبنات فى مصر غير مدربات والرذاذ يحتاج للقدرة على توجيه الرشاش على الوجه , اما الصاعق الذى لا يوجد فى مصر فهو مثل ماكينة الحلاقة يشل الحركة ويوضع كعلبة مكياج فى حقيبة اليد ويمكن ان يتسبب فى ضرر اذا اسئ اتخدامه وتضيف انه بدلا من اعلاء وسائل العنف فى المجتمع فلنسع للوجود الامنى وتنفيذ القوانين (وش بيزغرد) , ففى ظل غياب دور الدولة يسعى كل مواطن للدفاع عن نفسه بطريقته مما يكرس للعصبية ورغم كل هذا لا تعترض ابو القمان على حمل الرذاذ او الصاعق فى ظل ما يحدث رغم تحفظها على اتجاه كل مواطن للدفاع عن نفسه بطريقته .

تدوينة استثنائية (1) : اتسرقنا

احدثكم الان من امام جهاز الكمبيوتر .. الذى نجا من سرقة تعرض لها منزلنا منذ ساعات قلائل



احنا نزلنا من بيتنا مغرب الاربعاء رايحين شقة ع شمس وهانبات اربع وخمس وجمعة وسبت ونرجع السبت بالليل
بتنا الاربع عادى ويوم الخميس بالليل واحنا فى النادى لقينا مكالمة جاية لماما ع الموبايل واحد بيقولها انه مباحث العبور وانهم عاوزين تليفون

بابا وعاوزينا نيجى
طبعا هى لما سمعت مراة الدكتور فكرى ما قدرتش تكمل المكالمة وانا اللى فهمت اللى بعد كدة وبعد ما اديت الراجل نمرته فى العيادة وكلمته تانى

فهمنا انه كان فى محاولة للسطو على منزلنا
بابا نسى الموبايل فى الشقة وماخدوش معلاه العيادة
كلمنا الجيران قلنالهم لما بابا ييجى يبقى يجيلنا ع النادى بسرعة عشان كذا كذا كذا
جالنا بابا ومعاه جارنا اللى فى الشقة اللى قدامنا (فى عين شمس) ورحنا شقة العبور لقينا اتنين امناء شرطة وواحد صول ودخلنا نعاين الشقة بقى
اولا بس لقينا الباب مقشوط والكالون اتهرس لحد ما اتفتح
بعدين بنبص لقينا كل الاجهزة زى ما هى ومفيش حاجة اتاخدت
دخلت طبعا اوضتى اول حاجة عشان اشوف حبيبى فلقيته الحمد لله ما اتسرقش والراوتر شغال وتمام .. بصيت فى الكومودينو لقيت الفلوس زى

ماهى .. يعنى الحرامى ما لعبش فى الاوضة
اختى نفس الوضع تقريبا
حصل بس ان لقينا الدواليب مقفولة بالمقلوب لكن مفيش حاجة جواها متاخدة ولا من براها
دخلنا اوضة بابا وماما لقيناها زى ما بيقولوا (رأسا على عقب)
هو مفيش فعلا مصطلح ينفع اكتر من كدة
الاوضة متبهدلة ومقلوبة .. ومسروق منها مجوهرات ماما من ع التسريحة و2250 جنيه من دولاب بابا .. وبس
الراجل بهدل الدنيا وخرجت بطن الدولاب وقطع فى اظرف وسرق حتى صورة لواحدة قريبتنا !!
يعنى الراجل كان داخل وهو عارف هايعمل ايه .. هايفتش فى الدواليب وياخد حاجته ويمشى
بس ده كان داخل وكأنه عارف هو رايح فين ولا هايعمل ايه بالظبط !

كتبنا كل حاجة من اللى اتسرقت فى البلاغ وامين الشرطة احمد جلال اتصل بالقسم وبلغ بالاوصاف عشان ينزل بيها نشرة لمحلات المجهورات فى

مصر كلها من اسكندرية لاسوان
وبعدين جه معاونا المباحث ملازم اول عمرو بيه عزب وملازم اول يحيى بيه وقعدوا خمس دقايق ومشيوا على طول وخدوا بابا معاهم وجارنا بتاع

ع شمس وجارنا اللى فى الشقة اللى فوقينا هنا فى العبور
رجعوا بعدها بنص ساعة تقريبا وكانوا سايبين امين الشرطة احمد جلال ده (هاحكى بعد كدة النص ساعة اللى قضيتها معاه فى تدوينة تانية منفردة

.. لانها تستاهل) تأمين . لحد ما رجعوا على حوالى الساعة اربعة الا ربع وبابا نزل وصل احمد جلال وجار ع شمس ورجع على حوالى اربعة ونص

***********************************

اللى حصل كالتالى :
جارنا اللى فى الشقة اللى فوقينا لقى الباب بتاعنا موارب حوالى 10 سنتى والشقة ضلمة وفضل الوضع بالشكل ده بتاع عشر دقايق وبالتالى

مفيش حد نزل يجيب حاجة مثلا وسايب الباب
كلم هو البوليس جاب الصول ده اللى كلم امين المباحث احمد جلال اللى جه هو والامين التانى (سيد) ودخل بالطبنجة الميرى (مصطلح لا يمكن

المساس به) لحد ما اتطمن ان مفيش حد فى الشقة والحرامى مشى .. الكلام ده كان على حوالى تمانية باين
قعدوا بقى يدورولنا على نمرة تليفون مش لاقيين .. فضلوا بتاع 3 ساعات بيدوروا على نمرة تليفون لينا مفيش
تليفون الشقة القديمة واتوقف .. جارنا اللى فى الرابع كان بابا كاتبله روشتة راح جابها من بيبته ورجع واتصل ببابا ف العيادة وماحدش بيرد
فتح الانديكس لقى جواها نمرة مكتوب قصادها (اختى) وفضل يطلب عمتى وبرضه ماحدش بيرد .. حتى الراجل اتخنق لما لقى الدنيا مقفلة ف وشه

كدة
جاب بقى الاسم من ع الروشتة ودور فى الانديكس على اى حد اسمه متشابه لحد ما لقى نمرة مكتوب قصادها اسم عمى فاتصل بيه
مراة عمى فضلت سايبة الراجل ع الويتينج waiting وكانت فاكراه واحد بيهزر فادت التليفون لعمى اللى فضل مع الراجل ع التليفون ربع ساعة

مش عاوز يديله نمرة موبايل لينا
عاوز الاول يعرف مين ده وشغال فين ومع مين واشتغل فين قبل كدة ومواويييييييل
المهم امين الشرطة ده خد نمرة ماما واتصل بها ومن بعدها حصل اللى حكيته من شوية

***********************************

عندى بقى تعليقات على الموضوع بحاله
- ماما وهى نازلة كانت لابسة خمس غوايش بخمس بواكى ونص ولاول مرة تلبسهم ونجوا م السرقة !!!
اصله اتسرق حاجات بالهبل !!! طقم دهب على كوليه مش عارف ايه على خواتم ايه على مش عارف فص ايه وحواليه الماظ .. حاجات كدة

- البشوات فى البوليس بيستسهلوا .. المفروض بتوع المعمل الجنائى كانوا جم اول ناس ورفعوا البصمات عشان الواد يتمسك .. لكن فيييييين
يا عزيزى انت فى مصر .. الصول باشا قالنا بصمات ايه ده الحرامى مش غبى وسهل يلبس كيس بلاستيك على ايده وهو شغل ومش شرط حتى

جوانتى .. طب يا عم الحاج افرض انه كان متخلف ولمس اى حاجة بايده؟ لا لا هو احنا بنشتغل بس بالمعلومة والتخمين واستنتاجنا احنا ومش

بنبص لموضوع البصمات ده حتى لو فى احتمال صغير انه يبقى صح !!!!

- حضرة الباش صول كان مش عارف ليه شمتان قوى كدة وفرحان وهو عمال يقولنا ان احنا مهملين وبيدينا دروس ازاى المفروض نشيل الفلوس ونخبى الدهب فين والمفروض نعمل ايه .. حكالنا على مرة اتسرق فيها موتوسيكل حكومة من قدام قسم الشرطة !!!!

- كان الباش صول عمال ينطق كلمة (صلاح) بشكل لذيذ جدا
صلاح ده جارنا بتاع ع شمس وبرضه جارنا بتاع العبور اسمه صلاح
المهم انه مش زينا بيقول الالف لما بننطق صلاح (زى فى كلمة لمبة او قلاووظ) انما بينطقها مخففة (زى فى كلمة لازم) فبيقول يا صلا..
ياستذ صلا .. (قصده يعنى يا استاذ صلاح)
يستذ صلا

فى حاجات تانية هابقى اكتب عنها بعدين مش دلوقتى عشان مخنوق شوية-

وفاة بويرتا

رحيل بويرتا صاحب الهدف الذى غير حياة اشبيلية

سيبقى اللاعب أنطونيو بويرتا ، الذي توفي مساء اليوم الثلاثاء إثر إصابته بتوقف في عضلة القلب يوم السبت الماضي خلال مباراة فريقه أمام خيتافي في افتتاح بطولة الدوري الأسباني لكرة القدم ، في أذهان جميع عشاق أشبيلية بعد أن أحرز للفريق هدفا غاليا تأهل به إلى نهائي بطولة كأس الاتحاد الأوروبي لكرة القدم عام 2006.

وولد أنطونيو بويرتا بيريز في 26 تشرين ثان/نوفمبر عام 1984 وعشق نادي أشبيلية منذ صغره رغم أن والده كان يلعب كرة اليد في صفوف أحد الفرق التابعة لنادي ريال بيتيس ، الغريم التقليدي لأشبيلية.

ولعب بويرتا في أحد الأندية الصغيرة بالمدينة حتى اختاره كشافو نادي أشبيلية للانضمام إلى صفوف الناشئين بالنادي ، الذي دافع اللاعب عن ألوانه طيلة حياته.

ولعب بويرتا في الدوري الأسباني للمرة الأولى في 21 نيسان/أبريل 2004 على يد المدير الفني السابق لأشبيلية والحالي لفريق أتلتيك بيلباو ، خواكين كاباروس ، وذلك أمام ضيفه ملقا الذي فاز بالمباراة 1/صفر ، لكن اللاعب الصاعد قدم أداء يؤكد أن مستقبلا كبيرا بانتظاره.

وفي موسم 2004/2005 تناوب بويرتا اللعب بين الفريقين الأول والثاني لأشبيلية وشارك في نهايته في فوز المنتخب الأسباني بالميدالية الذهبية بدورة ألعاب البحر المتوسط في ألمريا عام 2005.

ومنذ ذلك الحين شغل اللاعب موقعا أساسيا في تشكيل المنتخب الأسباني للشباب (تحت 21 عاما) قبل أن تلوح له فرصة اللعب مع المنتخب الوطني الأسباني في تشرين أول/أكتوبر عام 2006 أمام السويد في التصفيات المؤهلة لبطولة كأس الأمم الأوروبية 2008 التي تقام في سويسرا والنمسا ، وذلك بعد إصابة خوسيه أنطونيو رييس.

لكن اليوم الذي لن ينساه أحد ممن أحبوا أداء بويرتا كان السابع والعشرين من نيسان/أبريل عام 2006 حيث أطلق بويرتا قذيفة بيسراه في الوقت الإضافي لمباراة فريقه أمام شالكه الألماني ليتأهل أشبيلية إلى أول مباراة نهائية له خلال 44 عاما ، قبل أن يفوز بعدها بأيام بلقب البطولة على حساب ميدلسبروه الإنجليزي في أول لقب له على مدى ستة عقود.

ولم يكن هذا الهدف سوى بداية لسلسلة من البطولات وصلت إلى خمس حتى الآن في أقل من 15 شهرا ، ويمكن أن تصبح ست بطولات يوم الجمعة إذا فاز الفريق بلقب كأس السوبر الأوروبي على حساب ميلان الإيطالي.

ووصف مشجعو أشبيلية ذلك الهدف بأنه "الهدف الذي غير حياتنا" فقد شاهدوا مع إحرازه شبح فريقهم الخاسر يغادر دون أن يعود على الأقل حتى الآن.

kooora.com

================================================

SEVILLE, Spain (AP) -- Sevilla midfielder Antonio Puerta died Tuesday, three days after collapsing on the field during his team's Spanish league game against Getafe.

Puerta died of "multiple organ failure stemming from prolonged cardiac arrest" and subsequent coronary problems, Virgen del Rocio Hospital director Gimeno Guerrero said in a statement.

"This is one of the saddest days in the history of FC Sevilla," team president Jose Maria del Nido said, fighting to hold back tears.

The 22-year-old Puerta had been in an intensive care unit since Saturday and had been given assisted ventilation, but his condition worsened Tuesday.

Puerta lost consciousness and fell near his own goal Saturday in the 31st minute, but was able to walk off minutes later after being treated by team doctors. Doctors said he had a heart attack in the locker room and at least one more in the emergency room of a Seville hospital.

"The Professional Football League wishes to pass on its most sincere condolences to the family of Antonio Puerta," the league said in a statement. "It has also declared the next day of league play to be one of official mourning and asked all its affiliated teams to observe a minute's silence before the games."

A wake open to the public will be held for Puerta starting at midnight Tuesday ahead of his burial on Wednesday, and his family has asked that his body be wrapped in a team flag, Sevilla said on its Web site.

===================================



Young Puerta dies

Spain mourning for Puerta

'Magnificent player, even better person'

Soccer player dies 3 days after on-field collapse

Puerta condition critical

Sevilla footballer Antonio Puerta has died from the heart attacks suffered last Saturday

Spanish soccer player Puerta dies following collapse on field

Puerta dies after collapse

Sevilla's Puerta dies in hospital



Sevilla's forum

Antonio Puerta 1984-2007